អ៊ុយក្រែន ដាក់ក្ដីសង្ឃឹមលើ អាមេរិក ជួយបន្ថយភាពតានតឹងជាមួយ រុស្ស៊ី

ប្រធានាធិបតីអ៊ុយក្រែនលោក Volodymyr Zelenskyy បានអញ្ជើញប្រធានាធិបតីអាមេរិកលោក Joe Biden មកបំពេញទស្សនកិច្ចនៅទីក្រុង Kyiv នៅប៉ុន្មានថ្ងៃខាងមុខ ហើយបាននិយាយថា ដំណើរទស្សនកិច្ចនេះអាចជួយបន្ធូរបន្ថយភាពតានតឹងរវាងរុស្ស៊ី និងអ៊ុយក្រែន ។

ការិយាល័យប្រធានាធិបតីបាននិយាយថា លោក Zelenskyy ក៏បានថ្លែងអំណរគុណដល់លោក Biden សម្រាប់ការគាំទ្ររបស់លោក ហើយបានអញ្ជើញគាត់ឲ្យទៅបំពេញទស្សនកិច្ចនៅអ៊ុយក្រែន ក្នុងអំឡុងពេលសន្ទនាតាមទូរស័ព្ទកាលពីថ្ងៃអាទិត្យ ។

លោក Zelenskyy បាននិយាយថា “ខ្ញុំជឿជាក់ថា ការមកដល់របស់អ្នកនៅទីក្រុង Kyiv ក្នុងពេលប៉ុន្មានថ្ងៃខាងមុខ ជាកត្តាសំខាន់សម្រាប់ស្ថេរភាពនៃស្ថានការណ៍បច្ចុប្បន្ន ហើយនឹងក្លាយជាសញ្ញាដ៏មានអានុភាព និងរួមចំណែកដល់ការកាត់បន្ថយការកើនឡើងភាពតានតឹងនេះ” ។

សេចក្តីថ្លែងការណ៍បាននិយាយទៀតថា លោក Zelenskyy ក៏បានប្រាប់លោក Biden ដែរថា វាមានសារៈសំខាន់សម្រាប់ទីក្រុង Kiev ក្នុងការទទួលបានការធានាសន្តិសុខពីទីក្រុងវ៉ាស៊ីនតោន ។

យោងតាមសេចក្តីថ្លែងការណ៍របស់សេតវិមានបានឲ្យដឹងថា មេដឹកនាំទាំងពីរបានយល់ព្រមបន្តកិច្ចខិតខំប្រឹងប្រែងការទូតដើម្បីដោះស្រាយវិបត្តិបច្ចុប្បន្នជុំវិញអ៊ុយក្រែន ​។

គួរបញ្ជាក់ថា លោក Biden និង Zelenskyy បានពិភាក្សាគ្នាតាមទូរស័ព្ទកាលពីថ្ងៃអាទិត្យក្នុងរយៈពេលតិចជាងមួយម៉ោង ហើយនេះ​ជាការ​សន្ទនា​តាម​ទូរស័ព្ទ​លើក​ទី​ ៣ ហើយ​រវាង​ប្រធានាធិបតីទាំងពីរ ​តាំងពី​ដើមឆ្នាំ​ ២០២២​ មក ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ បែកធ្លាយផែនការសម្ងាត់! រុស្ស៊ី នឹងវាយចូល អ៊ុយក្រែន នៅថ្ងៃពុធនេះ រួមទាំងទម្លាក់គ្រាប់បែកផងដែរ