ចំពេល អាមេរិក តានតឹងដាក់សម្ព័ន្ធមិត្ត ចិនបែរដាក់ខ្លួនជាដៃគូពាណិជ្ជកម្មរឹងមាំ

ក្នុងពេលដែលប្រធានាធិបតីអាមេរិក ដូណាល់ ត្រាំ ឡើងកាន់តំណែងកាលពីមួយឆ្នាំមុន អមជាមួយនឹងរបៀបវារៈ «អាមេរិកមុនគេ» កាលណោះមនុស្សជាច្រើនមើលឃើញបញ្ហាធំ ពោលគឺសេដ្ឋកិច្ចយឺតយ៉ាវក្នុងប្រទេសចិន។ ផ្ទុយទៅវិញ ទីក្រុងប៉េកាំងបែរជាបន្ធូរបន្ថយទំនាក់ទំនងដ៏ត្រជាក់ជាមួយដៃគូពាណិជ្ជកម្មផ្សេងទៀត ដើម្បីបង្ហោះអំពីអតិរេកពាណិជ្ជកម្ម។ នេះបើយោងតាមសារព័ត៌មាន Reuters ចុះផ្សាយកាលពីថ្ងៃទី២៨ ខែមករា ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយផ្អែកតាមអ្នកវិភាគបានលើកឡើងថា ក្នុងពេលដែលគោលនយោបាយរបស់លោកត្រាំ បានធ្វើឲ្យទំនាក់ទំនងជាមួយសម្ព័ន្ធមិត្តយូរអង្វែងអាមេរិកមានភាពតានតឹង ចិនបានងាកមកផ្តោតការយកចិត្តទុកដាក់របស់ខ្លួនទៅលើការពង្រឹងទំនាក់ទំនងជាមួយដៃគូសំខាន់ៗ រួមទាំងប្រទេសកាណាដា និងឥណ្ឌា។

ជាលទ្ធផល សេដ្ឋកិច្ចធំទីពីររបស់ពិភពលោកបានកត់ត្រាអតិរេកពាណិជ្ជកម្មកំណត់ត្រាចំនួន ១.២ ពាន់ពាន់លានដុល្លារអាមេរិក ក្នុងឆ្នាំ ២០២៥។ លំហូរចូលរូបិយប័ណ្ណបរទេសប្រចាំខែបានឈានដល់ ១០០ពាន់លានដុល្លារ ខ្ពស់បំផុតមិនធ្លាប់មាន ខណៈពេលដែលការប្រើប្រាស់រូបិយប័ណ្ណចិនជាសកល គឺប្រាក់យន់បានបន្តពង្រីកទៅមុខ។

មិនតែប៉ុណ្ណោះ នាយករដ្ឋមន្ត្រីអង់គ្លេស លោក Keir Starmer មកដល់ទឹកដីចិនកាលពីល្ងាចថ្ងៃពុធ ដោយមានក្ដីសង្ឃឹម នឹងធ្វើឲ្យទំនាក់ទំនងអាជីវកម្មដែលទើបតែមានភាពតានតឹងរស់ឡើងវិញ។ ទីក្រុងប៉េកាំងត្រូវគេរំពឹងថា នឹងពង្រីកឥទ្ធិពលនយោបាយ និងសេដ្ឋកិច្ចរបស់ខ្លួនបន្ថែមទៀត។

លោក Aleksandar Tomic សាស្ត្រាចារ្យផ្នែកសេដ្ឋកិច្ចនៅមហាវិទ្យាល័យ Boston បាននិយាយថា ដោយមានការគាំទ្រពីសេដ្ឋកិច្ចចំនួន ២០ ពាន់ពាន់លានដុល្លារអាមេរិក និងទីផ្សារភាគហ៊ុន និងមូលបត្របំណុលចំនួន ៤៥ពាន់ពាន់លានដុល្លារ ចិនកំពុងលេចចេញជា «ដៃគូស្ថិរភាព» សម្រាប់ប្រទេសជាច្រើន។

លោក Derrick Irwin សហប្រធានផ្នែកភាគហ៊ុនទីផ្សារ នៅ Allspring Global Investments ក៏បាននិយាយដែរថា «ខ្ញុំគិតថាប្រទេសចិនបានធ្វើការងារដ៏ល្អមួយក្នុងការដាក់ខ្លួនជាដៃគូពាណិជ្ជកម្មដែលអាចទុកចិត្តបាន និងមានស្ថិរភាពបំផុត»។

ចំណែកឯអ្នកវិភាគម្នាក់ទៀត គឺលោក Tomic មានប្រសាសន៍ថា ប្រទេសជាច្រើនដែលពីមុនមក មិនមានភាពរួសរាយរាក់ទាក់ជាមួយចិនទេ ឥឡូវនេះពួកគេកំពុងងាកទៅរកទីក្រុងប៉េកាំង ពីព្រោះអាមេរិកកំពុងក្លាយជាប្រទេសដែលមិនអាចទាយទុកជាមុនបានឡើយ។

ទោះជាយ៉ាងណា ចិនមិនមែនជាប្រទេសតែម្នាក់គត់ដែលស្វែងរកទំនាក់ទំនងពាណិជ្ជកម្មថ្មីដើម្បីកាត់បន្ថយហានិភ័យពីសហរដ្ឋអាមេរិកនោះទេ។ សូម្បីតែ ឥណ្ឌា និងសហភាពអឺរ៉ុបបានឈានដល់កិច្ចព្រមព្រៀងពាណិជ្ជកម្មដែលត្រូវបានពន្យារពេលជាយូរមកហើយកាលពីថ្ងៃអង្គារ នឹងកាត់បន្ថយពន្ធលើទំនិញភាគច្រើន ដែលអាចបង្កើនការនាំចេញរបស់អឺរ៉ុបទៅកាន់ប្រទេសឥណ្ឌាទ្វេដងនៅឆ្នាំ ២០៣២៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

នាយករដ្ឋមន្ត្រីអង់គ្លេស ទៅចិនផ្សះផ្សាភាពល្អក់កករ ទោះរងសម្ពាធពីអាមេរិកធ្ងន់ ក ក្ដី