ព័ត៌មានអន្ដរជាតិ

ជម្លោះប្រទេស ទាញទម្លាក់សេដ្ឋីមានជាងគេ អ៊ុយក្រែន របូតទ្រព្យអស់គ្មានសល់នៅទឹកដី រុស្ស៊ី

បានផុស

២ years មុន

នៅ

ថ្ងៃសុក្រ ២៦ មករា ២០២៤

ដោយ

បណ្តាក្រុមហ៊ុនរុករករ៉ែធ្យូងថ្មដែលជាកម្មសិទ្ធិរបស់មហាសេដ្ឋីអ៊ុយក្រែន Rinat Akhmetov នៅក្នុងទឹកដីរុស្ស៊ី នឹងត្រូវក្រុមហ៊ុនពហុផលិតផលរបស់រុស្ស៊ីទិញយកទាំងអស់ បន្ទាប់ពីទទួលបានការអនុញ្ញាតពីរដ្ឋាភិបាលវិមានក្រឹមឡាំង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពព័ត៌មាន RT បានឲ្យដឹងថា លោកប្រធានាធិបតីរុស្ស៊ី Vladimir Putin បានឯកភាពលើសំណើដាក់ទិញលក់ជាម្ចាស់កម្មសិទ្ធិស្របច្បាប់ទៅលើក្រុមហ៊ុន SCM Holding របស់មហាសេដ្ឋីអ៊ុយក្រែនកាលពីថ្ងៃព្រហស្បតិ៍ទី២៦ ខែមករា ។ ការយល់ស្របនេះ គឺដើម្បីឆ្លើយតបទៅនឹងទណ្ឌកម្ម និងវិធានការនានាកន្លងមកដែលប្រទេសសម្ព័ន្ធមិត្តអ៊ុយក្រែនដាក់មកលើរុស្ស៊ី ។

កាលពីខែកញ្ញា ឆ្នាំ២០២២ កន្លងទៅ ទ្រព្យសម្បត្តិរបស់មហាសេដ្ឋីអ៊ុយក្រែនខាងលើ ក៏ត្រូវបានអាជ្ញាធររុស្ស៊ីរឹបអូសយកដោយចោទប្រកាន់ពីបទ “ផ្តល់ជំនួយដល់ភេវកម្ម” នេះគឺដោយហេតុថាក្រុមហ៊ុនរបស់លោកមហាសេដ្ឋី Rinat Akhmetov បានផ្តល់ជំនួយហិរញ្ញវត្ថុក្នុងចំនួនដ៏ច្រើនទៅដល់យោធាអ៊ុយក្រែន ។

សម្រាប់ក្រុមហ៊ុនភាគទុនិក ឈ្មោះ Best Solution នៅរុស្ស៊ីនឹងទទួលភាគហ៊ុន ១០០ ភាគរយទៅលើក្រុមហ៊ុននានាដែលធ្លាប់គ្រប់គ្រងដោយមហាសេដ្ឋីអ៊ុយក្រែនដែលមានជាងគេរូបនេះ ។

គួររំឭកដែរថា លោក Akhmetov ត្រូវបានគេចាត់ទុកជាអ្នកមានជាងគេនៅប្រទេសអ៊ុយក្រែន ជាមួយនឹងទ្រព្យសម្បត្តិសរុប ៥.៧ ពាន់លានដុល្លារ ។ ក្រុមហ៊ុនរបស់លោក មានវិនិយោគទៅលើឧស្សាហកម្មជាច្រើន រាប់ទាំងវិស័យថាមពល ដឹកជញ្ជូន រុករករ៉ែ ស្លដែក ធនាគារ សេវាហិរញ្ញវត្ថុផ្សេងៗ ព្រមទាំងក្លិបបាល់ទាត់ Shakhtar Donetsk ដែលយកឈ្មោះតាមក្រុមហ៊ុនរ៉ែរបស់លោកផងដែរ ៕

ដោយ៖ មាន រតនា

Related Topics:សង្គ្រាមរុស្ស៊ី-អ៊ុយក្រែន