ប្រទេស EU ទី១ ដឹកសព្វាវុធវាយលុក តាមរថភ្លើងទៅឲ្យ អ៊ុយក្រែន ដោយផ្ទាល់ 

តាមសេចក្តីរាយការណ៍ សាធារណរដ្ឋឆែក បានក្លាយជាប្រទេសសហភាពអឺរ៉ុប (EU) ដំបូងគេ ដែលផ្គត់ផ្គង់ដោយផ្ទាល់ដល់អ៊ុយក្រែន នូវសព្វាវុធវាយលុក ចាប់តាំងពីការលុកលុយរបស់រុស្ស៊ី បានចាប់ផ្តើមកាលពី ៤១ថ្ងៃមុន។

មន្ត្រីជាន់ខ្ពស់ឆែក បានប្រាប់ទីភ្នាក់ងារសារព័ត៌មានរ៉យទ័រថា ប្រទេសនេះ បានបញ្ជូនរថក្រោះ T-72 ដែលផលិតដោយសូវៀតចំនួន៥គ្រឿង និងរថយន្តប្រយុទ្ធថ្មើរជើង BVP-1 ចំនួន៥គ្រឿង ដឹកតាមរថភ្លើងទៅកាន់ប្រទេស អ៊ុយក្រែន។ 

រដ្ឋមន្ត្រីក្រសួងការពារជាតិលោកស្រី Jana Cernochova បានប្រាប់សភាថា លោកស្រីសូមមិនបញ្ជាក់ ឬបដិសេធព័ត៌មានលម្អិតនៃជំនួយរបស់ឆែក ទៅឲ្យអ៊ុយក្រែន។

លោកស្រី Jana Cernochova បន្តថា “ខ្ញុំគ្រាន់តែបញ្ជាក់ដល់អ្នកថា សាធារណរដ្ឋឆែក កំពុងជួយអ៊ុយក្រែនតាមដែលអាចធ្វើទៅបាន ហើយនឹងបន្តជួយដោយផ្គត់ផ្គង់សម្ភារៈយោធា ទាំងស្រាលនិងធ្ងន់”។

គួរបញ្ជាក់ថា រឿងនេះកើតឡើងចំពេលមានសេចក្តីរាយការណ៍ថា រដ្ឋាភិបាលអាល្លឺម៉ង់កាលពីដើមសប្តាហ៍នេះ បានដកការជំទាស់ចំពោះក្រុមហ៊ុនលក់អាវុធឯកជន របស់ឆែក ដែលនាំចេញអតីតនាវាដឹកកងទ័ពអាល្លឺម៉ង់ខាងកើតចំនួន៥៦គ្រឿងទៅកាន់អ៊ុយក្រែន៕

ប្រែសម្រួល៖ Vann Vann

ប្រភព៖ BBC

ចុចអាន៖ ២ប្រទេសទៀត ស្នើសុំចូល ណាតូ ស្របពេលសង្គ្រាម ផ្ទុះនៅ អ៊ុយក្រែន