​ចាប់ខ្លួនស្ត្រី​ ប្រេស៊ីល ម្នាក់ ​ពី​បទ​ដឹក​សព​ចូល​ធនាគារ​ ដើម្បីឲ្យស៊ីញ៉េខ្ចី​លុយ

ស្ត្រីជនជាតិប្រេស៊ីលម្នាក់ត្រូវបានចាប់ខ្លួនភ្លាមៗ បន្ទាប់ពីនាងបានដើរចូលទៅក្នុងធនាគារមួយ ដោយរុញសាកសពបុរសចំណាស់ ហើយនាងសង្ឃឹមថានឹងអាចសហការចុះហត្ថលេខាលើប្រាក់កម្ចីឲ្យនាង។ នេះបើយោងតាមការចុះផ្សាយពីសារព័ត៌មាន yahoo កាលពីថ្ងៃទី១៨ ខែមេសា ឆ្នាំ២០២៤។

វីដេអូមួយនេះត្រូវបានថតបានដោយបុគ្គលិកធនាគារក្នុងសង្កាត់ Bangu នៃទីក្រុង Rio De Janeiro បង្ហាញពីស្រ្តីម្នាក់ឈ្មោះ Erika de Souza Vieira Nunes បាននាំយកសាកសពរបស់បុរសឈ្មោះ Paulo Roberto Braga ចូលទៅក្នុងសាខាធនាគារមួយកន្លែង។ ប៉ុន្តែបុរស Braga បានស្លាប់នៅអាយុ ៦៨ ឆ្នាំ កាលពីប៉ុន្មានម៉ោងមុននេះបន្តិច​ ហើយនៅក្នុងវីដេអូនោះ នាងហៅ Braga ថាជាពូរបស់នាង នៅពេលនាងនិយាយទៅកាន់រាងកាយ ហើយលើកក្បាលរបស់គាត់ឲ្យដឹងខ្លួន។

ដោយឡែក កាសែត New York Post បានរាយការណ៍ដែរថា នាងក៏បានស្នើសុំឲ្យគាត់ចុះហត្ថលេខាលើប្រាក់កម្ចីចំនួនប្រហែល ៣,៤០០ ដុល្លារ ដោយក្នុងនោះស្រ្តីដដែលបានបង្ខំសពឲ្យកាន់ប៊ិចមួយស៊ីញ៉េ ហើយ​និយាយ​គំរាមថា «​ស៊ីញ៉េភ្លាម ​ដើម្បី​កុំ​ឲ្យ​ខ្ញុំ​ឈឺក្បាល​ទៀត ខ្ញុំ​មិន​អាច​យក​លុយបាន​ទេ បើមិនព្រមស៊ីញ៉េ។

ទោះយ៉ាងណាក៏ដោយ បន្ទាប់ពីត្រូវប៉ូលិសចាប់ខ្លួននៅកន្លែងកើតហេតុ Nunes បានសារភាពថា នាងជាក្មួយស្រីរបស់បុរសនោះ។ ប៉ុន្តែយ៉ាងណាក៏ដោយ ប៉ូលិសបានបញ្ចាក់ថា នាងអាចប្រឈមមុខនឹងការចោទប្រកាន់ រួមទាំងការក្លែងបន្លំ ការកេងបន្លំ និងការរំលោភបំពានលើសាកសព។

លោក Fábio Luiz មេប៉ូលិសបានប្រាប់ TV Globo ដែលជាទូរទស្សន៍ដ៏ធំមួយរបស់ប្រេស៊ីលថា “រឿងសំខាន់គឺត្រូវបន្តការស៊ើបអង្កេត ដើម្បីកំណត់អត្តសញ្ញាណសមាជិកគ្រួសារផ្សេងទៀត និងស្វែងយល់បន្ថែមអំពីប្រាក់កម្ចីនេះ”។

ក្នុងនោះ ប៉ូលិសបាននិយាយបន្ថែនទៀតថា ការស៊ើបអង្កេតបន្តទៅលើលក្ខណៈនៃការស្លាប់របស់ Braga ថាតើនាង Nunes ពិតជាក្មួយស្រីរបស់គាត់ឬអត់ ហើយថាតើនរណាម្នាក់ផ្សេងទៀតដែលទាក់ទងនឹងពួកគេទាំងពីរអាចកំពុងព្យាយាមប្រព្រឹត្តការក្លែងបន្លំធនាគារ៕

អត្ថបទ៖ សាង ស្រីល័ក្ខ

ចុចអាន៖ប្រុសៗនៅ ឥណ្ឌូណេស៊ី លែងចង់រៀបការ ខណៈចំនួនប្រជាជនវ័យក្មេងកាន់តែកើនឡើង