កូនភ្លោះក្បាលជាប់គ្នា ត្រូវគ្រូពេទ្យវះកាត់បំបែកដោយជោគជ័យ

ក្រុមគ្រូពេទ្យនៃទីក្រុងឡុងដ៍ ប្រទេសអង់គ្លេស បានធ្វើការវះកាត់បំបែកខួរក្បាល និងរាងកាយរបស់កូនភ្លោះពីរជាប់គ្នាយ៉ាងជោគេជ័យ ក្រោយប្រតិបត្តិការអស់រយៈពេល ២៧ម៉ោង។

Bernardo និង Arthur Lima ជាកូនភ្លោះមកពីប្រទេសប្រេស៊ីល ដែលពួកគេកើតមកមានក្បាលជាប់គ្នា ហើយពួកគេធ្លាប់ទទួលការវះកាត់ជាច្រើនដងមកហើយ នៅទីក្រុង Rio de Janeiro មុនពេលធ្វើដំណើរទៅកាន់ទីក្រុងឡុងដ៍ ដើម្បីធ្វើការវះកាត់រាងកាយចេញពីគ្នា កាលពីពេលថ្មីៗនេះ។

គ្រូពេទ្យវះកាត់សរសៃប្រសាទជនជាតិអង់គ្លេសនៅមន្ទីរពេទ្យ Great Ormond Street បានបំបែកកូនភ្លោះទាំងពីរដែលមានខួរក្បាលប្រសព្វគ្នាដោយជោគជ័យ ដោយមានវេជ្ជបណ្ឌិតកុមារ Noor ul Owase Jeelani ជាវេជ្ជបណ្ឌិតបង្គោលក្នុងដំណើរការវះកាត់នេះ។

តាមរយៈជំនួយពីសមាជិក ១០០នាក់នៃបុគ្គលិកពេទ្យនីតិវិធីវេជ្ជសាស្រ្ត ទីបំផុតការវះកាត់មិនធ្លាប់មានពីមុន ត្រូវបានបញ្ចប់ជាស្ថាពរ ខណៈថ្លៃចំណាយទាំងអស់បានមកពីជំនួយអង្គការសប្បុរសធម៌ Gemini Untwined។ បច្ចុប្បន្នកូនភ្លោះទាំងពីរ កំពុងសម្រាកបន្តនៅមន្ទីរពេទ្យនៅឡើយ ប៉ុន្តែសុខភាពរបស់ពួកគេមិនមានបញ្ហាអ្វីនោះទេ៕

ប្រែសម្រួល៖ សន្យា

ប្រភព៖ Daily Star

ចុចអាន៖ ទឹកជំនន់ សម្លាប់មនុស្ស ២៨នាក់ នៅរដ្ឋ Kentucky របស់ អាមេរិក