ព័ត៌មានអន្ដរជាតិ

ប៉ូលិសកូរ៉េខាងត្បូង ចូលទៅចាប់ខ្លួនលោក Yoon តែត្រូវប្រទះចលនាតស៊ូពីសំណាក់អ្នកគាំទ្រនិងកងសន្តិសុខ

បានផុស

១ year មុន

នៅ

ថ្ងៃសុក្រ ៣ មករា ២០២៥

ដោយ

ប៉ូលិសកូរ៉េខាងត្បូង បានអនុវត្តដីកាចាប់ខ្លួន ចូលទៅចាប់លោក Yoon Suk Yeol ដល់វិមានប្រធានាធិបតី ប៉ុន្តែពួកគេត្រូវជួបប្រទះជាមួយចលនាតស៊ូរបស់អ្នកគាំទ្រលោក Yoon និងកងសន្តិសុខរបស់គាត់ ដូច្នេះភ្លាមៗនេះគេមិនដឹងច្បាស់ឡើយថាតើស្ថានការណ៍នឹងវិវត្តទៅជាយ៉ាងណាទៀត។

តាមការចុះផ្សាយរបស់ Yonhap, ប៉ូលិសនិងកងកម្លាំងដែលសហការជាមួយមន្ត្រីមកពីការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ (CIO) បានទៅដល់ខ្លោងទ្វារវិមានប្រធានាធិបតីនៅព្រឹកម៉ោង៧ ថ្ងៃសុក្រទី៣ខែមករាឆ្នាំ២០២៥ ដើម្បីអនុវត្តដីកាចាប់ខ្លួន។

យ៉ាងណាក្តី នៅទីនោះ គេឃើញមានក្រុមអ្នកគាំទ្រលោក Yoon រាប់ពាន់នាក់ នៅកកកុញ ដើម្បីព្យាយាមរារាំងប៉ូលិស ហើយនាំគ្នាស្រែកឈ្មោះលោក Yoon ដើម្បីបង្ហាញពីភក្តីភាព ប៉ុន្តែប៉ូលិសបញ្ជាក់យ៉ាងច្បាស់ថា បើសេវាសន្តិសុខប្រធានាធិបតី ឬអ្នកគាំទ្រ Yoon ព្យាយាមបញ្ឈប់ CIO ពីការអនុវត្តការចាប់ខ្លួនមែន ពួកគេនឹងត្រូវនាំទៅមន្ទីរឃុំឃាំងដោយចោទប្រកាន់ពីបទរារាំងកាតព្វកិច្ចមន្ត្រី។

ជុំវិញបញ្ហានេះ មេធាវីរបស់លោក Yoon បានប្រកាសថា ការអនុវត្តដីកាចាប់ខ្លួនលោក Yoon គឺខុសច្បាប់ ហើយពួកគេនឹងចាត់វិធានការតាមផ្លូវច្បាប់ ប៉ុន្តែមិនបានបញ្ជាក់លម្អិតទេ។

សូមបញ្ជាក់ជាថ្មី កាលពីថ្ងៃទី៣១ខែធ្នូឆ្នាំ២០២៤ តុលាការកូរ៉េខាងត្បូង បានអនុម័តដីកាចាប់ខ្លួនលោក Yoon ដោយអាចធ្វើឲ្យគាត់ ក្លាយជាប្រធានាធិបតីកាន់តំណែងដំបូងគេ ដែលត្រូវឃុំខ្លួន ជាផ្នែកមួយនៃការស៊ើបអង្កេតលើបទចោទប្រកាន់ថា គាត់ជាមេក្លោងបះបោរដោយព្យាយាមដាក់ច្បាប់អាជ្ញាសឹក។

CIO ដែលកំពុងដឹកនាំក្រុមស៊ើបអង្កេតរួមគ្នា ជាមួយប៉ូលិសនិងរដ្ឋអាជ្ញា មានពេលរហូតដល់ថ្ងៃទី៦ខែមករា ដើម្បីអនុវត្តដីកាចាប់ខ្លួននេះ។

លោក Yoon ត្រូវបានព្យួរពីតួនាទីជាប្រធានាធិបតី កាលថ្ងៃទី១៤ខែធ្នូ២០២៤ ហើយ អំណាចបានធ្លាក់ទៅលើ នាយករដ្ឋមន្ត្រី Han Duck-soo សម្រាប់កាន់តំណែងជាប្រធានាធិបតីស្តីទី។

១៣ថ្ងៃក្រោយមក គឺនៅថ្ងៃទី២៧ខែធ្នូឆ្នាំ២០២៤ រដ្ឋសភាបានបោះឆ្នោតទម្លាក់លោក Han Duck-soo ហើយបច្ចុប្បន្ន រដ្ឋមន្ត្រីហិរញ្ញវត្ថុ Choi Sang-mok បានចូលកាន់តំណែងជាប្រធានាធិបតីស្តីទីរហូតដល់លទ្ធផលនៃសវនាការ៕

អត្ថបទ៖ សុខ សុវណ្ណ

ចុចអាន៖ លោក Yoon បន្តប្រយុទ្ធ ខណៈបក្សប្រឆាំងចោទ ថា លោកបញ្ឆេះអ្នកគាំទ្រឲ្យជ្រុលនិយម