ពលរដ្ធ Greenland មិនទុកចិត្តចំពោះដំណោះស្រាយលោកត្រាំ

បន្ទាប់ពីដាក់សម្ពាធជាច្រើនសប្តាហ៍លើ Greenland ជុំវិញបំណងប្រាថ្នាក្នុងការដណ្តើមយកទឹកដីស្វយ័តនៃប្រទេសដាណឺម៉ាក ប្រធានាធិបតី ដូណាល់ត្រាំ បានប្រកាសកាលថ្ងៃទី ២១ខែមករាថា លោកឈានដល់កិច្ចព្រមព្រៀងក្របខ័ណ្ឌមួយដែលខ្លួនពេញចិត្តបំផុត ខណៈមនុស្សជាច្រើននៅរដ្ឋធានី Nuuk មានការសង្ស័យភ្លាមៗចំពោះសេចក្តីថ្លែងការណ៍របស់ប្រធានសេតវិមាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមកាសែតបារាំង france24 ពលរដ្ធជាច្រើនបានបង្ហាញការសង្ស័យថា ពួកគេមិនទុកចិត្តលោកត្រាំឡើយហើយដឹងថានេះគឺជាការកុហក។ អ្នកស្រុកជាច្រើននៅតែអះអាងដដែលៗថា កោះនេះគឺជាកម្មសិទ្ធិរបស់ប្រជាជន Greenland។ ជាងនេះទៀត បើតាមការស្ទង់មតិខែមករា ឆ្នាំ២០២៥ ប្រជាជនជាង ៨៥ ភាគរយប្រឆាំងនឹងការចូលរួមជាមួយអាមេរិក ដោយមានត្រឹមតែប្រាំមួយភាគរយប៉ុណ្ណោះដែលគាំទ្រ។

លោកប្រធានាធិបតីត្រាំបាននិយាយថា លទ្ធផលវិជ្ជមានត្រូវបានសម្រេចនៅពេលដែលបានជួបជាមួយលោក Mark Rutte អគ្គលេខាធិការអង្គការណាតូនៅខាងក្រៅកិច្ចប្រជុំប្រចាំឆ្នាំនៃវេទិកាសេដ្ឋកិច្ចពិភពលោកនៅទីក្រុង Davos ប្រទេសស្វីស។ ណាតូក៏បានបញ្ជាក់ផងដែរថា លោក Rutte មានកិច្ចប្រជុំ ប្រកបដោយផលិតភាពខ្ពស់ជាមួយត្រាំ។

យ៉ាងណាមិញ ភាគីទាំងពីរមិនបានផ្តល់ព័ត៌មានលម្អិតអំពីក្របខ័ណ្ឌនោះទេ ហើយចៀសវាងការលើកឡើងថា តើកិច្ចព្រមព្រៀងនេះនឹងមានន័យឲ្យសហរដ្ឋអាមេរិកនឹងគ្រប់គ្រងកោះអាកទិក ដែលលោកត្រាំបានទាមទារម្តងហើយម្តងទៀតឬអត់?

លោកស្រី Aaja Chenmitz ដែលជាអ្នកតាក់តែងច្បាប់ម្នាក់តំណាងឲ្យកោះនេះនៅក្នុងសភាដាណឺម៉ាកបានលើកឡើងថា «អង្គការណាតូគ្មានសិទ្ធិចរចាអ្វីទាំងអស់អំពីយើង។ វាជារឿងមិនសមហេតុផលសម្រាប់ណាតូ ក្នុងការចូលរួម និងមានសិទ្ធិនិយាយនៅក្នុងធនធានរ៉ែនៃប្រទេសដាណឺម៉ាក និង Greenland»។

មិនតែប៉ុណ្ណោះ នាយករដ្ឋមន្ត្រីកោះ Greenland លោក Jens-Frederik Nielsen បានប្រកាសនៅពាក់កណ្តាលខែមករាថា ទឹកដីស្វយ័តនេះនឹងជ្រើសរើសនៅតែជាផ្នែកមួយនៃប្រទេសដាណឺម៉ាក ជាជាងក្លាយជាផ្នែកមួយនៃសហរដ្ឋអាមេរិក៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ចិនបដិសេធជ្រៀតជ្រែក Greenland និងព្រមានអឺរ៉ុប កុំពឹងផ្អែកលើអាមេរិកពេក