ជន​ចំណាក​ស្រុកប្រមាណ​៤៨នាក់បាត់ខ្លួន​​​ព្រោះ​លិចទូក​​​​ក្នុងដំណើរ​ពី​អាហ្វ្រិក​ទៅ​អឺរ៉ុប​

ទូកល្បាតនិងឧទ្ធម្ភាគចក្រកំពុងស្វែងរកជនចំណាកស្រុកប្រហែល៤៨នាក់ដែលបានបាត់ខ្លួនចាប់តាំងពីទូករបស់ពួកគេបានលិចនៅជិតកោះ El Hierro របស់ប្រទេសអេស្បាញ ដែលជាឧប្បត្តិហេតុដ៏ធ្ងន់ធ្ងរបំផុតមិនធ្លាប់មានក្នុងរយៈពេល​៣០​ឆ្នាំនៃការឆ្លងកាត់ពីទ្វីបអាហ្រ្វិកទៅកាន់កោះកាណារី​នៅ​តំបន់​អឺរ៉ុប​។ នេះបើយោង​តាមការចេញផ្សាយរបស់សារព័ត៌មាន ​CNN នៅថ្ងៃទី៣០ខែកញ្ញានេះ។

បន្ទាប់ពីមានការស្វែងរកយ៉ាងសស្រាក់សស្រាំ មានមនុស្សចំនួន៩នាក់ ដែលក្នុងនោះម្នាក់ជាកុមារត្រូវបាន​បញ្ជាក់ថា បានស្លាប់ បន្ទាប់ពីទូករបស់ពួកគេបានលិចនៅព្រឹកថ្ងៃសៅរ៍។ ក្រុម​អ្នកជួយសង្គ្រោះអាចជួយសង្គ្រោះជនចំណាកស្រុកចំនួន២៧នាក់ក្នុង​ចំណោម៨៤នាក់ដែលកំពុងព្យាយាមទៅដល់ឆ្នេរសមុទ្រអេស្ប៉ាញកាលពីថ្ងៃសៅរ៍។

ទូកល្បាតបីគ្រឿង និងឧទ្ធម្ភាគចក្របីគ្រឿងបានចូលរួមក្នុងការស្វែងរកជាថ្មីកាលពីថ្ងៃអាទិត្យ ខណៈអាជ្ញាធរអេស្ប៉ាញបាន​ឱ្យ​ដឹងថា ជនចំណាកស្រុកទាំងនោះមកពីប្រទេសម៉ាលី ម៉ូរីតានី និងសេណេហ្គាល់។

ខ្យល់និង​អាកាសធាតុ​អាក្រក់​​បាន​ធ្វើ​ឱ្យ​ការ​ជួយ​សង្គ្រោះ​មាន​ការ​លំបាក​ខ្លាំង​ ខណៈដែលបើគិតពីចំនួនអ្នកដែលបាត់ខ្លួនហេតុការណ៍នេះនឹងក្លាយជាវិបត្តិមនុស្សធម៌ដ៏ធំបំផុតនៅកោះកាណារីក្នុងរយៈពេល៣០ឆ្នាំមិនធ្លាប់មាន។

បើយោងតាមអ្នកអាជ្ញាធរ ជន​ចំណាក​ស្រុក​៩​នាក់​ដែល​បាន​ស្លាប់​នឹង​ត្រូវ​បញ្ចុះ​នៅ​ថ្ងៃ​ចន្ទ និង​ថ្ងៃ​អង្គារដែលក្នុង​ចំណោម​អ្នក​ស្លាប់​មាន​កុមារ​អាយុ​ចន្លោះ​ពី១២-១៥​ឆ្នាំ ខណៈដែលក្តីសង្ឃឹមនៃការស្វែងរកអ្នកនៅរស់រានមានជីវិតបានថយចុះ ប៉ូលិសបានដំឡើងកន្លែងបញ្ចុះសពនៅទីក្រុង El Hierro។

ចំនួនជនចំណាកស្រុកឆ្លងកាត់ពីអាហ្រ្វិកខាងលិចទៅកាន់កោះកាណារីបានកើនឡើង១៥៤ភាគរយ ចាប់ពីខែមករាដល់ខែកក្កដា មានចំនួនសរុបចំនួន ២១,៦២០នាក់ បើតាមទិន្នន័យពីទីភ្នាក់ងារព្រំដែនរបស់សហភាពអឺរ៉ុប Frontex បានបង្ហាញ ដែលស្របពេលចំនួនជនចំណាកស្រុកបានធ្លាក់ចុះនៅផ្លូវកណ្តាល និងខាងលិចសមុទ្រមេឌីទែរ៉ាណេ។ ក្នុងពេលជាមួយគ្នាការឆ្លងកាត់ពីតួកគីទៅក្រិកបានកើនឡើង​៥៧ភាគរយ និងពីផ្លូវទឹកអង់គ្លេសទៅចក្រភពអង់គ្លេស ២២ ភាគរយ ។

ដោយសារតែក្នុងរយៈពេលនេះខ្យល់ស្ងប់ស្ងាត់ពីអាហ្វ្រិកខាងលិចទៅមហាសមុទ្រអាត្លង់ទិក បានជំរុញឱ្យមានការកើនឡើងជាថ្មីនៃជនចំណាកស្រុក ខណៈក្នុងរយៈពេល ៣០ ឆ្នាំនៃការឆ្លងកាត់ជនចំណាកស្រុកទៅកាន់កោះកាណារី ការ​លិច​ទូកដ៏ធ្ងន់ធ្ងរបំផុតដែលបានកត់ត្រារហូតមកដល់បច្ចុប្បន្នបានកើតឡើងនៅក្នុងឆ្នាំ ២០០២ នៅខាងក្រៅកោះ Lanzarote មានមនុស្ស២៥នាក់បានស្លាប់៕

អត្ថបទ៖ ប៊ុន សុភាព