ប្រធានាធិបតីអាហ្វហ្គានីស្ថាន ភៀសខ្លួនទៅក្រៅប្រទេស បន្សល់ទុកពាក្យប៉ុន្មានម៉ាត់ ប្រាប់ប្រជាជន

ក្រុមតាលីបង់បានប្រកាសថា សង្គ្រាមនៅក្នុងប្រទេសអាហ្វហ្គានីស្ថាន បានបញ្ចប់ហើយ បន្ទាប់ពីក្រុមបះបោរនេះ កាន់កាប់វិមានប្រធានាធិបតីទីក្រុងកាប៊ុល ខណៈកងកម្លាំងដឹកនាំដោយអាមេរិកបានចាកចេញ ហើយបណ្តាប្រទេសលោកខាងលិច ស្វះស្វែងជម្លៀសពលរដ្ឋរបស់ពួកគេនៅថ្ងៃចន្ទទី១៦ខែសីហានេះ។

លោកប្រធានាធិបតី Ashraf Ghani បានភៀសខ្លួនចេញពីប្រទេសកាលពីថ្ងៃអាទិត្យ ខណៈដែលក្រុមសកម្មប្រយុទ្ធឥស្លាមនិយម ចូលដល់រដ្ឋធានី។ 

លោកនិយាយថា លោកចង់បញ្ចៀសការបង្ហូរឈាម ស្របពេលប្រជាជនអាហ្វហ្គានីស្ថានរាប់រយនាក់ អស់សង្ឃឹមក្នុងការចាកចេញពីអាកាសយានដ្ឋានទីក្រុងកាប៊ុល។

លោក Mohammad Naeem អ្នកនាំពាក្យការិយាល័យនយោបាយរបស់ក្រុមតាលីបង់ បានប្រាប់ទូរទស្សន៍ Al Jazeera ថា “ថ្ងៃនេះគឺជាថ្ងៃដ៏អស្ចារ្យមួយសម្រាប់ប្រជាជនអាហ្វហ្គានីស្ថាន និងកងទ័ពឥស្លាម។ ពួកគេជាសាក្សីនៃផ្លែផ្កា បានមកពីកិច្ចខិតខំប្រឹងប្រែងនិងការលះបង់របស់ពួកគេអស់រយៈពេល ២០ ឆ្នាំមកនេះ។ អរគុណព្រះជាម្ចាស់ សង្គ្រាមបានបញ្ចប់នៅក្នុងប្រទេសនេះហើយ”។

លោក Naeem បាននិយាយថា ប្រភេទនិងទម្រង់នៃរបបថ្មីក្នុងប្រទេសអាហ្វហ្គានីស្ថាន នឹងត្រូវបញ្ជាក់ក្នុងពេលឆាប់ៗ។ លោកបន្ថែមថា ក្រុមតាលីបង់ មិនចង់រស់នៅឯកោទេ និងសូមអំពាវនាវឲ្យមានទំនាក់ទំនងអន្តរជាតិប្រកបដោយសន្តិភាព៕

ប្រែសម្រួល៖ Vann Vann

ប្រភព៖ CNA

ចុចអាន៖ ឥឡូវនេះ តាលីបង់ អះ អាង ជោគ ជ័យ លើ អាហ្វហ្គានីស្ថាន តើពួក គេ ជា នរណា?