លោក Macron៖ ពិភពលោកមិនមែនធ្វើសង្គ្រាមជាមួយរុស្ស៊ីទេ តែជាមួយ Putin

ប្រធានាធិបតីបារាំង លោក Emmanuel Macron កាលពីយប់ថ្ងៃទី២ខែមីនា បានទទូចថា ពិភពលោកមិនស្ថិតក្នុងសង្រ្គាមជាមួយរុស្ស៊ី ឬប្រជាជនរបស់រុស្ស៊ីទេ ប៉ុន្តែជាមួយលោក Vladimir Putin ប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅ​ក្នុង​សុន្ទរកថា​ថ្នាក់​ជាតិ​កាល​ពីយប់​ថ្ងៃ​ពុធ ប្រមុខ​រដ្ឋ​រូបនេះបាន​ថ្លែងអំពី​ជម្លោះ​ដែល​កំពុង​កើត​ឡើង​ក្នុង​ប្រទេស​អ៊ុយក្រែន។

លោក Macron និយាយថា “មិនមានកងទ័ព ឬមូលដ្ឋានទ័ពណាតូនៅក្នុងអ៊ុយក្រែនទេ ហើយរុស្ស៊ីក៏មិនត្រូវបានវាយប្រហារដែរ ខណៈទីក្រុងជាច្រើនក្នុងប្រទេសអ៊ុយក្រែនកំពុងរងការវាយប្រហារយ៉ាងឃោរឃៅ”។

ដោយហៅប្រធានាធិបតីរុស្ស៊ី លោក Vladimir Putin ថាជា “អ្នកលុកលុយ” នៅពេលឈរមុខទង់ជាតិប្រទេសបារាំង អ៊ុយក្រែន និងសហភាពអឺរ៉ុប, លោក Macron បាននិយាយថា “សង្រ្គាមនេះគឺជាផ្លែផ្កានៃស្មារតីសងសឹក ដែលកើតចេញពីប្រវត្តិសាស្រ្តច្រំដែលរបស់ អឺរ៉ុប។ កងកម្លាំងរុស្ស៊ីកំពុងឡោមព័ទ្ធទីក្រុងសំខាន់ៗរបស់អ៊ុយក្រែន។ ថ្ងៃ​ទៅ​មុខ ​ប្រហែល​ជា​កាន់​តែ​ពិបាក​ទៅ​ទៀត។ ជនភៀសខ្លួនរាប់សែននាក់ កំពុងភៀសខ្លួនទៅកាន់ប្រទេសជិតខាង”។

លោក Macron បានជួបប្រជុំជាច្រើនលើកជាមួយលោក Putin រួមទាំងកិច្ចប្រជុំមួយនៅទីក្រុងមូស្គូផងដែរ មុនពេលរុស្ស៊ីវាយលុកអ៊ុយក្រែន កាលពីថ្ងៃព្រហស្បតិ៍សប្តាហ៍មុន។

ដោយសំដៅទៅលើមេដឹកនាំអ៊ុយក្រែន លោក Macron បានលើកឡើងថា “ខ្ញុំបានប្រាប់ទៅកាន់លោកប្រធានាធិបតី Volodymyr Zelensky អំពីការគាំទ្រជាបងប្អូនរបស់ប្រទេសបារាំង”។

“នៅរសៀលថ្ងៃនេះ មហាសន្និបាតអង្គការសហប្រជាជាតិបានថ្កោលទោស នៅក្នុងការបោះឆ្នោតដ៏លើសលប់ ចំពោះការវាយលុកនេះ។ ដូច្នេះ សហគមន៍អន្តរជាតិបានបង្ហាញពីការរួបរួមរបស់ខ្លួនហើយ”៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ រុស្ស៊ី វាយដណ្តើមបានទីក្រុងសំខាន់លើកដំបូង ចាប់តាំងពីលុកលុយអ៊ុយក្រែន