លោក ចូ បៃដិន ចង់ ពិភាក្សាជាមួយលោក ស៊ី ជីនពីង ខណៈសេដ្ឋកិច្ចអាមេរិក មានបញ្ហា

ប្រធានាធិបតីអាមេរិកលោក ចូ បៃដិន បាននិយាយកាលពីថ្ងៃអង្គារទី២១ ខែមិថុនាថា លោកគ្រោងនឹងពិភាក្សាជាមួយសមភាគីចិន លោក ស៊ី ជីនពីង ខណៈទីក្រុង វ៉ាស៊ីនតោន ពិចារណាដកពន្ធមួយចំនួនដែលដាក់លើទីក្រុងប៉េកាំង ក្នុងគោលបំណងបន្ធូរបន្ថយអតិផរណារបស់សហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បៃដិន បានប្រាប់អ្នកយកព័ត៌មានថា “ខ្ញុំគ្រោងនឹងសន្ទនាជាមួយលោកប្រធានាធិបតី ស៊ី ប៉ុន្តែយើងមិនទាន់កំណត់ពេលវេលានៅឡើយទេ”។

កាលពីចុងសប្តាហ៍ លោក បៃដិន និយាយថា កិច្ចពិភាក្សាគ្នាតាមទូរស័ព្ទ អាចធ្វើឡើងក្នុងពេលឆាប់ៗនេះ។

កិច្ចពិភាក្សាលើកចុងក្រោយ រវាងមេដឹកនាំទាំងពីរ គឺធ្វើឡើងកាលពីថ្ងៃទី១៨ខែមីនា នៅពេលដែលលោក បៃដិន បានព្រមានលោក ស៊ី ប្រឆាំងនឹងការជួយរុស្ស៊ី ក្នុងការលុកលុយអ៊ុយក្រែន។

គួរបញ្ជាក់ថា ក្រោមការដឹកនាំរបស់អតីតប្រធានាធិបតី ដូណាល់ ត្រាំ, សហរដ្ឋអាមេរិក បានដាក់ពន្ធ២៥ភាគរយ លើការនាំចូលរបស់ចិន ដែលមានតម្លៃរាប់ពាន់លានដុល្លារ។

វិធានការនោះ មានគោលបំណងដាក់ទណ្ឌកម្មលើអ្វីដែលសហរដ្ឋអាមេរិកនិយាយថា ជាការអនុវត្តពាណិជ្ជកម្មមិនយុត្តិធម៌របស់ចិន និងការពារក្រុមហ៊ុនផលិតរបស់អាមេរិក។

ទង្វើនោះ គឺមានប្រជាប្រិយភាពខាងនយោបាយ ប៉ុន្តែស្របពេលអតិផរណានៅសហរដ្ឋអាមេរិក បានឈានដល់កម្រិតខ្ពស់ក្នុងរយៈពេល៤០ឆ្នាំ លោក បៃដិន កំពុងព្យាយាមស្វែងរកមធ្យោបាយដើម្បីបន្ធូរបន្ថយសម្ពាធតម្លៃ ហើយលោកនិយាយថា ការដកពន្ធមួយចំនួនកំពុងស្ថិតក្រោមការពិចារណា៕

ប្រែសម្រួល៖ Vann Vann

ប្រភព៖ Straits Times

ចុចអាន៖ អាមេរិក ពិចារណាដកពន្ធទំនិញមួយចំនួនរបស់ ចិន ដើម្បីបន្ថយអតិផរណា