Omicron អុកឡុក ថៃ​ ឲ្យឈាន​ដល់​រលកឆ្លងកូវីដ​ទី ​៥

ប្រធាននាយកដ្ឋានសេវាវេជ្ជសាស្រ្ត លោកវេជ្ជបណ្ឌិត Somsak Ankasil បានឲ្យដឹងថា ប្រទេសថៃបានឈានចូលរលកឆ្លងកូវីដទី ៥ ជាផ្លូវការហើយ ជាមួយនឹងករណីឆ្លងប្រចាំថ្ងៃកាន់តែកើនឡើងតាមការព្យាករណ៍ ។

នាយកដ្ឋានគ្រប់គ្រងជំងឺបានប៉ាន់ប្រមាណថា រលកចុងក្រោយអាចឃើញករណីឆ្លងថ្មីដែលបំបែកកំណត់ត្រាចំនួន ៣០,០០០ ក្នុងមួយថ្ងៃ ពោលនៅក្នុងសេណារីយ៉ូដ៏អាក្រក់បំផុត ។

លោក Somsak បានព្យាករណ៍ពីអត្រាឆ្លងខ្ពស់នេះគឺស្ថិតក្នុងចំណោមកុមារដែលភាគច្រើនមិនបានចាក់វ៉ាក់សាំង ។ លោកបានបន្ថែមថា ទោះជាយ៉ាងណាក៏ដោយ កុមារដែលឆ្លងមេរោគភាគច្រើនមិនមានរោគសញ្ញាធ្ងន់ធ្ងរនោះទេ លុះត្រាតែពួកគេមានជំងឺប្រចាំកាយ ។

ទន្ទឹមនោះវាក៏កើតឡើង ស្របពេលដែលប្រទេសថៃមានករណីឆ្លងវីរុសបំប្លែងខ្លួន Omicron ដែលកំពុងគ្របដណ្ដប់លើសមត្ថភាពមន្ទីរពេទ្យដែលមានគ្រែចំនួន ៥២,៣០០ នៅទូទាំងប្រទេស និង ២៥,៨២៨ នៅទីក្រុងបាងកក ។

ស្របពេលជាមួយគ្នានេះ រដ្ឋបាលក្រុងបាងកក (BMA) ក៏កំពុងរៀបចំគ្រែចល័តក្នុងសហគមន៍សម្រាប់កុមារ និងគ្រួសារនៅក្នុងតំបន់ចំនួន ៦ ដោយមានគ្រែយ៉ាងហោចណាស់ ៥០ ក្នុងមួយកន្លែង ។

ជាចុងក្រោយលោក Somsak ក៏បានអំពាវនាវឲ្យវិទ្យាស្ថានសុខភាពកុមារជាតិ Queen Sirikit រៀបចំស្តុកថ្នាំប្រឆាំងមេរោគ Favipiravir ដើម្បីព្យាបាលកុមារនៅទូទាំងប្រទេសផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation

ចុចអាន ៖ អតីតនាយករដ្ឋមន្ត្រីថៃ ថាក់ស៊ីន គ្រោងមកប្រទេសវិញឆ្នាំនេះ ជាមួយគោលបំណងធំៗចំនួន ៤