ចេញពី កម្ពុជា រដ្ឋមន្ត្រីការបរទេស អារ៉ាប៊ីសាអូឌីត យាងទៅប្រទេសក្បែរ ខាងមួយនេះទៀត

ប្រភពព័ត៌មានបានឲ្យដឹងថា រដ្ឋមន្ត្រីការបរទេសអារ៉ាប៊ីសាអូឌីតបានមកបំពេញទស្សនកិច្ចជាផ្លូវការនៅប្រទេសឡាវដើម្បីគាំទ្រប្រទេសឡាវក្នុងការអភិវឌ្ឍន៍ធនធានមនុស្ស លទ្ធភាពទទួលបានមូលនិធិ និងទិញផលិតផលកសិកម្ម បន្ទាប់ពីបញ្ចប់ព្រះរាជដំណើរទស្សនកិច្ចនៅព្រះរាជាណាចក្រកម្ពុជា ។

កាលពីថ្ងៃទី១៨ ខែមីនា ឆ្នាំ២០២២ ព្រះអង្គម្ចាស់ Faisal Bin Farhan Al Saud រដ្ឋមន្ត្រីក្រសួងការបរទេសអារ៉ាប៊ីសាអូឌីត បានយាងធ្វើដំណើរ​ទស្សនកិច្ច​ផ្លូវការ​នៅ​ប្រទេស​ឡាវ តបតាមការអញ្ជើញរបស់លោក សាឡឺមសៃ កុមម៉ាស៊ីត រដ្ឋមន្ត្រីក្រសួងការបរទេសឡាវ ដើម្បីពង្រឹងទំនាក់ទំនងរវាងប្រទេសទាំងពីរ ។

ភាគីទាំងពីរបានជួបពិភាក្សាគ្នាអំពីការជំរុញកិច្ចសហប្រតិបត្តិការពាណិជ្ជកម្ម ការវិនិយោគទៅវិញទៅមកក្នុងវិស័យថាមពល, រ៉ែ, កសិកម្ម, ពលកម្ម, វប្បធម៌, ទេសចរណ៍, និងការអប់រំ ព្រមទាំងបានផ្លាស់ប្តូរទស្សនៈគ្នាទៅវិញទៅមកលើស្ថានការណ៍ផ្សេងៗ ទាំងក្នុងតំបន់ និងអន្តរជាតិ ។

ទន្ទឹមនោះ ភាគីឡាវបានស្នើឲ្យអារ៉ាប៊ីសាអូឌីតជួយអភិវឌ្ឍធនធានមនុស្ស ដូចជាការផ្តល់អាហារូបករណ៍ភាសាអារ៉ាប់ដល់មន្ត្រីការទូតឡាវ ការទទួលបានដើមទុនក្នុងឧស្សាហកម្មដែលឡាវមានសក្តានុពលខ្លាំង ជាពិសេសក្នុងវិស័យកសិកម្មស្អាត ក៏ដូចជាការនាំចេញកសិផលពីប្រទេសឡាវទៅកាន់អារ៉ាប៊ីសាអូឌីត ដើម្បីឲ្យប្រទេសឡាវសម្រេចបាននូវគោលដៅអភិវឌ្ឍន៍ប្រកបដោយចីរភាព ហើយងើប​ផុត​ពី​ប្រទេសដែល​មាន​ការ​អភិវឌ្ឍ​តិចតួច ។

ស្របពេលជាមួយគ្នា ព្រះអង្គម្ចាស់ Faisal Bin បានយល់ស្រប​ថា នឹងឲ្យក្រុមការងារ​ដែលពាក់ព័ន្ធ​​ធ្វើការ​រួម​គ្នា ​ដើម្បី​ធ្វើយ៉ាងណាឲ្យ​សំណើ​របស់​ឡាវ​ក្លាយ​ជាសញ្ញាវិជ្ជមាន ។

ក្នុងជំនួបនេះដែរ រដ្ឋមន្ត្រីក្រសួងការបរទេសឡាវ បានសម្តែងការអបអរសាទរចំពោះសមិទ្ធិផលរបស់ប្រទេសអារ៉ាប៊ីសាអូឌីត ក្នុងការធ្វើជាម្ចាស់ផ្ទះនៃកិច្ចប្រជុំកំពូលឈូងសមុទ្រលើកទី៤២ ក្នុងឆ្នាំ២០២១ ព្រមទាំងបានថ្លែងអំណរគុណដល់អារ៉ាប៊ីសាអូឌីតដែលបានជួយឡាវក្នុងវិស័យផ្សេងៗក្នុង​អតីតកាល និងសង្ឃឹមថា ប្រទេសទាំងពីរនឹងបន្តគាំទ្រគ្នាទៅវិញទៅមកនាពេលអនាគត ៕

ប្រែសម្រួលដោយ ៖ សំអាន

ប្រភព ៖ MGR Online

ចុចអាន ៖ ឧបនាយករដ្ឋមន្ត្រី​ ប្រាក់ សុខុន ទទួល​យកការ​អញ្ជើញ ដើម្បី​បំពេញ​ទស្សន​កិច្ច​នៅ​ អារ៉ាប៊ីសាអូឌីត​ នាពេលខាងមុខ