ព័ត៌មានអន្ដរជាតិ

ចូ បៃដិន អំពាវនាវឲ្យប្រជាជនអាមេរិក កុំដុតកម្តៅនយោបាយ ក្រោយការវាយប្រហារលោក ត្រាំ

បានផុស

១ ម៉ោង មុន

នៅ

ថ្ងៃចន្ទ ១៥ កក្កដា ២០២៤

ដោយ

តាមការចុះផ្សាយរបស់ Reuters នៅថ្ងៃចន្ទទី១៥ខែកក្កដា លោកប្រធានាធិបតី ចូ បៃដិន បានអំពាវនាវឲ្យប្រជាជនអាមេរិក កុំដុតកម្តៅនយោបាយ បន្ទាប់ពីលោក ដូណាល់ ត្រាំ ត្រូវខ្មាន់កាំភ្លើងប៉ុនប៉ងធ្វើឃាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសុន្ទរកថាជិត៧នាទីចេញពីវិមានអូវ៉ាល់ លោក បៃដិន និយាយថា “ការបាញ់ប្រហារបានអំពាវនាវឲ្យយើងរួបរួមគ្នា។ អរគុណដែល ត្រាំ មិនរបួសធ្ងន់។ យើងមិនអាចអនុញ្ញាតឲ្យអំពើហិង្សាបែបនេះ ក្លាយជារឿងធម្មតាបានទេ។ វោហារសាស្ត្រនយោបាយនៅក្នុងប្រទេសនេះបានឡើងកម្ដៅខ្លាំងហើយដល់ពេលយើងត្រូវធ្វើឲ្យវាស្ងប់ហើយ យើងទាំងអស់គ្នាមានទំនួលខុសត្រូវក្នុងការធ្វើរឿងនេះ”។

សូមបញ្ជាក់ថា អំពើហិង្សាដោយកាំភ្លើង តែងកើតឡើងនៅសហរដ្ឋអាមេរិក។ ទោះបីជាយ៉ាងណាក៏ដោយ អំពើហិង្សាផ្នែកនយោបាយគឺកម្រមានណាស់។

ប្រធានាធិបតីអាមេរិក៤រូបត្រូវបានគេធ្វើឃាត និងច្រើនរូបទៀត បានរួចផុតពីការប៉ុនប៉ងធ្វើឃាត ចំណែកបេក្ខជនប្រធានាធិបតីជាច្រើនរូបត្រូវបានបាញ់ ខណៈមានអ្នកខ្លះបាត់បង់ជីវិត។

លោក ដូណាល់ ត្រាំ ត្រូវខ្មាន់កាំភ្លើងឈ្មោះ Thomas Matthew Crooks លបបាញ់ប្រហារចំនួន៩គ្រាប់ ខណៈពេលលោក ចូលរួមក្នុងពិធីជួបជុំអ្នកគាំទ្រសម្រាប់យុទ្ធនាការឃោសនាបោះឆ្នោតនៅទីក្រុង Butler នៃរដ្ឋ Pennsylvania។

មនុស្ស២នាក់ត្រូវបានសម្លាប់ ក្នុងនោះមានម្នាក់ជាខ្មាន់កាំភ្លើង និងម្នាក់ជាអ្នកចូលរួមពិធីជួបជុំ ខណៈ២នាក់ទៀត រងរបួសធ្ងន់។ ទោះបីជាយ៉ាងណាក៏ដោយ លោក ត្រាំ មិនគ្រោះថ្នាក់ដល់អាយុជីវិតទេ គ្រាន់តែរបួសត្រង់ត្រចៀកប៉ុណ្ណោះ។

FBI បញ្ជាក់ថា Crooks ពិតជាប៉ុនប៉ងធ្វើឃាតលោក ត្រាំ មែន ប៉ុន្តែមូលហេតុដែលជំរុញចិត្តឲ្យគេធ្វើបែបនេះ មិនទាន់ដឹងច្បាស់ទេ៕

អត្ថបទ៖ សុខ សុវណ្ណ

ចុចអាន៖ លម្អិតហេតុការណ៍បាញ់ប្រហារលោក ត្រាំ រញ្ជួយពិភពលោក