សហរដ្ឋអាមេរិក ព្រមានពលរដ្ឋរបស់ខ្លួន កុំធ្វើដំណើរទៅ ចក្រភពអង់គ្លេស

សហរដ្ឋអាមេរិក បានព្រមានពលរដ្ឋរបស់ខ្លួន មិនឲ្យធ្វើដំណើរទៅចក្រភពអង់គ្លេស ដោយសារតែការកើនឡើងនៃករណីវីរុសបំប្លែងខ្លួន Delta។

មជ្ឈមណ្ឌលត្រួតពិនិត្យនិងបង្ការជំងឺ (CDC) បានចេញសេចក្តីណែនាំនេះ កាលពីថ្ងៃចន្ទ ដែលជាថ្ងៃ ប្រទេសអង់គ្លេស ដកច្បាប់បិទខ្ទប់របស់ខ្លួន ស្ទើរតែទាំងស្រុង។

ឥឡូវនេះ ចក្រភពអង់គ្លេស ស្ថិតនៅលើកំពូលគេនៃការណែនាំធ្វើដំណើររបស់សហរដ្ឋអាមេរិក ដែលព្រមានថា សូម្បីតែអ្នកដំណើរដែលទទួលវ៉ាក់សាំងពេញលេញ ក៏អាចមានគ្រោះថ្នាក់ដែរ។

វាជាការខកចិត្តមួយចំពោះក្តីសង្ឃឹមដែរថា ការធ្វើដំណើររវាងសហរដ្ឋអាមេរិកនិងអង់គ្លេស អាចបើកឡើងវិញនៅរដូវក្តៅនេះ។ ក្រុមការងារធ្វើដំណើររវាងប្រទេសទាំងពីរ ត្រូវបានបង្កើតឡើង ហើយបានប្រជុំគ្នាជារៀងរាល់សប្តាហ៍។

បច្ចុប្បន្ន ព្រំដែនអាមេរិកត្រូវបានបិទសម្រាប់ប្រជាជនមកពីចក្រភពអង់គ្លេស លើកលែងតែពួកគេមានសញ្ជាតិអាមេរិក។ ចក្រភពអង់គ្លេស បានដាក់សហរដ្ឋអាមេរិកនៅក្នុងបញ្ជីពណ៌លឿងរបស់ខ្លួន ដែលមានន័យថា អ្នកដំណើរអាចមកទីនេះ ហើយមិនចាំបាច់ធ្វើចត្តាឡីស័កទេ ប្រសិនបើពួកគេចាក់វ៉ាក់សាំងគ្រប់ដូស៕

ប្រែសម្រួល៖ Vann Vann

ប្រភព៖ BBC

ចុចអាន៖ Delta វាយលុកខ្លាំងនៅអាមេរិក មួយថ្ងៃ ឆ្លងជាង ៣ម៉ឺននាក់