ឥណ្ឌា ត្រៀមទទួលប្រព័ន្ធការពារដែនអាកាស S-400 ពី រុស្ស៊ី មិនខ្វល់ប្រទេសកំពុងរងគ្រោះដោយកូវីដ

ឯកអគ្គរដ្ឋទូតរុស្ស៊ីប្រចាំនៅឥណ្ឌា លោក Nikolay R. Kudashev បាននិយាយនៅថ្ងៃព្រហស្បតិ៍នេះថា កាលវិភាគនៃការដឹកជញ្ជូន ប្រព័ន្ធការពារដែនអាកាស S-400 ដែលរងចាំយ៉ាងយូរ នឹងមិនប៉ះពាល់ដល់ជំងឺរាតត្បាតកូវីដ ១៩ នោះទេ ។

លោកឯកអគ្គរដ្ឋទូតបាននិយាយថា ការដឹកជញ្ជូនលើកដំបូង នឹងត្រូវប្រគល់ឲ្យប្រទេសឥណ្ឌា នៅមុនដំណាច់ឆ្នាំនេះ ។

លោក Kudashev បានថ្លែងនៅក្នុងប្រព័ន្ធផ្សព្វផ្សាយ នាទីក្រុងញូវដែលីថា “យើងមិនឃើញមានការផ្លាស់ប្តូរ នៅក្នុងកិច្ចសន្យានេះនោះទេ ហើយថ្នាក់ដឹកនាំឥណ្ឌា បានបញ្ជាក់ពីការប្តេជ្ញាចិត្តរបស់ខ្លួន ចំពោះកិច្ចព្រមព្រៀងទាំងនេះ” ។

កាលពីដើមខែមេសា ឯកអគ្គរដ្ឋទូតឥណ្ឌាប្រចាំនៅប្រទេសរុស្ស៊ី លោក Bala Venkatesh Varma បានប្រកាសថា ស្ថានភាពការរីករាលដាល នៃជំងឺកូវីដ ១៩ បច្ចុប្បន្ននេះ នឹងមិនប៉ះពាល់ដល់កាលវិភាគ នៃការផ្គត់ផ្គង់ប្រព័ន្ធការពារមីស៊ីលដែនអាកាស S-400 របស់រុស្ស៊ីឡើយ ។

លោក Bala Venkatesh Varma បានកត់សម្គាល់ថា “មានការផ្លាស់ប្ដូរបន្តិចបន្តួច រយៈពេលពីរបីសប្តាហ៍ប៉ុណ្ណោះ ប៉ុន្តែរាល់កិច្ចសន្យាធំៗ នឹងត្រូវបានធ្វើតាមការគ្រោងទុក ។ យើងមិនរំពឹងថា នឹងមានបញ្ហាណាមួយកើតឡើងនោះទេ” ។

គួររំឭកថា ទីក្រុងមូស្គូ និងញូវដេលី បានចុះហត្ថលេខាលើកិច្ចសន្យា សម្រាប់ផ្គត់ផ្គង់ប្រព័ន្ធការពារមីស៊ីល S-400 នៅឆ្នាំ ២០១៨ ខណៈតម្លៃកិច្ចសន្យានេះ មានលើសពី ៥ ពាន់លានដុល្លារ ។

ទន្ទឹមនោះ ឥណ្ឌា ដែលបានស្នើទិញប្រព័ន្ធការពារដែនអាកាស S-400 ពីប្រទេសរុស្ស៊ី បានក្លាយជាបញ្ហាដ៏គួរឲ្យភ័យខ្លាចមួយ នៅក្នុងទំនាក់ទំនងទ្វេភាគីរបស់ក្រុងញូវដែលី ជាមួយក្រុងវ៉ាស៊ីនតោន ខណៈរដ្ឋបាលអាមេរិកជាបន្តបន្ទាប់ បានគំរាមដាក់ទណ្ឌកម្មសេដ្ឋកិច្ចលើប្រទេសឥណ្ឌា ប្រសិនបើឈានដល់កិច្ចព្រមព្រៀងនេះ ។ ទោះបីមានសម្ពាធពីអាមេរិកជាប់លាប់យ៉ាងណាក៏ដោយ ទីក្រុងញូវដេលីនៅតែប្រកាន់ខ្ជាប់នូវកិច្ចព្រមព្រៀងនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ទួរគីនឹងមិនងាកចេញពីការទិញប្រព័ន្ធមីស៊ីល S-400s របស់រុស្ស៊ី