មានប្រទេស និងដែនដីប៉ុន្មានហើយទទួលការចាក់វ៉ាក់សាំងកូវីដ

គេហទំព័រមួយដែលដំណើរការដោយអ្នកស្រាវជ្រាវនៅឯសាកលវិទ្យាល័យ Oxford បង្ហាញថា រហូតមកដល់ពេលនេះការចាក់វ៉ាក់សាំងប្រឆាំងនឹងជំងឺកូវីដ ១៩ បានចាប់ផ្តើមនៅក្នុងប្រទេស និងដែនដីយ៉ាងតិចចំនួន ៧០ ។

គេហទំព័រដែលប្រើប្រាស់ទិន្នន័យពីរដ្ឋាភិបាលជាតិ និងប្រភពដទៃទៀតនិយាយថា យ៉ាងហោចណាស់មានវ៉ាក់សាំងចំនួន ៧ ប្រភេទកំពុងប្រើប្រាស់នៅជុំវិញពិភពលោក ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមគេហទំព័រដដែលបានឲ្យដឹងថា គិតត្រឹមរសៀលថ្ងៃពុធនេះវ៉ាក់សាំងកូវីដ ១៩ ប្រហែល ១៧៨ លានដូសត្រូវបានគេប្រើប្រាស់ទូទាំងពិភពលោក ។

គេហទំព័រនេះក៏បាននិយាយផងដែរថា ប្រជាជនប្រមាណ ៩១.៥៧ លាននាក់បានទទួលវ៉ាក់សាំងយ៉ាងហោចណាស់មួយដូស ។

ក្នុងនោះសហរដ្ឋអាមេរិកទទួលបានការចាក់វ៉ាក់សាំងខ្ពស់បំផុតគឺ ៥២.៨៨ លានដូស ។ បន្ទាប់មកទៀតគឺប្រទេសចិនមានចំនួន ៤០.៥២ លានដូស ចក្រភពអង់គ្លេសមាន ១៥.៨៤ លានដូស ឥណ្ឌាមាន ៨.៧២ លានដូស និងអ៊ីស្រាអែល ៦.៦ លានដូស ។

គេហទំព័រនេះនិយាយថា អ៊ីស្រាអែលមានអត្រាចាក់វ៉ាក់សាំងការពារច្រើនជាងគេបំផុតនៅលើពិភពលោក ខណៈមាន ៤៦.១ ភាគរយនៃប្រជាជនរបស់ខ្លួនបានទទួលការចាក់ថ្នាំបង្ការ ។ អត្រានេះគឺស្មើ ២២.៥ ភាគរយសម្រាប់ចក្រភពអង់គ្លេស និង ១១.៥ ភាគរយសម្រាប់សហរដ្ឋអាមេរិក ហើយវាមានប្រមាណជា ១ ភាគរយប៉ុណ្ណោះនៃចំនួនប្រជាជនពិភពលោកត្រូវបានចាក់វ៉ាក់សាំង ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ WHO ៖ វីរុសកូរ៉ូណាបម្លែងខ្លួនប្រភេទថ្មីដែលរកឃើញនៅអង់គ្លេសកំពុងរាលដាលទូទាំងពិភពលោក

ចុចអាន ៖ ១០ ប្រទេសដែលមិនទាន់មានការឆ្លងកូវីដសូម្បីមួយករណី