ព័ត៌មានអន្ដរជាតិ
តើហេតុអ្វីបានជា លោក Mark Zuckerberg ចាំបាច់ត្រូវសាងសង់បន្ទាយក្រោមដី?
រហូតមកទល់ពេលនេះ នៅមិនទាន់មានអ្នកជំនាញវិភាគណាម្នាក់ អាចប៉ាន់ស្មានដឹងឡើយពីចេតនាសាងសង់បន្ទាយក្រោមដីរបស់ម្ចាស់ក្រុមហ៊ុន Meta លោក Mark Zuckerberg ដែលមានទំហំ ៥.០០០ ម៉ែត្រការ៉េ ស្ថិតនៅលើកោះ Kauai រដ្ឋហាវ៉ៃ ដោយចំណាយលុយសាងសង់អស់ចំនួន ២៧០ លានដុល្លារ ។
ស្របពេលដែលបច្ចុប្បន្នគេឃើញមានការនិយាយជាបន្តបន្ទាប់នៅលើបណ្ដាញសង្គមអំពីការវិនាសកម្មរបស់ផែនដី ជាពិសេសអំពីព័ត៍មានរបស់ Black hole បូករួមទាំងកត្តាសង្គ្រាម និងការចូលចិត្តបង្អួតអាវុធនុយក្លែអ៊ែ ទៀតនោះ បានធ្វើឱ្យមានមតិជាច្រើនលើកឡើងថា ទាំងនេះអាចជាមូលហេតុបណ្ដាលឱ្យមហាសេដ្ឋីខាងលើនេះមានគំនិតបង្កើតបន្ទាយក្រោមដី ដើម្បីជម្លៀសខ្លួនចេញពីករណីបន្ទាន់ណាមួយដែលអាចនឹងកើតឡើង ។
យ៉ាងណាមិញ ការលើកឡើងខាងលើមិនអាចយកជាបានឡើយ ដោយគ្រាន់តែជាប៉ាន់ស្មានពីសំណាក់សាមញ្ញជនប៉ុណ្ណោះ ដូចនេះវានៅតែស្ថិតនៅក្នុងអាថ៌កំបាំង និងចម្ងល់រាប់លានពីសំណាក់មនុស្សជុំវិញពិភពលោក ។ តើ Mark Zuckerberg មានចេតនាអ្វីឱ្យប្រាកដ?
ទាក់ទងជាមួយគ្នានេះ សារព័ត៌មាន Zingnews កាលពីថ្ងៃទី២៧ ខែកុម្ភៈ បានលើកយកសេចក្ដីអធិប្បាយរបស់លោកសាស្ត្រាចារ្យ Douglas Rushkoff ជាសាស្ត្រាចារ្យសកលវិទ្យាល័យ និងជាអ្នកនិពន្ធសៀវភៅផងនោះ ដែលគាត់ធ្លាប់បានអត្ថាធិប្បាយអំពីផ្នត់គំនិតរបស់មហាសេដ្ឋីនៅក្នុងសៀវភៅថ្មីរបស់គាត់ “Survival of the Richest: Escape Fantasies of the Tech Billionaires” ថា គាត់ធ្លាប់បានអង្គុយប្រជុំជាមួយមហាសេដ្ឋី៥រូប ហើយពួកគេម្នាក់ៗសុទ្ធតែមានបំណងប្រាថ្នាស្វែងរកទីកន្លែងសម្ងាត់ដើម្បីរស់នៅរៀងៗខ្លួន ។
សៀវភៅ “Survival of the Richest: Escape Fantasies of the Tech Billionaires” មានខ្លឹមសារមួយប្រយោគបង្ហាញថា “ជំនឿរបស់មហាសេដ្ឋីបច្ចេកវិទ្យា ប្រសិនបើពួកគេមានលុយ និងបច្ចេកវិទ្យាគ្រប់គ្រាន់ ពួកគេអាចគេចផុតពីគ្រោះមហន្តរាយដែលកើតចេញពីវិធីដែលពួកគេប្រើសម្រាប់រកលុយ ។ការគិតនេះត្រូវបានគេនិយាយថា ជាហេតុផលដែលមហាសេដ្ឋីបង្កើតគម្រោងប្រៀបបានដូចជានៅក្នុងខ្សែភាពយន្តប្រឌិតបែបវិទ្យាសាស្ត្រដូចជា គម្រោងព្យាបាលភាពចាស់ គម្រោងសាងសង់ជម្រកអាថ៌កំបាំង និងវិធីសាស្ត្រគេចចេញពីផែនដីជាដើម ។
ទន្ទឹមគ្នានេះ សារព័ត៌មាន Metro ធ្លាប់បាននិយាយថា សម្រាប់គម្រោងសាងសង់ទីកន្លែងអាថ៌កំបាំងរស់នៅ មិនមែនមានតែ លោក Mark Zuckerberg ម្នាក់ឡើយដែលធ្វើវា ពោលគឺនៅមានមហាសេដ្ឋី Peter Thiel និង លោក Sam Altman នាយកប្រតិបត្តិក្រុមហ៊ុន OpenAI ក៏កំពុងកាន់គម្រោងស្រដៀងគ្នានេះនៅក្នុងដៃដែរដោយរង់ចាំតែការអនុញ្ញាតផ្ដល់សិទ្ធិសាងសង់ពីសំណាក់អាជ្ញាធរតែប៉ុណ្ណោះ ។
សូមជម្រាបផងដែរថា អស់រយៈពេលជិតមួយទស្សវត្សរ៍មកហើយដែលម្ចាស់ក្រុមហ៊ុន Meta បានទិញដីនៅលើកោះ Kauai និងសាងសង់អគារលើដីទំហំ ៥០០ ហិកតា ដែលមានទំហំធំប្រហែល ៦៥ ដងនៃ វិមាន Buckingham ព្រះរាជដំណាក់ព្រះមហាក្សត្រក្នុងទីក្រុងឡុងដ៍។ គម្រោងនេះមានផ្ទះវីឡា ដើមឈើ និងផ្លូវរូងក្រោមដី។ ហើយការទាក់ទាញសំខាន់នៃ គម្រោង ២៧០ លានដុល្លារ នេះ គឺជម្រកក្រោមដីមានទំហំ ៥.០០០ ម៉ែត្រការ៉េរបស់លោក Zuckerberg នេះតែម្ដង ។
លេណដ្ឋានក្រោមដីរបស់ Zuckerberg មិនមែនជាជម្រកធម្មតាទេ វាជាកន្លែងធំទូលាយដែលមានប្រភពថាមពល និងអាហារផ្ទាល់ខ្លួន ហើយទ្វាររបស់វាបានរចនាឡើងដើម្បីទប់ទល់នឹងការផ្ទុះទ្រង់ទ្រាយធំទៀតផង ។ យោងតាមរបាយការណ៍របស់ Business Insider បានបង្ហាញពីគម្រោងសាងសង់លេណដ្ឋាន យ៉ាងដូច្នេះថា នៅក្នុងនោះមានបន្ទប់គេងជាង ៣០បន្ទប់ បន្ទប់ទឹក ៣០ ជណ្តើរយន្ត ការិយាល័យ បន្ទប់ប្រជុំ និងផ្ទះបាយធំទូលាយ។ លេនដ្ឋាននេះក៏មានកន្លែងកំសាន្តដូចជាកន្លែងហាត់ប្រាណ អាងហែលទឹក សូណា អាងទឹកក្តៅ-ត្រជាក់ និងមានសូម្បីតែទីលានវាយកូនបាល់ ៕
ប្រែសម្រួលដោយ÷ ប៉ោ កុសល
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង