ខែក្រោយ ក្រុមហ៊ុនអាមេរិក ផលិតវ៉ាក់សាំងពិសេស ប្រយុទ្ធជាមួយ Omicron

ក្រុមហ៊ុន Novavax របស់សហរដ្ឋអាមេរិក បាននិយាយកាលពីថ្ងៃព្រហស្បតិ៍ទី២ខែធ្នូថា ខ្លួនអាចចាប់ផ្តើមការផលិតវ៉ាក់សាំងកូវីដ ដែលតម្រូវពិសេសសម្រាប់វីរុសបំប្លែងខ្លួន Omicron នៅក្នុងខែមករាឆ្នាំក្រោយនេះ ខណៈក្រុមហ៊ុនកំពុងសាកល្បងថា តើវ៉ាក់សាំងបច្ចុប្បន្នរបស់ខ្លួនមានប្រសិទ្ធភាពឬដែរក៏អត់។

យោងតាមក្រុមហ៊ុន, ទិន្នន័យមន្ទីរពិសោធន៍ដែលគេរំពឹងថានឹងចេញក្នុងរយៈពេលប៉ុន្មានសប្តាហ៍ខាងមុខ នឹងបង្ហាញថាតើអង្គបដិប្រាណពីបុគ្គលដែលបានទទួលការចាក់វ៉ាក់សាំងបង្ការជំងឺកូវីដ១៩របស់ក្រុមហ៊ុន Novavax ពីមុន អាចយកឈ្នះវីរុសបំប្លែងខ្លួននេះបានដែរឬទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Novavax ក៏បាននិយាយផងដែរថា ខ្លួនបានចាប់ផ្តើមបង្កើតអង់ទីគ័រសរសៃប្រូតេអ៊ីនផ្តោតសំខាន់លើវីរុស Omicron ហើយនឹងចាប់ផ្តើមការធ្វើតេស្តមន្ទីរពិសោធន៍នៃវ៉ាក់សាំងថ្មី ដើម្បីកំណត់គោលដៅលើវីរុសបំប្លែងខ្លួនក្នុងរយៈពេលពីរបីសប្តាហ៍ខាងមុខ។

វីរុសកូវីដ១៩បំប្លែងខ្លួន Omicron បានអង្រួនពិភពលោក និងបង្កភាពភ័យខ្លាចជាសកលជុំវិញការព្រួយបារម្ភថា តើវាអាចគេចផុតពីការការពារដែលផ្តល់ដោយវ៉ាក់សាំង ដែលត្រូវបានគេប្រើប្រាស់យ៉ាងទូលំទូលាយ និងអូសបន្លាយវិបត្តិសុខភាពសាធារណៈដែរឬក៏អត់។

ក្រុមហ៊ុនផលិតវ៉ាក់សាំងផ្សេងទៀត រួមទាំង Moderna និង Pfizer ក៏បានចាប់ផ្តើមធ្វើការលើថ្នាំបង្ការដែលតម្រូវជាពិសេសចំពោះវីរុសកូវីដបំប្លែងខ្លួន Omicron ផងដែរ។

គួរបញ្ជាក់ថា វ៉ាក់សាំងកូវីដរបស់ក្រុមហ៊ុន Novavax បានទទួលការយល់ព្រមលើការប្រើប្រាស់ជាបន្ទាន់លើកដំបូង នៅក្នុងប្រទេសឥណ្ឌូណេស៊ីកាលពីដើមខែវិច្ឆិកា បន្ទាប់មកគឺហ្វីលីពីន៕

ប្រែសម្រួល៖ Vann Vann

ប្រភព៖ CNA

ចុចអាន៖ Omicron ចូលដល់ឥណ្ឌា ធ្វើឲ្យពិភពលោកបារម្ភខ្លាំង ខ្លាចស្ថានភាពដូចលើកមុន