អាមេរិក ប្រកាសឲ្យពលរដ្ឋខ្លួនចាកចេញពី អ៊ីរ៉ង់ ជាបន្ទាន់

យោងតាម Globaltimes រដ្ឋបាលរបស់ប្រធានាធិបតី ដូណាល់ ត្រាំ កាលពីថ្ងៃទី ១២ ខែមករា បានអំពាវនាវឲ្យពលរដ្ឋអាមេរិកចាកចេញពីប្រទេសអ៊ីរ៉ង់ជាបន្ទាន់ ស្របពេលដែលបរិបទនៃអស្ថិរភាពកាន់តែកើនឡើង នៅក្នុងប្រទេសមួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីប្រកាសសន្តិសុខ ស្ថានទូតអាមេរិកទទួលបន្ទុកអ៊ីរ៉ង់បានណែនាំពលរដ្ឋខ្លួនឲ្យចាកចេញពីប្រទេសអ៊ីរ៉ង់ឥឡូវនេះ និងរៀបចំផែនការចាកចេញដោយគ្មានការគាំទ្រពីរដ្ឋាភិបាលអាមេរិក។ ក្នុងពេលដែល ទីក្រុងវ៉ាស៊ីនតោនមិនមានស្ថានទូតនៅអ៊ីរ៉ង់ចាប់តាំងពីឆ្នាំ ១៩៧៩មក ប៉ុន្តែមានស្ថានទូតនិម្មិតដើម្បីផ្តល់ព័ត៌មាន និងអនុសាសន៍ដល់ពលរដ្ឋនៅអ៊ីរ៉ង់។

ដោយសារតែការតវ៉ានៅទូទាំងប្រទេសអ៊ីរ៉ង់កំពុងកើនឡើងខ្លាំង ហើយអាចក្លាយជាអំពើហិង្សានាំឲ្យមានការចាប់ខ្លួន និងអ្នកស្លាប់ របួសជាច្រើន។ សេចក្តីថ្លែងការណ៍​បាន​បញ្ជាក់​ថា វិធានការ​សន្តិសុខ​កាន់តែ​កើនឡើង ការបិទផ្លូវ ការរំខាន​ដល់​ដឹកជញ្ជូន​សាធារណៈ និងបិទ​អ៊ីនធឺណិត​កំពុង​កើតឡើង។ រដ្ឋាភិបាល​អ៊ីរ៉ង់ ក៏​បាន​រឹតត្បិត​ការចូល​ប្រើប្រាស់​បណ្តាញ​ទូរស័ព្ទចល័ត ទូរស័ព្ទ​លើតុ និង​ប្រព័ន្ធ​អ៊ីនធឺណិត​ជាតិផ្សេងទៀតដែរ។

ក្នុងពេលជាមួយគ្នានេះ ប្រធានាធិបតី ដូណាល់ ត្រាំ បានព្រមានថា លោកនឹងដាក់ពន្ធ ២៥% លើប្រទេសដែលធ្វើអាជីវកម្មជាមួយអ៊ីរ៉ង់ ដើម្បីឆ្លើយតបទៅនឹងការបង្ក្រាបរបស់រដ្ឋាភិបាលទីក្រុងតេហេរ៉ង់ លើការតវ៉ាប្រឆាំងរដ្ឋាភិបាលដែលកំពុងកើនឡើង។

លោកបានសរសេរនៅលើបណ្តាញសង្គម Truth Social ថា «ប្រទេសណាមួយដែលធ្វើអាជីវកម្មជាមួយសាធារណរដ្ឋអ៊ីស្លាមអ៊ីរ៉ង់ នឹងត្រូវទទួលរងអត្រាពន្ធ ២៥% លើសកម្មភាពអាជីវកម្មទាំងអស់ជាមួយសហរដ្ឋអាមេរិក។ ក្រឹត្យនេះគឺជាសេចក្តីសម្រេចចុងក្រោយ និងចូលជាធរមានយ៉ាងម៉ឺងម៉ាត់»។

ក្នុងរយៈពេលប៉ុន្មានសប្តាហ៍ថ្មីៗនេះ ការតវ៉ាប្រឆាំងនឹងរដ្ឋាភិបាលអ៊ីរ៉ង់បានផ្ទុះឡើងចំពេលមានការគាបសង្កត់កាន់តែខ្លាំងឡើងដោយមេដឹកនាំប្រទេសប្រឆាំងនឹងក្រុមបាតុករ។ យោងតាមសកម្មជន គេប៉ាន់ប្រមាណថា យ៉ាងហោចណាស់មនុស្សជិត ៦០០ នាក់ត្រូវសម្លាប់ទាក់ទងនឹងការតវ៉ា ហើយមនុស្សប្រហែល ១០,៦០០នាក់កំពុងឃុំខ្លួននូវឡើយ។

នៅថ្ងៃដដែលនោះ គឺថ្ងៃទី១២ ខែមករា រដ្ឋមន្ត្រីការបរទេសអ៊ីរ៉ង់ លោក Abbas Araghchi បានប្រកាសថា ប្រទេសរបស់លោកបានត្រៀមខ្លួនរួចជាស្រេចសម្រាប់សង្គ្រាម ចំពេលមានរបាយការណ៍ថា លោកត្រាំកំពុងពិចារណាជម្រើសយោធាដើម្បីធ្វើអន្តរាគមន៍ ដើម្បីការពារក្រុមបាតុករនៅក្នុងប្រទេសអ៊ីរ៉ង់៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោក ត្រាំ អះអាងថា អ៊ីរ៉ង់ «ចង់ចរចា»