ក្រុមហ៊ូទី គំរាមបញ្ឆេះភ្លើងសង្គ្រាមជាមួយ អ៊ីស្រាអែល បើហ៊ានវាយទីក្រុង​ជាប់ព្រំដែន អេហ្ស៊ីប

ក្រុមហ៊ូទីដែលជាចលនាប្រដាប់អាវុធដ៏មានឥទ្ធិពលរបស់ប្រទេសយេម៉ែនបានប្ដេជ្ជានឹងពង្រីកប្រតិបត្តិការរបស់ខ្លួនប្រឆាំងនឹងអ៊ីស្រាអែល ប្រសិនបើកងកម្លាំងប្រទេសមួយនេះបញ្ឆេះភ្លើងសង្គ្រាមបន្ថែមទៀតនៅទីក្រុង Rafah ភាគខាងត្បូងតំបន់ហ្គាហ្សាស្ទ្រីប ។ នេះបើយោងតាមការចេញផ្សាយដោយសារព័ត៌មាន Al Jazeera កាលពីថ្ងៃទី១១ ខែកុម្ភៈកន្លងទៅ ។

លោក Mohammed Ali Al-Houthi សមាជិកក្រុមប្រឹក្សានយោបាយជាន់ខ្ពស់របស់ក្រុមហ៊ូទីបាននិយាយនៅក្នុងសេចក្តីថ្លែងការណ៍មួយថា “យើងសូមនិយាយផ្ដាំផ្ញើទៅកាន់ប្រទេសអ៊ីស្រាអែលថា ប្រសិនបើភ្លើងសង្គ្រាមណាមួយផ្សេងទៀតឆេះឡើងនៅទីក្រុង Rafah ឬតំបន់ហ្គាហ្សា អ្នកគួរតែដឹងហើយថា ប្រតិបត្តិការរបស់យើងនឹងរីកធំទៅតាមនោះ ហើយផ្លូវរបស់យើងក៏រេរតាមនោះដូចគ្នា” ។

ទន្ទឹមនោះ ការព្រមានរបស់សម្ព័ន្ធមិត្តក្រុមប្រដាប់អាវុធប៉ាឡេស្ទីនហាម៉ាសមួយនេះក៏កើតមានឡើង បន្ទាប់ពីលោកនាយករដ្ឋមន្ត្រីអ៊ីស្រាអែល Benjamin Netanyahu កាលពីថ្ងៃសុក្រសប្ដាហ៍មុនបានបញ្ជាឲ្យកម្លាំងទ័ពរបស់លោករៀបចំផែនការចំនួន ២ ក្នុងការជម្លៀសជនស៊ីវិលចេញពីទីក្រុង Rafah ដើម្បីបើកប្រតិបត្តិការកម្ចាត់សមាជិកក្រុមហាម៉ាសដែលនៅសេសសល់នៅក្នុងតំបន់ហ្គាហ្សា ។

យោងតាមការចេញផ្សាយដោយទីភ្នាក់ងារព័ត៌មាន Reuters បានឲ្យដឹងថា អ៊ីស្រាអែលបានបើកការវាយប្រហារតាមអាកាសយ៉ាងសាហាវយង់ឃ្នងទៅលើទីក្រុង Rafah ដែលជាកន្លែងសុវត្ថិភាពចុងក្រោយសម្រាប់ពលរដ្ឋហ្គាហ្សាកំពុងជ្រកកោន បើទោះបីជាមានការរិះគន់យ៉ាងចាស់ដៃពីសំណាក់លោកប្រធានាធិបតីអាមេរិក Joe Biden ចំពោះប្រតិបត្តិការវាយលុកមួយនេះក៏ដោយ ។

ពាក់ព័ន្ធនឹងបញ្ហានេះដែរ សហគមន៍អន្តរជាតិក៏កំពុងមានក្តីបារម្ភអំពីជោគវាសនារបស់ជនភៀសខ្លួនហ្គាហ្សារាប់សែននាក់ដែលកំពុងសំងំរស់នៅក្នុងទីក្រុង Rafah ព្រោះថាទីក្រុងនេះជាកន្លែងមានសុវត្ថិភាពចុងក្រោយបង្អស់ហើយសម្រាប់ពលរដ្ឋហ្គាហ្សាដែលកំពុងរស់នៅយ៉ាងរងទុក្ខវេទនារួចទៅហើយ ចាប់តាំងពីអ៊ីស្រាអែលបានគម្រាមវាយសន្ធាប់តាមដីគោកលើទីក្រុងជាប់ព្រំដែនជាមួយប្រទេសអេហ្ស៊ីបមួយនេះ ។

គួរបញ្ជាក់ថា អ៊ីស្រាអែលបានបើកការវាយសន្ធាប់យ៉ាងមិនប្រណីដៃទាំងតាមផ្លូវអាកាស និងដីគោកលើតំបន់ហ្គាហ្សាស្ទ្រីបដើម្បីជាការសងសឹកចំពោះការវាយឆ្មក់របស់ក្រុមហាម៉ាសក្នុងព្រឹត្តិការណ៍ ៧ តុលា ២០២៣ ដោយក្នុងបានសម្លាប់ជនជាតិប៉ាឡេស្ទីនជាង ២៨,០០០ នាក់ ដែលភាគច្រើនជាកុមារ និងស្ត្រី ហើយជាង ៦៧,៧០០ នាក់ផ្សេងទៀតរងរបួស ។ ចំណែកខាងអ៊ីស្រាអែលវិញមានមនុស្សជិត ១,២០០ បានបាត់បង់ជិវិត ខណៈចំណាប់ខ្មាំងជាង ១៣០ នាក់នៅតែស្ថិតក្នុងកណ្ដាប់ដៃក្រុមហាម៉ាសដដែល ៕

ដោយ ៖ សុខ ជីវ័ន្ត

ចុចអាន ៖ អ៊ីរ៉ង់ ព្រមាន អ៊ីស្រាអែល ធ្ងន់ៗថា បើភ្លើងសង្គ្រាមនៅហ្គាហ្សារលត់ លោក Netanyahu ក៏ដល់ទីអវសាន