អាមេរិក កំពុងធ្វើការជាមួយ ប៉ូឡូញ ដើម្បីបញ្ជូនយន្តហោះចម្បាំងទៅ អ៊ុយក្រែន

អ្នកនាំពាក្យសេតវិមានបានបញ្ជាក់ថា សហរដ្ឋអាមេរិកកំពុងធ្វើការជាមួយប្រទេសប៉ូឡូញ លើលទ្ធភាពដែលប៉ូឡូញ អាចផ្តល់យន្តហោះចម្បាំងដល់អ៊ុយក្រែន រួមជាមួយនឹងការប្រឹក្សាជាមួយសម្ព័ន្ធមិត្តផ្សេងទៀត ខណៈប្រធានាធិបតីអ៊ុយក្រែនលោក Zelensky កំពុងជំរុញឲ្យបណ្តាប្រទេសនៅអឺរ៉ុបខាងកើត បញ្ជូនយន្តហោះចម្បាំងចូលប្រទេសរបស់គាត់។

ជាផ្នែកមួយនៃការសន្ទនាជាមួយប្រទេសប៉ូឡូញ សហរដ្ឋអាមេរិកកំពុងពិនិត្យថាតើខ្លួនមានសមត្ថភាពប៉ុនណា ដើម្បីបំពេញបន្ថែមដល់ប្រទេសប៉ូឡូញ ប្រសិនបើខ្លួនសម្រេចចិត្តផ្ទេរយន្តហោះទៅអ៊ុយក្រែន។ នេះបើតាមការអះអាងពីអ្នកនាំពាក្យសេតវិមាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យនិយាយថា ការបញ្ជូនយន្តហោះចម្បាំងទៅកាន់អ៊ុយក្រែន គឺជាការសម្រេចចិត្តអធិបតេយ្យសម្រាប់ប្រទេសណាមួយ ហើយបានកត់សម្គាល់ថា មានការដឹកជញ្ជូនជាច្រើនទៀតដែលត្រូវធ្វើ រួមទាំងរបៀបដែលយន្តហោះនឹងត្រូវផ្ទេរពីប៉ូឡូញទៅអ៊ុយក្រែនផងដែរ។

សមាជិកសភាពីររូបដែលចូលរួមក្នុងកិច្ចពិភាក្សាតាម Zoom ជាមួយប្រធានាធិបតីអ៊ុយក្រែនកាលពីថ្ងៃសៅរ៍ទី០៥ខែមីនាបានឲ្យដឹងថា លោក Zelensky និយាយថា ប៉ូឡូញបានផ្តល់សញ្ញាថា ខ្លួនបានរៀបចំដើម្បីបញ្ជូនយន្តហោះចម្បាំងធុន MiG រួចហើយប៉ុន្តែ ពួកគេរង់ចាំតែ សហរដ្ឋអាមេរិក បើភ្លើងខៀវប៉ុណ្ណោះ៕

ប្រែសម្រួល៖ Vann Vann

ប្រភព៖ CNN

ចុចអាន៖ លោក Zelensky ជំរុញឲ្យប្រជាជននៅតំបន់ផ្តាច់ខ្លួន ចេញប្រយុទ្ធ