រំលោភកូនស្រីចុងខ្លួនឯង បុរសម៉ាឡេស៊ីម្នាក់ជាប់គុក ១,០៥០ ឆ្នាំ

តុលាការនៅប្រទេសម៉ាឡេស៊ីបានកាត់ទោសបុរសម្នាក់ឲ្យជាប់គុក ១,០៥០ ឆ្នាំ និងវាយ ២៤ ដំបងពីបទរំលោភកូនស្រីចុងរបស់គាត់ ។

ទីភ្នាក់ងារសារព័ត៌មាន Bernama បានរាយការណ៍ថា បុរសគ្មានការងារធ្វើរូបនេះបានសារភាពទោសកំហុសពីបទរំលោភកូនចុងអាយុ ១២ ឆ្នាំចំនួន ១០៥ ដងក្នុងរយៈពេលពីរឆ្នាំគិតចាប់ពីថ្ងៃទី ៥ ខែមករា ឆ្នាំ ២០១៨ ដល់ថ្ងៃទី ២៤ ខែកុម្ភៈ ឆ្នាំ ២០២០ ។

ជនជាប់ចោទត្រូវបានផ្តន្ទាទោសដាក់ពន្ធនាគាររយៈពេល ១០ ឆ្នាំពីបទរំលោភសេពសន្ថវៈក្នុងមួយលើក (១០៥ លើកស្មើ ១,០៥០ ឆ្នាំ) ហើយបានចំណាយពេលសរុបជិត ៥ ម៉ោងដើម្បីអានសេចក្ដីសម្រេចនៅក្នុងតុលាការកាលពីថ្ងៃពុធ ទី ២៧ ខែមករា ។

ចៅក្រមតុលាការលោក Kunasundary បាននិយាយថា “បទល្មើសនេះមានផលប៉ះពាល់យ៉ាងធ្ងន់ធ្ងរដល់កុមារ ។ ខ្ញុំសង្ឃឹមថាអ្នកនឹងដឹងកំហុសនៅពេលជាប់គុក ។ អ្នកមិនគួរប្រព្រឹត្ដអំពើហិង្សាទេ ហើយទោះបីទណ្ឌកម្មមានកម្រិតទាបក៏ដោយតុលាការយល់ថាវាគ្រប់គ្រាន់ហើយដោយគិតពីចំនួននៃការចោទប្រកាន់” ។

ចំណែកព្រះរាជអាជ្ញារងលោក Nurul Qistini Qamarul Abrar បានជំរុញឲ្យតុលាការដាក់ទោសឲ្យជាប់ឃុំ ធ្ងន់ៗបែបនេះ ហើយក៏បានបញ្ជាឲ្យមានការដាក់ទោសវាយនឹងដំបងផងដែរ ។

ដោយដកស្រង់សម្ដីព្រះរាជអាជ្ញាសារព័ត៌មាន Bernama បានរាយការណ៍ថា “ក្នុងនាមជាឪពុកចុងរបស់ក្មេងស្រី គាត់គួរតែទទួលខុសត្រូវក្នុងការការពារជនរងគ្រោះ ប៉ុន្តែផ្ទុយទៅវិញគាត់បានបំផ្លាញតម្លៃខ្លួនរបស់នាង ។ សកម្មភាពរបស់គាត់នឹងបង្កឲ្យមានការប៉ះទង្គិចពេញមួយជីវិតដល់ជនរងគ្រោះ” ៕

ប្រែសម្រួលដោយ ៖ ជីវ័ន្ត

ប្រភព ៖ The Straits Times

ចុចអាន ៖ ព្រះមហាក្សត្រម៉ាឡេស៊ីប្រកាសដាក់ប្រទេសក្នុងស្ថានភាពអាសន្ន ដើម្បីទប់ស្កាត់កូវីដ

ចុចអាន ៖ នាយករដ្ឋមន្រ្តីម៉ាឡេស៊ីនឹងទទួលការចាក់វ៉ាក់សាំងកូវីដមុនគេ