ព័ត៌មានអន្ដរជាតិ

មហាសេដ្ឋីលេខ១លើលោក Elon សរសើរកម្មករចិនខុសពីកម្មករអាមេរិក

បានផុស

៤ years មុន

នៅ

ថ្ងៃព្រហស្បតិ៍ ១២ ឧសភា ២០២២

ដោយ

លោកមហាសេដ្ឋី Elon Musk នាយកប្រតិបត្តិក្រុមហ៊ុនរថយន្តអគ្គីសនី Tesla និងក្រុមហ៊ុន SpaceX បានព្យាករថា ប្រទេសចិននឹងក្លាយជាអ្នកផលិតរថយន្តអគ្គីសនីដ៏ជោគជ័យ ដោយសារតែក្រមសីលធម៌ការងារដ៏រឹងមាំរបស់ពួកគេដែលលោកមើលឃើញថា អាមេរិកកំពុងខ្វះខាត។

«ខ្ញុំគិតថា នឹងមានក្រុមហ៊ុនខ្លាំងមួយចំនួនទៅប្រទេសចិន»។ លោក Musk បាននិយាយក្នុងបទសម្ភាសជាមួយកាសែត Financial Times និងបន្តថា «ចិនមានមនុស្សដែលខំប្រឹងធ្វើការ និងពេញដោយទេពកោសល្យច្រើនណាស់ដែលមានទំនុកចិត្តនៅក្នុងការផលិត»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Musk ដែលនៅតែជាអ្នកមានទ្រព្យសម្បត្តិលេខ១លើលោកជាមួយទ្រព្យសម្បត្តិជាង២២៥ប៊ីលានដុល្លារអាមេរិកយល់ឃើញផ្ទុយគ្នាពីកម្មករផលិតកម្មនៅចិនជាមួយនឹងកម្មករផលិតកម្មនៅអាមេរិក។ លោកថា ៖«ពួកគេនឹងមិនគ្រាន់តែដុតប្រេងនៅពាក់កណ្តាលអាធ្រាត្រទេ ពួកគេនឹងដុតនៅម៉ោង៣ទៀបភ្លឺ។ ពួកគេនឹងមិនចាកចេញពីរោងចក្រឡើយ ខណៈនៅអាមេរិក មនុស្សកំពុងព្យាយាមគេចចេញពីការងារបែបនេះ»។

ក្រុមហ៊ុនរថយន្តអគ្គីសនី Tesla ត្រូវបានគេរាយការណ៍ថា បានប្រើប្រាស់ការអនុវត្តការងាររបស់ខ្លួនមួយចំនួននៅរោងចក្រក្នុងទីក្រុងសៀងហៃ ប្រទេសចិនដែលកាលពីដំបូងមិនអាចអនុវត្តបាននៅអាមេរិក។ ឧទាហារណ៍ តាមការផ្សាយរបស់ Bloomberg កាលពីខែមុនថា បន្ទាប់ពីការបិទខ្ទប់រយៈពេល៣ខែ កម្មករនៅរោងចក្រតម្រូវឲ្យដេក និងញាំអាហារនៅរោងចក្រតែម្តង។ កម្មករធ្វើការ១២ម៉ោងក្នុងមួយថ្ងៃ និង៦ថ្ងៃក្នុងមួយសប្តាហ៍។

ក្រុមប្រឹក្សាទំនាក់ទំនងការងារជាតិរបស់ទីក្រុងវ៉ាស៊ីនតោនកាលពីឆ្នាំមុនបានសម្រេចថា ក្រុមហ៊ុន Tesla បានសួរនាំ និងគំរាមកម្មករដោយខុសច្បាប់ជុំវិញការប្រឹងប្រែងរបស់ពួកគេដើម្បីបង្កើតសហជីព។ ក្រុមហ៊ុនក៏ប្រឈមនឹងពាក្យបណ្តឹងរបស់បុគ្គលិកដោយចោទថា បង្កើតវប្បធម៌រើសងអើងជាតិសាសន៍។ កម្មករផ្សេងទៀតបានចោទលោក Musk ពីការទាមទារច្រើនហួសហេតុពេក៕

ប្រែសម្រួល៖ វីរបុត្រ
ប្រភព៖ RT