វីរុសបំប្លែងខ្លួន Omicron កំពុងធ្វើឲ្យប្រសិទ្ធភាពវ៉ាក់សាំងកូវីដធ្លាក់ចុះ

នាយកប្រតិបត្តិក្រុមហ៊ុនឱសថ Moderna លោក Stephane Bancel បាននិយាយថា ប្រសិទ្ធភាពនៃវ៉ាក់សាំងការពារកូវីដនឹងថយចុះយ៉ាងខ្លាំង ដោយសារការលេចឡើងនៃវីរុសបំប្លែងខ្លួនថ្មី Omicron ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Bancel បាននិយាយនៅក្នុងបទសម្ភាសន៍ជាមួយកាសែត Financial Times ដែលបានចេញផ្សាយនៅថ្ងៃអង្គារនេះថា “ខ្ញុំគិតថា វ៉ាក់សាំងនឹងធ្លាក់ចុះប្រសិទ្ធភាពរបស់វា ។ ខ្ញុំមិនដឹងថាប៉ុន្មានភាគរយនោះទេ ព្រោះយើងត្រូវរង់ចាំទិន្នន័យសិន ។ ប៉ុន្តែអ្នកវិទ្យាសាស្ត្រទាំងអស់ដែលខ្ញុំបាននិយាយជាមួយគឺគិតដូច្នេះ” ។

យោងតាមប្រធានក្រុមហ៊ុន Moderna រូបនេះបានឲ្យដឹងថា ចំនួនដ៏ច្រើននៃការវិវត្តប្រូតេអ៊ីនរបស់វីរុស រួមជាមួយនឹងការរីករាលដាលយ៉ាងឆាប់រហ័សនៃវីរុសបំប្លែងខ្លួននៅអាហ្រ្វិកខាងត្បូង អាចធានាការកែប្រែសម្រាប់យុទ្ធនាការចាក់វ៉ាក់សាំងបច្ចុប្បន្ននៅឆ្នាំក្រោយ ។

លោក Bancel បានបន្ថែមថា អ្នកជំនាញភាគច្រើនមិនរំពឹងថានឹងមានការប្រែប្រួលខ្លាំងបែបនេះសម្រាប់រយៈពេល ១ ឆ្នាំ ឬ ២ ឆ្នាំនោះទេ ហើយអ្នកវិទ្យាសាស្ត្រមានការព្រួយបារម្ភអំពីការវិវត្តរហូតដល់ ៣២ ដងរបស់វីរុស Omicron ។

គួរបញ្ជាក់ថា កាលពីសប្តាហ៍មុន អង្គការសុខភាពពិភពលោក (WHO) បានកំណត់អត្តសញ្ញាណវីរុសបំប្លែងខ្លួនថ្មី Omicron ថាជា ការព្រួយបារម្ភមួយ ដោយសារចំនួននៃការបំប្លែងដ៏ខ្ពស់របស់វាអាចធ្វើឲ្យវីរុសនេះចម្លងកាន់តែរហ័ស និងកាន់តែគ្រោះថ្នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ដឹងអត់ វីរុសកូវីដបំប្លែងខ្លួនថ្មី Omicron ស្ថិតនៅលេខរៀងទីប៉ុន្មាន ក្នុងតួអក្សរក្រិក?