លោក Macron បង្កើតប្រវត្តិសាស្រ្តបារាំង​ រយៈពេល២០ឆ្នាំចុងក្រោយ បន្ទាប់ពីឈ្នះឆ្នោត (មានវីដេអូ)

លោក Emmanuel Macron បានប្តេជ្ញាបង្រួបបង្រួមប្រទេសបារាំងដែលបែកបាក់ បន្ទាប់ពីឈ្នះអាណត្តិទីពីរ ជាប្រធានាធិបតីបារាំង ផ្តួលលោកស្រី Marine Le Pen។

លោក Macron បានក្លាយជាមេដឹកនាំបារាំងដំបូងគេ ដែលឈ្នះការបោះឆ្នោត២អាណត្តិជាប់គ្នាក្នុងរយៈពេល២០ឆ្នាំចុងក្រោយ ដោយទទួលបានសំឡេងគាំទ្រ ៥៨,៥៥% ទល់នឹង ៤១,៤៥% របស់លោកស្រី Le Pen។

ថ្លែងទៅកាន់អ្នកគាំទ្រអបអរជ័យជម្នះនៅប៉ម Eiffel, លោក Macron បានប្តេជ្ញាថា នឹងឆ្លើយតបយ៉ាងមានប្រសិទ្ធភាពចំពោះកំហឹង និងការមិនចុះសម្រុងរបស់អ្នកបោះឆ្នោតដែលគាំទ្របេក្ខជនស្តាំនិយម។

លោកនិយាយថា “ខ្ញុំដឹងថា ប្រជាជនបារាំងមួយចំនួនបានបោះឆ្នោតឲ្យខ្ញុំនៅថ្ងៃនេះ មិនមែនដើម្បីគាំទ្រគំនិតរបស់ខ្ញុំទេ ប៉ុន្តែដើម្បីបញ្ឈប់គំនិតស្តាំនិយមជ្រុល”។ លោកក៏បានអំពាវនាវដល់អ្នកគាំទ្រឲ្យមានភាពសប្បុរស និងការគោរពចំពោះអ្នកដ៏ទៃផងដែរ ព្រោះប្រទេសនេះ កំពុងត្រូវបានបំផ្លិចបំផ្លាញដោយការសង្ស័យគ្នានិង ការបែងចែក។

លោក​​បន្ថែម​ថា “ខ្ញុំ​មិន​មែន​ជា​បេក្ខជន​នៃ​ជំរំ​មួយ​ទៀត​ទេ ប៉ុន្តែ​ជា​ប្រធានាធិបតី​នៃ​យើង​ទាំង​អស់​គ្នា”។

ជ័យជម្នះរបស់លោក Macron ត្រូវបានស្វាគមន៍ដោយបណ្តាមេដឹកនាំសហភាពអឺរ៉ុប បន្ទាប់ពីយុទ្ធនាការឃោសនាមួយ ដែលប្រធានាធិបតីបារាំងរូបនេះពណ៌នានៅក្នុងថ្ងៃចុងក្រោយថាជា “សមរភូមិសម្រាប់អឺរ៉ុប” ប្រឆាំងនឹងអ្នកសង្ស័យអឺរ៉ុបលោកស្រី Le Pen។

ប្រធានក្រុមប្រឹក្សាអឺរ៉ុប លោក Charles Michel បានបង្ហោះ Twitter ថា “អស្ចារ្យ Emmanuel។ ក្នុង​រយៈពេល​ដ៏​ចលាចល​នេះ យើង​ត្រូវការ​អឺរ៉ុប​រឹងមាំ ហើយ​បារាំង​ប្តេជ្ញាចិត្ត​ទាំងស្រុង​ចំពោះ​សហភាព​អឺរ៉ុប​ដែលមាន​អធិបតេយ្យភាព និង​យុទ្ធសាស្ត្រ​ជាង​នេះ​”​។

ចំណែកប្រធានគណៈកម្មការអឺរ៉ុបលោកស្រី Ursula von der Leyen បាននិយាយថា “ខ្ញុំរីករាយណាស់ដែលអាចបន្តកិច្ចសហប្រតិបត្តិការដ៏ល្អរបស់យើង”។ រីឯអធិការបតីអាល្លឺម៉ង់ លោក Olaf Scholz បាននិយាយថា អ្នកបោះឆ្នោតបារាំងបានផ្ញើសារដ៏រឹងមាំមួយ ក្នុងការគាំទ្រអឺរ៉ុប”។

គួរបញ្ជាក់ថា ដំណើរ​ទស្សនកិច្ច​បរទេស​លើក​ដំបូង​របស់​លោក Macron ក្នុង​នាម​ជា​ប្រធានាធិបតីថ្មី ​ត្រូវ​បាន​គេ​រំពឹង​ថា​នឹង​ទៅកាន់​ទីក្រុង​ប៊ែរឡាំង ដើម្បី​ជួប​លោក Scholz៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Guardian

ចុចអាន៖ លោក Macron ឈ្នះឆ្នោតប្រធានាធិបតីបារាំង កាន់តំណែង ៥ឆ្នាំទៀត