អ្នកដំណើរគំរាមបំផ្ទុះគ្រាប់បែក ក្នុងយន្តហោះរបស់ក្រុមហ៊ុនអាកាសចរណ៍ សិង្ហបុរី

ក្រសួងការពារជាតិសិង្ហបុរីបាននិយាយថា យន្តហោះចម្បាំង បានអមដំណើរយន្តហោះរបស់ក្រុមហ៊ុនអាកាសចរណ៍សិង្ហបុរី ដើម្បីចុះចតនៅអាកាសយានដ្ឋានអន្តរជាតិ Changi នៅថ្ងៃពុធទី២៨ខែកញ្ញានេះ បន្ទាប់ពីអ្នកដំណើរម្នាក់ គំរាមបំផ្ទុះគ្រាប់បែក។

សេចក្តីថ្លែងការណ៍របស់ក្រសួងបាននិយាយថា អ្នកដំណើរបុរសអាយុ ៣៧ ឆ្នាំម្នាក់នៅលើជើងហោះហើរ SQ33 ចេញពីទីក្រុង San Franciso បានអះអាងថា មានគ្រាប់បែកនៅក្នុងវ៉ាលិសរបស់គាត់។

ទោះបីជាយ៉ាងណាក៏ដោយ ការគំរាមបំផ្ទុះគ្រាប់បែកនេះ ត្រូវបានគេបញ្ជាក់នាពេលក្រោយថាមិនពិត។ ជនសង្ស័យត្រូវបានចាប់ខ្លួន ហើយប៉ូលិសកំពុងបន្តការស៊ើបអង្កេត។

ភ្លាមៗនេះ ប៉ូលិសសិង្ហបុរី មិនបានឆ្លើយតបចំពោះសំណើសុំការអត្ថាធិប្បាយទេ។

អ្នកនាំពាក្យរបស់ក្រុមហ៊ុនអាកាសចរណ៍សិង្ហបុរីបានឲ្យដឹងថា អ្នកដំណើរ និងបុគ្គលិកផ្សេងទៀតទាំងអស់ បានចុះពីយន្តហោះដោយសុវត្ថិភាព ប៉ុន្តែបានបដិសេធផ្តល់ព័ត៌មានលម្អិតបន្ថែមអំពីឧប្បត្តិហេតុនេះ៕

ប្រែសម្រួល៖ Vann Vann

ប្រភព៖ Reuters

ចុចអាន៖ អាមេរិក រៀបចំ ផែនការ យោធា ដើម្បីការពារលោកស្រី Pelosi ពេលធ្វើទស្សនកិច្ច តៃវ៉ាន់