ខណៈស្ទើរពេញ​​ពិភពលោក​ប្រឈម​ទឹកជំនន់ ប្រទេសក្រិកបែរជា​​ជួបបញ្ហា​ខ្សត់​ទឹក

ស្របពេលប្រទេសនានានៅជុំវិញពិភពលោកកំពុងជួបប្រទះគ្រោះទឹកជំនន់ ប្រទេសក្រិកបែរជាជួបប្រទះបញ្ហាខ្សត់​ទឹកទៅវិញ ខណៈមានការធ្លាក់ចុះនូវកម្រិតទឹក​ក្នុងបឹងសិប្បនិម្មិត Mornos ដែលជាអាងស្តុកទឹកដ៏សំខាន់របស់រដ្ឋធានីអាថែន​របស់​ប្រទេស​ក្រិកអស់ជាច្រើនទសវត្សរ៍មកហើយ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Xinhua នៅថ្ងៃទី២៩ខែសីហានេះ។

បឹងសិប្បនិម្មិត Mornos ដែលមានទីតាំងនៅប្រហែល១៥០គីឡូម៉ែត្រភាគឦសាននៃទីក្រុង អាថែន គឺ​ជាអាងស្តុកទឹកដ៏សំខាន់សម្រាប់ការផ្គត់ផ្គង់ទឹករបស់រដ្ឋធានីក្រិកអស់ជាច្រើនទសវត្សរ៍មកហើយ។ កាលពីនៅពេលដែលទំនប់មួយត្រូវបានសាងសង់នៅលើទន្លេ Mornos ក្នុងឆ្នាំ១៩៧៩ ដើម្បីបង្កើតបឹងសិប្បនិម្មិតនេះ ភូមិ Kallio ត្រូវជម្លៀសចេញ និងលិចនៅក្រោមទឹក ប៉ុន្តែនៅរដូវក្តៅនេះភូមិ Kallio មិនបានលិចនោះទេ ខណៈដែលកម្រិតទឹកបានធ្លាក់ចុះជាខ្លាំង។

កាលពីខែកក្កដា ឆ្នាំ២០២៣ ផ្ទៃបឹងមានប្រហែល១៦,៦គីឡូម៉ែត្រការ៉េ។ នេះបើយោងតាមទិន្នន័យដែលចេញផ្សាយដោយ National Observatory of Athens ប៉ុន្តែនៅក្នុងខែកក្កដាឆ្នាំនេះវាមានទំហំត្រឹមតែ១២,៨ គីឡូម៉ែត្រការ៉េប៉ុណ្ណោះ។

បញ្ហានេះត្រូវបានរាយការណ៍ថាបញ្ហាកង្វះធនធានទឹកនៅទូទាំងប្រទេសក្រិក ដោយតំបន់ជាច្រើនកំពុងប្រឈមនឹងការខ្វះខាតទឹករួចហើយ។ ទោះជាយ៉ាងណាក៏ដោយ បញ្ហាក៏កំពុងកើតមាននៅក្នុងតំបន់ផ្សេងទៀត ដោយសារគ្រោះរាំងស្ងួតរយៈពេលយូរ និងការថយចុះទឹកភ្លៀង និងការ​ធ្លាក់ព្រិល។

ក្រសួងបរិស្ថាន និងថាមពលបានប្រកាសកាលពីថ្ងៃអង្គារថា ក្នុងរយៈពេលពីរឆ្នាំចុងក្រោយនេះ ទឹកបម្រុងនៅបឹង Mornos និងអាងស្តុកទឹកសំខាន់ៗចំនួនបីផ្សេងទៀតសម្រាប់តំបន់ Greater Athens បានធ្លាក់ចុះប្រហែល ៣០ ភាគរយ មកនៅប្រហែល៧០៣លានម៉ែត្រគូប។ ជាមួយនឹងពាក់កណ្តាលនៃចំនួនប្រជាជនរបស់ប្រទេសដែលរស់នៅក្នុងតំបន់ធំជាងនៅទីក្រុង អាថែន តួលេខនេះគួរឱ្យព្រួយបារម្ភ។

ពាក់ព័ន្ធបញ្ហានេះលោក Dimitrios Emmanouloudis សាស្ត្រាចារ្យផ្នែកគ្រប់គ្រងទឹកភ្នំនៅសាកលវិទ្យាល័យ Democritus of Thrace នៅភាគខាងជើងប្រទេសក្រិកបានឲ្យដឹងថា៖«ប្រទេសក្រិកមានភ្លៀងធ្លាក់តិច ហើយជាពិសេសព្រិលធ្លាក់តិចក្នុងអំឡុងរដូវរងាឆ្នាំ ២០២២-២០២៣ និង ២០២៣-២០២៤»។

