ព័ត៌មានអន្ដរជាតិ

អ្នកជំនាញ ថៃ ប្រាប់វិជ្ជាគុនការពារ Omicron ថ្ងៃឆ្លងឆ្នាំ ជាពិសេសពាក់ម៉ាស ២ ជាន់

បានផុស

២ years មុន

នៅ

ថ្ងៃពុធ ២៩ ធ្នូ ២០២១

ដោយ

សាស្ត្រាចារ្យមហាវិទ្យាល័យវេជ្ជសាស្ត្រ Chulalongkorn លោក Thira Woratanarat បានសរសេរនៅលើហ្វេសប៊ុកកាលពីថ្ងៃអង្គារថា សប្តាហ៍ចុងក្រោយមុនចូលឆ្នាំសកលនឹងក្លាយជាសូចនាករនៃភាពធ្ងន់ធ្ងរចំពោះការផ្ទុះឡើងវីរុសកូវីដបំប្លែងខ្លួន Omicron នៅក្នុងប្រទេសថៃ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយនឹងរដូវកាលវិស្សមកាលដ៏ធំបំផុតប្រចាំឆ្នាំបានមកដល់ លោក Thira បានជំរុញឲ្យប្រជាជនប្រារព្ធពិធីចូលឆ្នាំថ្មីជាមួយនឹងការប្រុងប្រយ័ត្នបន្ថែមក្នុងគោលបំណងដើម្បីរក្សាជំងឺរាតត្បាតកុំឲ្យរីករាលដាលម្តងទៀត ។

លោកបាននិយាយថា គួរតែពាក់ម៉ាស ២ ជាន់គ្រប់ពេលវេលា ។ ១ គឺម៉ាសពេទ្យ និង ២ គឺម៉ាសក្រណាត់ ហើយមនុស្សម្នាក់ៗត្រូវអនុវត្តយ៉ាងតឹងរឹងនូវច្បាប់រក្សាគម្លាតសង្គមយ៉ាងហោចណាស់ ១ ម៉ែត្រ ។

លោកក៏បាននិយាយដែរថា ការធ្វើដំណើរសាធារណៈ និងការជួបជុំជាក្រុមគួរត្រូវបានចៀសវាង ហើយការប្រារព្ធពិធីចូលឆ្នាំថ្មី គួរតែធ្វើឡើងតែក្នុងលក្ខណៈគ្រួសារប៉ុណ្ណោះ ជាមួយនឹងអាហារ និងឧបករណ៍ប្រើប្រាស់ដាច់ដោយឡែក ។

ទន្ទឹមនោះ លោក Thira ក៏បានជំរុញអ្នកដែលមានរោគសញ្ញាកូវីដមកធ្វើតេស្តជាបន្ទាន់ ។ លោកបានចង្អុលបង្ហាញថា អ្វីដែលសំខាន់នោះគឺការបន្តចាក់វ៉ាក់សាំងដូសជំរុញ ឬដូសទី ៣ ព្រោះវាជាកត្តាសំខាន់ក្នុងការកាត់បន្ថយភាពធ្ងន់ធ្ងរ និងការរីករាលដាលនៃ Omicron ៕