​ក្រុមហ៊ុន​ចិនចាញ់ក្ដី ក្រោយ​បុគ្គលិកស្លាប់​ដោយសារធ្វើ​ការ​១០៤ថ្ងៃជាប់គ្នា គ្មានពេលសម្រាក

តុលាការ​បាន​សម្រេច​ថា ក្រុមហ៊ុន​មួយ​ត្រូវ​ផ្តល់​សំណង​ដល់​គ្រួសារ​បុគ្គលិក​ដែល​បាន​ស្លាប់ ​បន្ទាប់​ពី​ជនរងគ្រោះធ្វើ​ការ​១០៤​ថ្ងៃ​ជាប់​គ្នា​ដោយ​មាន​ការ​សម្រាក​តែ​មួយ​ថ្ងៃ​ប៉ុណ្ណោះ ហើយនេះគឺជាលើក​ឡើង​ពី​ការ​រំលោភ​ច្បាប់​ការងារក្នុងប្រទេសចិន​ផងដែរ។

យោងតាមកាសែត Guangzhou Daily ផ្សាយថា តុលាការនៅក្នុងខេត្ត Zhejiang បានរកឃើញថាក្រុមហ៊ុន ២០% ទទួលខុសត្រូវចំពោះការស្លាប់របស់បុគ្គលិកដែលត្រូវបានកំណត់អត្តសញ្ញាណថា A’bao ​ ស្លាប់នៅអាយុ៣០ ឆ្នាំ។ A’bao បានស្លាប់ដោយសារការបរាជ័យនៃសរីរាង្គជាច្រើន ដោយសារតែការឆ្លងមេរោគ pneumococcal ដែលជារឿយៗត្រូវបានផ្សារភ្ជាប់ជាមួយនឹងប្រព័ន្ធភាពស៊ាំចុះខ្សោយ។

A’bao បាន​ចុះ​កិច្ចសន្យា​ធ្វើ​ជា​ជាង​គំនូរ​ឲ្យ​ក្រុមហ៊ុនល្បីមួយ ​ដែល​ឈ្មោះ​មិន​ត្រូវ​បាន​តុលាការ​បញ្ចេញឲ្យដឹង​ឡើយ។ កិច្ចសន្យានេះមានបំណងបន្តរហូតដល់ខែមករា ឆ្នាំ ២០២៤។ គាត់ត្រូវបានចាត់តាំងឲ្យទៅគម្រោងមួយនៅក្នុងខេត្ត Zhejiang ជាកន្លែងដែលគាត់ធ្វើការពីខែកុម្ភៈដល់ខែឧសភា ឆ្នាំ ២០២៣ ដោយបានឈប់សម្រាកមួយថ្ងៃនៅថ្ងៃទី ៦ ខែមេសា។

នៅថ្ងៃទី ២៥ ខែឧសភា A’bao បានស្នើសុំឈប់សម្រាកឈឺ បន្ទាប់ពីមានអារម្មណ៍មិនស្រួល ហើយបានចំណាយពេលមួយថ្ងៃសម្រាកនៅក្នុងអន្តេវាសិកដ្ឋានរបស់គាត់។ លុះ​ដល់​ថ្ងៃ​ទី​២៨ ឧសភា ស្ថានភាព​របស់​គាត់​កាន់តែ​យ៉ាប់​ទៅ​ហើយ ហើយ​ត្រូវ​បាន​សហការី​ដឹក​ទៅ​មន្ទីរពេទ្យ។ ក្រោយមក គាត់​ត្រូវ​បាន​គេ​រក​ឃើញ​ថា​មាន​ការ​ឆ្លង​មេរោគ​សួត និង​ផ្លូវដង្ហើម ហើយ​បាន​ស្លាប់​នៅ​ថ្ងៃ​ទី ០១ ខែ​មិថុនា មកម៉្លេះ។

បើយោងតាមកាសែត South China Morning Post ក៏បានបញ្ចាក់ដែរថា ក្នុងអំឡុងពេលនៃការស៊ើបអង្កេតដំបូង មន្ត្រីសន្តិសុខសង្គមបាននិយាយថា ចាប់តាំងពីគាត់បានស្លាប់ជាង ៤៨ម៉ោង បន្ទាប់ពីថ្ងៃធ្វើការចុងក្រោយ វាមិនអាចត្រូវបានគេចាត់ថ្នាក់ថាទាក់ទងនឹងការងារនោះទេ ។ ប៉ុន្តែ គ្រួសារ​របស់ A’bao បាន​ដាក់​ពាក្យ​ប្ដឹង​ទាមទារ​សំណង​ដោយ​ចោទ​និយោជក​ថា​ធ្វេសប្រហែស។ ក្រុមហ៊ុនបានប្រកែកថា បន្ទុកការងាររបស់ A’bao អាចគ្រប់គ្រងបានដោយអះអាងថា ការស្លាប់របស់គេគឺដោយសារតែបញ្ហាសុខភាពដែលមានពីមុនមកតែប៉ុណ្ណោះ។

ទោះជាយ៉ាងណាក៏ដោយ តុលាការបានកំណត់ថា ម៉ោងធ្វើការរបស់ A’bao បានបំពានច្បាប់ការងាររបស់ប្រទេសចិន ដែលកំណត់ម៉ោងធ្វើការអតិបរមាត្រឹម ៨ម៉ោងក្នុងមួយថ្ងៃ និងជាមធ្យម ៤៤ម៉ោងក្នុងមួយសប្តាហ៍។ តុលាការ​បាន​សម្រេច​ថា ការ​បំពាន​របស់​ក្រុមហ៊ុន​បាន​រួម​ចំណែក​ដល់​ការ​ចុះខ្សោយ​នៃ​ប្រព័ន្ធ​ការពារ​របស់ជនរងគ្រោះ ដែល​នាំ​ឲ្យគាត់​ស្លាប់។

យ៉ាងណាមិញ ក្រោយការស៊ើបអង្កេតនិងការប្រមូលភត្តុតាងលម្អិត តុលាការបានកាត់ក្ដីយុត្តិធម៌ ដោយបញ្ជាឲ្យក្រុមហ៊ុនបង់ប្រាក់សំណងសរុបចំនួន ៤០០,០០០យន់ (៥៦,០០០ដុល្លារ) ដល់គ្រួសាររបស់ A’bao ។ ក្រុមហ៊ុនបានប្តឹងឧទ្ធរណ៍ ប៉ុន្តែតុលាការប្រជាជនកម្រិតមធ្យម Zhoushan បានតម្កល់សាលក្រមដើមនៅខែសីហាឯណោះវិញ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖សម្ពាធការងារខ្លាំងពេក បង្ខំឲ្យស្ត្រីចិនម្នាក់ឡើងទម្ងន់ ដល់ទៅ៨០គីឡូក្រាម