រុស្ស៊ី ព្រមានថា ការវាយប្រហារប៉ុនប៉ងធ្វើឃាតលោក ពូទីន នឹងធ្វើឲ្យជម្លោះ​កាន់តែរីកធំឡើង

អតីតប្រធានាធិបតីរុស្ស៊ីលោក Dmitry Medvedev បាននិយាយកាលពីថ្ងៃព្រហស្បតិ៍ថា ការវាយប្រហារដោយយន្តហោះដ្រូនមកលើវិមានក្រឹមឡាំង ក្នុងគោលបំណងធ្វើឃាតលោកប្រធានាធិបតី វ្ល៉ាឌីមៀរ ពូទីន ពិតជានឹងធ្វើឲ្យជម្លោះជាមួយអ៊ុយក្រែនដែលផ្ទុះឡើងកាលពីខែកុម្ភៈឆ្នាំមុន កាន់តែរីកធំ ។

នៅក្នុងសេចក្តីថ្លែងការណ៍មួយលើបណ្ដាញ Twitter, លោក Medvedev បានហៅប្រធានគោលនយោបាយការបរទេសរបស់សហភាពអឺរ៉ុប (EU) លោក Josep Borell ដែលបានជំរុញទីក្រុងមូស្គូកុំឲ្យប្រើការវាយប្រហារនេះ ធ្វើជាលេសដើម្បីបង្កើនជម្លោះ ថាជា “មនុស្សចាស់ល្ងីល្ងើ និងល្ងង់ខ្លៅ” ។

លោក Medvedev បាននិយាយថា “លោក Borrell បាននិយាយប្រឆាំងនឹងការវាយប្រហារលើវិមានក្រឹមឡាំងសម្រាប់ការកើនឡើងជម្លោះបន្ថែមទៀត ។ គាត់ជាមនុស្សចាស់ដែលល្ងង់ខ្លៅម្នាក់ ។ វាច្បាស់ណាស់ថា ជម្លោះនឹងរីកធំឡើង បន្ទាប់ពីមានការវាយប្រហារភេរវកម្ម ដែលប្រព្រឹត្តឡើងដោយអាជ្ញាធរទីក្រុងកៀវ ដឹកនាំដោយសហរដ្ឋអាមេរិក និងអនុម័តដោយថ្នាក់ដឹកនាំសហភាពអឺរ៉ុប” ។

ប្រធានក្រុមប្រឹក្សាសន្តិសុខរូបនេះបានសង្កត់ធ្ងន់ទៀតថា “នេះ​គឺ​ជា​អ្វី​ដែលទី​ក្រុង​វ៉ាស៊ីនតោន និង​មនុស្ស​ល្ងង់​ជាច្រើន​នៅ​ទីក្រុង​ព្រុចសែល​ចង់​បាន” ។

វិមានក្រឹមឡាំងបាននិយាយកាលពីថ្ងៃពុធថា អ៊ុយក្រែនប៉ុនប៉ងធ្វើឃាតលោក ពូទីន ដោយប្រើយន្តហោះដ្រូនចំនួន ២ គ្រឿងវាយប្រហារវិមានក្រឹមឡាំង ដែលជាកន្លែងស្នាក់នៅរបស់ប្រធានាធិបតី ប៉ុន្តែក្រោយត្រូវបានបាញ់ទម្លាក់វិញ ខណៈប្រធានាធិបតីអ៊ុយក្រែនលោក Volodymyr Zelensky និងមន្ត្រីផ្សេងទៀត ក៏បានបដិសេធការជាប់ពាក់ព័ន្ធរបស់ទីក្រុងកៀវក្នុងការវាយប្រហារនេះផងដែរ ៕

ប្រែសម្រួលដោយ ៖ ជិវ័ន្ត

ប្រភព ៖ Anadolu

ចុចអាន ៖ វីដេអូនៃការប៉ុនប៉ងធ្វើឃាតលោក ពូទីន ដោយយន្តហោះដ្រូន អ៊ុយក្រែន លើវិមានក្រឹមឡាំង