ស្លាប់មនុស្សទាំងអស់ ក្នុងហេតុការណ៍ធ្លាក់ឧទ្ធម្ភាគចក្រនៅ រុស្ស៊ី

តាមការចុះផ្សាយរបស់ Reuters កាលពីថ្ងៃអាទិត្យទី១ខែកញ្ញាឆ្នាំ២០២៤, នៅទីបំផុត ក្រុមអ្នកជួយសង្គ្រោះបានរកឃើញឧទ្ធម្ភាគចក្រ Mi-8 ដែលបាត់ក្នុងតំបន់ Kamchatka ហើយ ប៉ុន្តែគ្មាននរណាម្នាក់នៅរស់រានមានជីវិតនោះទេ។

ស្របពេលជាមួយគ្នានោះ ក្រសួងស្ថានការណ៍គ្រាអាសន្នរុស្ស៊ី បានរកឃើញសាកសពមនុស្សចំនួន២២នាក់ ដែលភាគច្រើនជាភ្ញៀវទេសចរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧទ្ធម្ភាគចក្រ Mi-8 ដែលជាកម្មសិទ្ធិរបស់ក្រុមហ៊ុន Vityaz-Aero គឺផ្ទុកមនុស្សចំនួន២២នាក់ដោយក្នុងមានអ្នកដំណើរ១៩នាក់ និងអាកាសយានិក៣នាក់។ វាកំពុងហោះហើរពីតំបន់ភ្នំភ្លើង Vachkazhets ទៅកាន់ភូមិ Nikolaevka ស្រុក Yelizovsky ខេត្ត Kamchatka នៃចុងបូព៌ាប្រទេសរុស្ស៊ី នៅពេលឧប្បត្តិហេតុកើតឡើង។

យោងតាមប្រព័ន្ធផ្សព្វផ្សាយរុស្ស៊ី, Mi-8 បានចេញដំណើរនៅម៉ោង៤:១០រសៀល ថ្ងៃទី៣១ខែសីហា ហើយប្រាំនាទីក្រោយមក វាក៏ដាច់ទំនាក់ទំនងនិងបាត់ពីអេក្រង់រ៉ាដាតែម្តង។

តាមការសន្និដ្ឋានដំបូង គេគិតថា ឧទ្ធម្ភាគចក្រ បានធ្លាក់ចូលតំបន់ភ្នំដោយសារកំហុសអ្នកបើក ដោយព្រោះតែអាកាសធាតុមិនអំណោយផល ទើបធ្វើឲ្យពិបាកក្នុងការរុករក។

Mi-8 បង្កើតឡើងដោយសហភាពសូវៀតក្នុងទសវត្សរ៍ឆ្នាំ១៩៦០ ហើយជាឧទ្ធម្ភាគចក្រដែលផលិតបានច្រើនជាងគេបំផុតក្នុងពិភពលោក ពោលគឺមានការផលិតជាង ១៧ ០០០គ្រឿង។ យន្តហោះនេះមានសមត្ថភាពអាចប្រើប្រាស់បានទាំងស៊ីវិលនិងយោធា៕

អត្ថបទ៖ សុខ សុវណ្ណ

ចុចអាន៖ ធ្លាក់ឧទ្ធម្ភាគចក្រលើសណ្ឋាគារ បង្កជាអគ្គិភ័យ បង្ខំឲ្យជម្លៀសភ្ញៀវរាប់រយនាក់ នៅអូស្រ្តាលី