ព័ត៌មានអន្ដរជាតិ

អតីតនាយករដ្ឋមន្ត្រីជប៉ុន ឲ្យប្រុងប្រយ័ត្នបញ្ចៀសភាពតានតឹងជាមួយចិន

បានផុស

៨ ខែ មុន

នៅ

ថ្ងៃអាទិត្យ ២៣ វិច្ឆិកា ២០២៥

ដោយ

ខណៈពេលដែលជម្លោះវោហាការទូតកំពុងរីករាលដាលយ៉ាងខ្លាំងរវាងមហាយក្សចិននិងជប៉ុន អតីតនាយករដ្ឋមន្ត្រី ហ្វូមីអូ គីស៊ីដា (Fumio Kishida) បានចេញអត្ថាធិប្បាយជាសាធារណៈលើកដំបូងលើទិដ្ឋភាពនយោបាយបច្ចុប្បន្ន ដោយក្នុងនោះបានបរិហារអ្នកការទូតចិនដែលព្យាយាមរុញរឿងនេះទៅបណ្តាញសង្គម ប៉ុន្តែលោកឲ្យរដ្ឋាភិបាលប្រុងប្រយ័ត្នក្នុងជម្លោះតានតឹងការទូតដែលកំពុងបន្តជាមួយប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងការដកស្រង់របស់ព័ត៌មាន Japan Daily អតីតនាយករដ្ឋមន្ត្រីជប៉ុន បានអត្ថាធិប្បាយជុំវិញរដ្ឋបាលថ្មីរបស់នាយករដ្ឋមន្ត្រីរបស់លោកស្រី សាណាអេ តាកាអ៉ិឈិ (Sanae Takaichi) ដែលបានងាកទៅបង្កើតសម្ព័ន្ធភាពជាមួយគណបក្ស Japan Innovation Party បន្ទាប់ពីគណបក្ស Komeito បានចាកចេញ។

លោកបានកត់សម្គាល់ថាការផ្លាស់ប្តូរសម្ព័ន្ធភាពរដ្ឋាភិបាលចម្រុះពីគណបក្ស Komeito សេរី ទៅគណបក្ស Japan Innovation ដែលមានលក្ខណៈអភិរក្សអាចឆ្លុះបញ្ចាំងពីនិន្នាការស្តាំនិយមជាសកល និងក្នុងស្រុក ប៉ុន្តែបានសង្កត់ធ្ងន់លើភាពចាំបាច់នៃការបង្កើតសំឡេងភាគច្រើនដើម្បីធានាបាននូវ «នយោបាយសម្រេចចិត្ត»។

ការប្រកាន់យកជំហរស្តាំនិយមដែលមានលក្ខណៈជាតិនិយមកាន់តែខ្លាំង បាននាំទៅដល់ជម្លោះការទូតដ៏ខ្លាំងរវាងប្រទេសចិននិងជប៉ុន បន្ទាប់នាយករដ្ឋមន្ត្រីជប៉ុន លោកស្រី សាណាអេ តាកាអ៉ិឈិ បានលើកឡើងពីវិធានការជួយតៃវ៉ាន់ បើសិនមានការវាយប្រហារពីសំណាក់ចិនដីគោក។

យោងតាមការចេញផ្សាយនោះ ទាក់ទិននឹងភាពចម្រូងចម្រាសនាពេលថ្មីៗនេះ ពាក់ព័ន្ធនឹងការបង្ហោះតាមប្រព័ន្ធផ្សព្វផ្សាយសង្គមដ៏ញុះញង់របស់អគ្គកុងស៊ុលចិន លោក គីស៊ីដា បានរិះគន់អ្នកការទូតចិនថា «មិនសមរម្យបំផុតសម្រាប់អ្នកការទូត» ប៉ុន្តែបានជំរុញឱ្យមានការប្រុងប្រយ័ត្នចំពោះសកម្មភាពដែលអាចបង្កើនភាពតានតឹងរវាងជប៉ុន និងចិន។

រហូតដល់ពេលនេះ ប្រទេសចិននិងជប៉ុនបានកើនឡើងនូវជម្លោះវោហាស័ព្ទការទូតយ៉ាងខ្លាំង និងឈានទៅប៉ះពាល់ដល់វិស័យសេដ្ឋកិច្ច ពាណិជ្ជកម្មទ្វេភាគី និង ទេសចរណ៍ ក្រោយពីនាយករដ្ឋមន្ត្រីជប៉ុន លើកឡើងពីវិធានការការពារតៃវ៉ាន់៕

រ៉ាន់ រើយ