ព័ត៌មានអន្ដរជាតិ

ខេត្តសុងក្លា របស់ថៃប្រកាសភាពអាសន្ន បន្ទាប់ពីមានទឹកជំនន់ធ្ងន់ធ្ងរ

បានផុស

៨ ខែ មុន

នៅ

ថ្ងៃសុក្រ ២១ វិច្ឆិកា ២០២៥

ដោយ

Chheang

ខេត្តសុងក្លា (Songkhla) របស់ប្រទេសថៃ បានប្រកាសភាពអាសន្នក្នុងស្រុកចំនួន៧ បន្ទាប់ពីមានភ្លៀងធ្លាក់ខ្លាំងអស់រយៈពេលជាច្រើនថ្ងៃបានបង្កឲ្យមានទឹកជំនន់យ៉ាងខ្លាំងក្លា ដែលប៉ះពាល់ដល់ប្រជាជនជិត ៤៥ ០០០នាក់។

*ទឹកជំនន់នៅខេត្តសុងក្លា (រូបថត៖ ហ្វេសប៊ុក)*

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់ Thai Enquirer នាថ្ងៃទី២១ខែវិច្ឆិកាឆ្នាំ២០២៥នេះ ទឹកជំនន់ដែលបានកើតឡើងតាំងតែពីថ្ងៃទី១៩វិច្ឆិកា បានជន់លិចស្រុក Rattaphum, Mueang Songkhla, Khlong Hoi Khong, Ranot, Krasae Sin, Sathing Phra, និង Hat Yai។ ផ្ទះសរុប១៧៨៨៦ខ្នង ក្នុង២៨ឃុំ និង១៥៩ភូមិ ត្រូវបានរងផលប៉ះពាល់។ មិនទាន់មានរបាយការណ៍ពីករណីបាត់បង់ជីវិតណាមួយនៅឡើយទេ។

ផ្ទះមួយខ្នងត្រូវបានបំផ្លាញ ហើយ៣ខ្នងទៀតរងការខូចខាត ខណៈទឹកជំនន់បានរំខានដល់មណ្ឌលសុខភាពក្នុងស្រុក និងលិចផ្លូវ៦ខ្សែ។

លោក Rattasat Chidchu អភិបាលខេត្ត បានណែនាំអាជ្ញាធរស្រុកឲ្យដំឡើងផ្លាកសញ្ញាព្រមាន ដាក់ពង្រាយម៉ាស៊ីនបូមទឹក និងបើកផ្លូវសំខាន់ៗឡើងវិញឲ្យបានលឿនបំផុតតាមដែលអាចធ្វើទៅបាន។ លោកបានជំរុញឲ្យប្រជាជនអនុវត្តតាមការណែនាំផ្លូវការ ដោយកត់សម្គាល់ថា កម្រិតទឹកនៅតែខ្ពស់ក្នុងតំបន់មួយចំនួន ដោយសារមានភ្លៀងបន្តធ្លាក់។

ព្យុះមូសុងត្រូវបានព្យាករថានឹងផ្លាស់ទីទៅសមុទ្រ Andaman នៅថ្ងៃទី២៤ខែវិច្ឆិកា ប៉ុន្តែអាជ្ញាធរបាននិយាយថា ពួកគេកំពុងរក្សាការឃ្លាំមើលយ៉ាងជិតស្និទ្ធ និងណែនាំដល់សាធារណជនឲ្យតាមដានការប្រកាសអាសន្នអំពីអាកាសធាតុ៕