លោក Biden ត្រៀមបិទពាក្យសុំសិទ្ធិជ្រកកោន បើលំហូរជនចំណាកស្រុក​នៅព្រំដែន ម៉ិកស៊ិក ឡើងហួសកម្រិត

សេតវិមានបានប្រាប់សមាជិកសភាថា លោកប្រធានាធិបតី Joe Biden កំពុងរៀបចំចុះហត្ថលេខាលើបទបញ្ជាប្រតិបត្តិដែលនឹងបិទការស្នើសុំសិទ្ធិជ្រកកោននៅព្រំដែន អាមេរិក-ម៉ិកស៊ិក ប្រសិនបើលំហូរនៃជនចំណាកស្រុកឈានដល់ ២,៥០០ នាក់ជាមធ្យមក្នុងមួយថ្ងៃ ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី៤ ខែ​មិថុនា ។

បទបញ្ជាប្រតិបត្តិរបស់លោក Biden នឹងចូលជាធរមានភ្លាមៗ ប្រសិនបើលំហូរនៃជនចំណាកស្រុកនៅតាមតំបន់ព្រំដែន អាមេរិក-ម៉ិកស៊ិក ឈានដល់កម្រិតដ៏ច្រើនក្រាស់ក្រែលនេះ ស្របពេលដែលតួលេខបច្ចុប្បន្នគឺមាន ១,៥០០ នាក់ជាមធ្យមក្នុងមួយថ្ងៃ ។

ទន្ទឹមនោះ បទបញ្ជារបស់លោកប្រធានាធិបតីមានគោលបំណងព្យាយាមទប់ស្កាត់ការរីករាលដាលជនចំណាកស្រុកនៅតាមតំបន់ព្រំដែន ជាពិសេសដើម្បីទាក់ទាញប្រជាប្រិយភាព ក៏ដូចជាសន្លឹកឆ្នោតសម្រាប់ការបោះឆ្នោតជ្រើសរើសប្រធានាធិបតីនៅខែវិច្ឆិកាខាងមុខនេះ ។

គួរបញ្ជាក់ថា មុនចេញច្បាប់នេះ លោក Biden ក៏បានគិតពិចារណាអស់រយៈពេលជាច្រើនខែផងដែរ ដោយសារតែច្បាប់ទ្វេភាគីរវាងអាមេរិក និងម៉ិកស៊ិកដើម្បីទប់ស្កាត់សិទ្ធិជ្រកកោននៅតាមព្រំដែនហាក់ប្រេះឆា បន្ទាប់ពីសមាជិកគណបក្សសាធារណរដ្ឋមិនឯកភាពតាមកិច្ចព្រមព្រៀងរបស់អតីតប្រធានាធិបតី Donald Trump ៕

អត្ថបទ៖​ ប៊ុន សុភាព