រុស្ស៊ី ព្រមានផ្ទុះសង្គ្រាមលោក ក្រោយដឹងថា អាមេរិក ប្រុងបញ្ជូនមីស៊ីលរយៈចម្ងាយឆ្ងាយឲ្យអ៊ុយក្រែន 

ឆ្លើយតបទៅសេចក្តីរាយការណ៍ថាសហរដ្ឋអាមេរិក ជិតឈានដល់កិច្ចព្រមព្រៀងបញ្ជូនមីស៊ីលរយៈចម្ងាយឆ្ងាយ JASSM ឲ្យអ៊ុយក្រែនដើម្បីអាចវាយចូលកាន់តែជ្រៅទៅក្នុងប្រទេសរុស្ស៊ីនោះ, រដ្ឋមន្ត្រីការបរទេសរុស្ស៊ីលោក Sergei Lavrov បានព្រមានទីក្រុងវ៉ាស៊ីនតោនកុំលលេងជាមួយបន្ទាត់ក្រហមរបស់ទីក្រុងមូស្គូឲ្យសោះព្រោះ សកម្មភាពនេះគឺគ្រោះថ្នាក់ខ្លាំងណាស់ អាចឈានដល់ផ្ទុះសង្គ្រាមលោកលើកទី៣ទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Lavrov ប្រាប់អ្នកកាសែត Pavel Zarubin ថា «ខ្ញុំមិនភ្ញាក់ផ្អើលទេដែលអាមេរិក ឆ្លងកាត់បន្ទាត់ដែលពួកគេកំណត់ដោយខ្លួនឯង ប៉ុន្តែពួកគេគួរតែយល់ថា ពួកគេកំពុងលេងជាមួយខ្សែក្រហមរបស់យើងហើយ ពួកគេមិនគួរធ្វើបែបនេះទេ។ ពួកគេ​ក្លាហានមែន ហើយ​មេដឹកនាំ​អ៊ុយក្រែន វ្ល៉ា​ឌី​មៀរ ហ្សេ​លេ​ន​ស្គី ប្រាកដជា​ដឹងរឿងនេះដែរ»។ 

ស្របពេលជាមួយគ្នានោះ អ្នកការទូតកំពូលរបស់រុស្ស៊ីរូបនេះ ក៏ព្រមានអាមេរិកជាលើកទីពីរក្នុងរយៈពេលមួយសប្តាហ៍ផងដែរថា បើផ្ទុះសង្គ្រាមលោកលើកទី៣មែន វាមិនមែនប្រយុទ្ធតែនៅទ្វីបអឺរ៉ុបទេ។

ចាប់តាំងពីរុស្ស៊ីបើកប្រតិបត្តិការសឹកក្នុងប្រទេសអ៊ុយក្រែននៅចុងខែកុម្ភៈឆ្នាំ២០២២មក ប្រធានាធិបតីរុស្ស៊ី វ្ល៉ាឌីមៀរ ពូទីន បានព្រមានលោកខាងលិចម្តងហើយម្តងទៀត កុំពាំងផ្លូវរុស្ស៊ីដែលមានឃ្លាំងអាវុធនុយក្លេអ៊ែរធំបំផុតរបស់ពិភពលោកឲ្យសោះ។

ទោះបីជាយ៉ាងណាក៏ដោយ សហរដ្ឋអាមេរិកនិងសម្ព័ន្ធមិត្ត មិនដែលខ្វល់ហើយនៅតែបង្កើនផ្តល់ជំនួយយោធាជាបន្តបន្ទាប់ដល់អ៊ុយក្រែន ជាពិសេសជួយជារថក្រោះ មីស៊ីលទំនើប ថែមទាំងយន្តហោះចម្បាំង F-16 ទៀតផង។

មិនត្រឹមប៉ុណ្ណឹង អ្នកនាំពាក្យវិមានក្រឹមឡាំង Dmitry Peskov ក៏ប្រកាសដែរថា រុស្ស៊ីចាប់ផ្តើមពិនិត្យឡើងវិញនូវគោលការណ៍នុយក្លេអ៊ែររបស់ខ្លួនហើយ ដោយសារតែលោកខាងលិច គំរាមកំហែងខ្លាំងពេក៕

អត្ថបទ៖ សុខ សុវណ្ណ