នាវាឆ្មាំសមុទ្រចិននិងហ្វីលីពីន បុកគ្នា ក្នុងសមុទ្រចិនខាងត្បូង

ជាការប្រឈមមុខដាក់គ្នាថ្មីក្នុងដែនទឹកមានជម្លោះ ឆ្មាំសមុទ្រហ្វីលីពីន (PCG) និយាយថា នាវាមួយគ្រឿងរបស់ខ្លួន បានរងការខូចខាត នៅពេលនាវាចិន ព្យាយាមរារាំងបេសកកម្មផ្គត់ផ្គង់នៅសមុទ្រចិនខាងត្បូង។

តាមការបញ្ជាក់ពីអ្នកនាំពាក្យ PCG លោក Jay Tarriela, ឧបទ្ទវហេតុនេះ កើតឡើងនៅព្រឹកថ្ងៃអង្គារទី៥ខែមីនាជិតថ្មប៉ប្រះទឹក Second Thomas Shoal ជាកន្លែងដែលនាវិកមួយក្រុមតូច កំពុងរស់នៅលើខ្មោចនាវាចម្បាំង Sierra Madre ចាប់តាំងពីនាវាដាក់សំចតនៅទីនោះកាលពីជិត២៥ឆ្នាំមុន។

លើសពីនេះ លោកថែមទាំងបានចែករំលែកវីដេអូ និងរូបភាពនៅលើបណ្តាញសង្គម X ដែលបង្ហាញពីនាវាចិន បើកកាត់មុខនាវាហ្វីលីពីន ហើយក្រុមនាវិកប្រញាប់ប្រញាល់ទម្លាក់ពោងផងដែរ។

លោក Tarriela បង្ហោះថា “នាវារបស់ PCG បានប្រឈមមុខនឹងសមយុទ្ធដ៏គ្រោះថ្នាក់ និងការរារាំងពីនាវាឆ្មាំសមុទ្រចិន និងកងជីវពលដែនសមុទ្រចិន។ សកម្មភាពមិនប្រុងប្រយ័ត្ន និងខុសច្បាប់របស់ពួកគេ បាននាំឲ្យមានការប៉ះទង្គិចគ្នារវាង MRRV-4407 និង China Coast Guard 21555 ដែលបង្កការខូចខាតតិចតួចដល់នាវារបស់ PCG”។

ទោះបីជាយ៉ាងណាក៏ដោយ ឆ្មាំសមុទ្រចិន ចេញមុខអះអាងថា ខ្លួនបានចាត់វិធានការប្រឆាំងនឹងនាវាហ្វីលីពីននៅក្នុងតំបន់ ព្រោះពួកគេ ឆ្លងចូលដែនទឹកដោយខុសច្បាប់។

ភាពតានតឹងនៅសមុទ្រចិនខាងត្បូង បានឡើងកម្តៅខ្លាំងក្នុងរយៈពេលមួយឆ្នាំកន្លងមក ដោយទីក្រុងម៉ានីល ចោទប្រកាន់ទីក្រុងប៉េកាំងថា បានចាត់វិធានការគ្រោះថ្នាក់ប្រឆាំងនឹងនាវារបស់ខ្លួន ហើយថែមទាំងដាក់ការតវ៉ាផ្នែកការទូតជាច្រើនលើកច្រើនសាផងដែរ។

ថ្មប៉ប្រះទឹក Second Thomas Shoal ដែលហ្វីលីពីនហៅថា Anyungin Shoal ឬចិនហៅថា Ren’ai Jiao គឺស្ថិតនៅចម្ងាយប្រហែល២០០គីឡូម៉ែត្រ ពីកោះ Palawan ភាគខាងលិចប្រទេសហ្វីលីពីន និងជាង១០០០គីឡូម៉ែត្រពីកោះ Hainan ភាគខាងត្បូងប្រទេសចិន៕

សូមទស្សនាវីដេអូ៖

អត្ថបទ៖ សុខ សុវណ្ណ

ចុចអាន៖ អាជ្ញាធរវៀតណាម និងហ្វីលីពីន ព្រមព្រៀងគ្នាបង្កើនកិច្ចសហប្រតិបត្តិការឆ្មាំឆ្នេរសមុទ្រ