ក្រុម WHO កំពុងធ្វើការជាមួយក្រុមហ៊ុនផលិតវ៉ាក់សាំងចិន ដើម្បីវាយតម្លៃការប្រើប្រាស់បន្ទាន់

អគ្គនាយកអង្គការសុខភាពពិភពលោក (WHO) លោក Tedros Adhanom Ghebreyesus បាននិយាយថា ក្រុម WHO នៅប្រទេសចិនកំពុងធ្វើការជាមួយក្រុមហ៊ុនផលិតវ៉ាក់សាំង Sinovac និង Sinopharm សម្រាប់ការចុះបញ្ជីប្រើប្រាស់បន្ទាន់ ។

លោក Tedros បាននិយាយនៅក្នុងសន្និសីទសារព័ត៌មាននាពេលថ្មីៗនេះថា “ខ្ញុំរីករាយដែលក្រុមអង្គការសុខភាពពិភពលោកនៅប្រទេសចិននាពេលបច្ចុប្បន្ននេះកំពុងធ្វើការជាមួយក្រុមហ៊ុនផលិតវ៉ាក់សាំង Sinovac និង Sinopharm ដើម្បីវាយតម្លៃការអនុលោមតាមការអនុវត្តផលិតកម្មគុណភាពអន្តរជាតិមុនពេលការចុះបញ្ជីប្រើប្រាស់ជាបន្ទាន់ដោយ WHO” ។

ទន្ទឹមនោះលោកក៏បានកត់សម្គាល់ដែរថា អង្គការសុខភាពពិភពលោកបន្តស្នើសុំឲ្យក្រុមហ៊ុនផលិតវ៉ាក់សាំងនានានៅជុំវិញពិភពលោកព្យាយាមផ្តល់នូវទិន្នន័យចាំបាច់ឲ្យបានឆាប់រហ័សដែលនឹងអនុញ្ញាតឲ្យអង្គការពិចារណាលើវ៉ាក់សាំងសម្រាប់ការចុះបញ្ជីប្រើប្រាស់បន្ទាន់ ។

លោក Tedros បាននិយាយថា “នៅពេលដែលយើងសង្ឃឹមអំពីវ៉ាក់សាំងដែលមានសុវត្ថិភាព និងប្រសិទ្ធភាពដែលកំពុងត្រូវបានដាក់ចេញឲ្យប្រើប្រាស់ យើងចង់ឃើញការបង្កើនការចាក់វ៉ាក់សាំង ខណៈវ៉ាក់សាំងត្រូវបានបម្រុងទុកសម្រាប់ប៉ុន្មានសប្តាហ៍ខាងមុខនេះហើយផងដែរ” ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ ទីបំផុត រកឃើញវ៉ាក់សាំងកូវីដដែល WHO ទទួលស្គាល់ឲ្យប្រើប្រាស់ជាបន្ទាន់

ចុចអាន ៖ WHO ៖ ខែកុម្ភៈ ការចាក់វ៉ាក់សាំងកូវីដនឹងមានគ្រប់ប្រទេសទាំងអស់