លោក​បាន​បន្ត​ថា បញ្ហា​នេះ​កាន់​តែ​ធ្ងន់ធ្ងរ​ឡើង​ដោយ​ការ​កើន​ឡើង​យ៉ាង​ឆាប់​រហ័ស​នៃ​ការ​មក​ដល់​ទេសចរណ៍​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ ខណៈប្រទេសនេះមានប្រជាជនប្រមាណ ១០លាននាក់ទទួលបានភ្ញៀវទេសចរជាង៣០ លាននាក់ក្នុងមួយឆ្នាំៗ។ នេះបើយោងតាមស្ថិតិផ្លូវការ។

លោក Emmanouloudis គូសបញ្ជាក់​ថា សម្ពាធ​លើ​ធនធានទឹក​ក្នុង​គោលដៅ​ទេសចរណ៍​ដ៏ពេញនិយម​លែងមាន​និរន្តរភាព​ទៀតហើយ។ ជាមួយគ្នានេះនៅក្នុងរដ្ឋធានីក្រិកដែលទទួលភ្ញៀវកាន់តែច្រើន ក្រុមហ៊ុនផ្គត់ផ្គង់ទឹក ដែលគ្រប់គ្រងដោយរដ្ឋអាថែន (EYDAP S.A.) បានធ្វើឱ្យសកម្ម​រក​ប្រភពទឹកបន្ថែមដើម្បីគាំទ្របណ្តាញទាំងនេះ រួមមានបឹង Yliki នៅភាគឦសាននៃទីក្រុងអាថែនផងដែរ។

ចំណែកអ្នកជំនាញបានបន្ថែមថា ប្រទេសក្រិកក៏បានពើ​បប្រទះ​សីតុណ្ហភាពខ្ពស់មិនធម្មតាចាប់តាំងពីខែមីនាឆ្នាំនេះ ដែលតម្រូវការប្រើប្រាស់ទឹកកើនឡើង។ ក្រុមមន្ត្រីបាននិយាយថា នឹងមានញ្ហាកង្វះដ៏អាក្រក់បំផុត ប្រសិនបើកង្វះទឹកភ្លៀង និងព្រិលធ្លាក់នៅតែបន្តកើតមានក្នុងប៉ុន្មានឆ្នាំខាងមុខ ដោយសារការប្រែប្រួលអាកាសធាតុ ទឹកបម្រុងសម្រាប់ទីក្រុងអាថែន នឹងឈានដល់តំបន់ក្រហមក្នុងរយៈពេល៤ឆ្នាំ។

យ៉ាងណាមិញ ដើម្បីដោះស្រាយបញ្ហាប្រឈម​ដូច​បាន​រៀបរាប់​ រដ្ឋាភិបាលបានវិនិយោគលើហេដ្ឋារចនាសម្ព័ន្ធបន្ថែមទៀតដើម្បីដោះស្រាយការលេចធ្លាយ និងការសន្សំសំចៃទឹក ការសាងសង់រោងចក្រចម្រោះទឹកបន្ថែមទៀត និងការគ្រប់គ្រងទឹកកែច្នៃបានល្អប្រសើរសម្រាប់ប្រព័ន្ធធារាសាស្រ្តកសិកម្ម។ ពេលនេះ មន្ត្រីជំនាញកំពុងណែនាំប្រជាពលរដ្ឋឲ្យសន្សំសំចៃទឹក។

ទោះជាយ៉ាងណាក៏ដោយ វិធានការរឹតត្បិតលើការប្រើប្រាស់មិនត្រូវបានដាក់ចេញដូចនៅដើមទសវត្សរ៍ទី៩០ទេ បើទោះបីប្រទេសក្រិកប្រឈមនឹងគ្រោះរាំងស្ងួតរយៈយូរក៏ដោយ។

ប្រទេសក្រិក​ធ្លាប់​ជួបវិបត្តិខ្វះទឹកដ៏អាក្រក់បំផុតគឺនៅឆ្នាំ១៩៩៣ ខណៈបច្ចុប្បន្ន​កម្ពស់​ទឹក​បាន​ស្រក​ប្រមាណ​៤០​ម៉ែត្រ ដែលធ្វើឲ្យមនុស្សជាច្រើនមានការព្រួបារម្ភអំពី​អនាគត ដោយសារ​ឥទ្ធិពល​នៃ​ការ​ប្រែប្រួល​អាកាសធាតុកាន់តែអាក្រក់ទៅៗ៕

អត្ថបទ៖ ប៊ុន សុភាព