WHO ថា ជំងឺកូវីដ ១៩ នឹងមិនរលាយបាត់នៅឆ្នាំនេះទេ ទោះមានវ៉ាក់សាំងក៏ដោយ

អង្គការសុខភាពពិភពលោក (WHO) ជឿជាក់ថា វាទំនងជាមិនអាចទៅរួចទេដែលជំងឺកូវីដ ១៩ នឹងឈានដល់ទីបញ្ចប់ក្នុងប៉ុន្មានខែខាងមុខនេះ ។

លោក Michael Ryan នាយកកម្មវិធីបន្ទាន់ផ្នែកសុខភាពរបស់អង្គការសុខភាពពិភពលោកបាននិយាយថា “ខ្ញុំគិតថាវាមិនទាន់ដល់ពេលទេ និងមិនប្រាកដប្រជាទេក្នុងការគិតថាយើងនឹងបញ្ចប់មេរោគនេះនៅដំណាច់ឆ្នាំនេះ ។ អ្វីដែលយើងអាចធ្វើបានប្រសិនបើយើងឆ្លាតវៃគឺបញ្ចប់ការចូលសម្រាកនៅមន្ទីរពេទ្យ ការស្លាប់ និងសោកនាដកម្មទាក់ទងនឹងរោគរាតត្បាតនេះ” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្តោតសំខាន់របស់អង្គការសុខភាពពិភពលោកនាពេលបច្ចុប្បន្នគឺរក្សាការចម្លងជំងឺកូវីដ ១៩ ឲ្យទាបតាមដែលអាចធ្វើទៅបាន និងចាក់វ៉ាក់សាំងការពារមនុស្សឲ្យបានច្រើន ។

លោក Ryan បាននិយាយថា ស្ថានភាពទាក់ទងនឹងការផ្តល់ដូសនៃវ៉ាក់សាំងមានភាពល្អប្រសើរបើប្រៀបធៀបទៅនឹង ១០ សប្តាហ៍មុន ទោះបីជាមានឧបសគ្គធំៗក្នុងការចែកចាយវ៉ាក់សាំងក៏ដោយ ហើយវីរុសនៅតែមានឥទ្ធិពលដដែល ។

WHO បាននិយាយកាលពីថ្ងៃអង្គារថា ចំនួនករណីឆ្លងថ្មីនៃជំងឺកូវីដ ១៩ បានកើនឡើង ៧ ភាគរយនៅទូទាំងពិភពលោកកាលពីសប្តាហ៍មុន ។ នេះគឺជាការកើនឡើងដំបូងបន្ទាប់ពីមានការធ្លាក់ចុះករណីឆ្លងក្នុងរយៈពេល ៧ សប្តាហ៍កន្លងមកនេះ ។

នៅក្នុងសប្តាហ៍ចុងក្រោយនៃខែកុម្ភៈមានករណីឆ្លងចំនួន ២.៦ លានករណីត្រូវបានរាយការណ៍ទៅទីភ្នាក់ងារអង្គការសហប្រជាជាតិនៅទីក្រុងហ្សឺណែវ ។

WHO និយាយថា ការកើនឡើងនេះអាចបណ្តាលមកពីវីរុសប្រភេទថ្មី និងឆ្លងរាលដាលកាន់តែខ្លាំងឡើងៗនៃវីរុសនេះ ដោយលើកឡើងពីការបន្ធូរបន្ថយវិធានការសុខភាពសាធារណៈ និងមនុស្សលែងសូវការពារខ្លួនដូចមុន ។

នៅមជ្ឈិមបូព៌ាបានឃើញការកើនឡើងខ្ពស់បំផុត ១៤ ភាគរយ បន្ទាប់មកគឺនៅអាស៊ីអាគ្នេយ៍ ៩ ភាគរយ ខណៈចំនួនករណីឆ្លងនៅអឺរ៉ុបកើនឡើង ៩ ភាគរយ និង ៦ ភាគរយនៅអាមេរិក ។

ផ្ទុយទៅវិញនៅអាហ្វ្រិកមានករណីឆ្លងតិចតួចប៉ុណ្ណោះពោលជិតមួយភាគបួននៃករណីឆ្លងបើប្រៀបធៀបនឹងមួយសប្តាហ៍មុន ។ ដូចគ្នានេះដែរចំនួនករណីឆ្លងបានធ្លាក់ចុះបន្តិចនៅក្នុងតំបន់ប៉ាស៊ីហ្វិកខាងលិច រួមទាំងអាស៊ីខាងកើត និងអូស្ត្រាលី ។

អង្គការសុខភាពពិភពលោកបានសង្កត់ធ្ងន់ថា វ៉ាក់សាំងមិនផ្តល់នូវភាពស៊ាំភ្លាមៗទេ ប៉ុន្តែត្រូវការរយៈពេលជាច្រើនសប្តាហ៍មុនពេលវាមានប្រសិទ្ធភាព ហើយបានកត់សម្គាល់ថា វាត្រូវការពេលយូរជាងនេះដើម្បីការពារប្រជាជនទាំងមូល ។ នោះមានន័យថាការធ្វើតេស្ត ការតាមដានទំនាក់ទំនង គម្លាតសង្គម ការពាក់ម៉ាស និងវិធានការអនាម័យដទៃទៀតនៅតែមានសារៈសំខាន់ ។

គួរបញ្ជាក់ថា គិតត្រឹមពេលនេះនៅលើពិភពលោកមានករណីឆ្លងជំងឺកូវីដ ១៩ ចំនួន ១១៥,២៩៨,៩០៨ ករណី និងមានអ្នកស្លាប់ចំនួន ២,៥៦០,៦០២ នាក់ ខណៈមានជាសះស្បើយចំនួន ៩១,១១៤,៥០៤ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ SCMP

ចុចអាន ៖ WHO ៖ បន្តប្រុងប្រយត្ន័ចំពោះការកើនឡើងករណីឆ្លងជំងឺកូវីដ ១៩ ទោះមានវ៉ាក់សាំងក៏ដោយ

ចុចអាន ៖ WHO អំពាវនាវដល់ប្រទេសអ្នកមានកុំទិញវ៉ាក់សាំងកូវីដបន្ថែម