រុស្ស៊ី ព្រមដកទ័ពចេញតាមសំណើរបស់ បារាំង

ការិយាល័យប្រធានាធិបតីបារាំងបាននិយាយថា រុស្ស៊ីនឹងដកទ័ពចេញពីប្រទេសបេឡារុស បន្ទាប់ពីសមយុទ្ធយោធារួមគ្នាដែលគ្រោងនឹងចាប់ផ្តើមនៅថ្ងៃព្រហស្បតិ៍ខាងមុខនេះ ។

ការិយាល័យបាននិយាយថា ប្រធានាធិបតីរុស្ស៊ីលោក Vladimir Putin បានយល់ព្រមលើការដកទ័ពចេញពីប្រទេសបេឡារុស តាមសំណើជាមួយប្រធានាធិបតីបារាំង Emmanuel Macron ក្នុងអំឡុងកិច្ចពិភាក្សារបស់មេដឹកនាំទាំងពីរកាលពីថ្ងៃចន្ទ ។

កន្លងមកប្រទេសលោកខាងលិចបានរិះគន់សមយុទ្ធដែលបានគ្រោងទុកនេះ ហើយពួកគេ​បាននិយាយ​ថា វា​អាច​បញ្ឆេះ​ក្តីបារម្ភ​ជុំវិញ​សកម្មភាពយោធាណាមួយរបស់រុស្ស៊ី​ដែល​អាច​កើត​ឡើង​លើ​អ៊ុយក្រែន នៅតាម​ព្រំដែន​ជាប់​ទាំង​រុស្ស៊ី និង​បេឡារុស ស្របពេលដែលរុស្ស៊ីក៏កំពុង​ប្រមូល​ទ័ព​នៅ​ព្រំដែន​ជាមួយ​អ៊ុយក្រែន ។

ក្នុងអំឡុងកិច្ចពិភាក្សានោះលោក Macron និងលោក Putin ក៏ត្រូវបានគេរាយការណ៍ថា បានព្រមព្រៀងគ្នាក្នុងការបដិសេធពីសកម្មភាពយោធាណាមួយក្នុងគោលបំណងកាត់បន្ថយភាពតានតឹងលើអ៊ុយក្រែន ។

ទន្ទឹមនឹងនោះ លោក Putin តាមសេចក្តីរាយការណ៍បានអះអាងជាថ្មីថា លោកនឹងមិនធ្វើសម្បទានលើតម្រូវការសន្តិសុខរុស្ស៊ី ដែលលោកថាស្របច្បាប់នោះទេ ហើយលោកក៏កំពុង​ជំរុញ​កុំ​ឲ្យ​ណាតូ​​ពង្រីកសកម្មភាពរបស់ខ្លួន​បន្ថែម​ទៀតផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ Putin ព្រមានថា អឺរ៉ុបនឹងធ្លាក់ក្នុងជម្លោះយោធា បើអ៊ុយក្រែន ចូល​ ណាតូ