លីទុយអានី ជំរុញឲ្យណាតូ បង្ហាញសាច់ដុំនៅសមុទ្របាល់ទិក ដើម្បីកុំឲ្យរុស្ស៊ី បានចិត្តពេក 

ដោយសារតែមានហេតុការណ៍កើតឡើងជាបន្តបន្ទាប់នៅសមុទ្របាល់ទិក ពេលនេះប្រទេស លីទុយអានី ដែលជាសមាជិកណាតូ បានជំរុញឲ្យអង្គការនេះ បង្កើនវត្តមានយោធាបង្ហាញសាច់ដុំនៅទីនោះដើម្បីកម្លារុស្ស៊ី កុំឲ្យទីក្រុងមូស្គូបានចិត្តពេក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មួយរយៈចុងក្រោយនេះ មានហេតុការណ៍អាថ៌កំបាំងពាក់ព័ន្ធខ្សែកាបបាតសមុទ្រកើតឡើងម្តងហើយម្តងទៀត ដែលគេចង្អុលចំមុខរុស្ស៊ីថានៅពីក្រោយសកម្មភាពទាំងនោះ ដ្បិតគ្មានព័ស្តុតាងច្បាស់លាស់ក៏ដោយ។

យ៉ាងណា ប្រធានាធិបតីលីទុយអានី លោក Gitanas Nauseda បានថ្លែងក្នុងកិច្ចសម្ភាសជាមួយ AP កាលពីចុងសប្តាហ៍កន្លងទៅថា «ណាតូនិង EU គួរតែទទួលខុសត្រូវឲ្យបានខ្លាំងជាងនេះ ក្នុងការសង្កេតមើលសមុទ្របាល់ទិក ហើយបន្ថែមកម្លាំងដើម្បីធានាឲ្យបានថា គ្មានឧបទ្ទវហេតុកើតឡើងទៀតទេ នៅទីនោះ។ ដល់ពេលដែលណាតូ បង្ហាញសាច់ដុំខ្លះហើយ»។ លោកបន្តថា តំបន់នេះគ្មានសន្តិសុខឡើយ ដោយសារតែការគំរាមកំហែងមិនឈប់ពីសំណាក់រុស្ស៊ី។

ពាក់ព័ន្ធបញ្ហានេះដែរ កាលពីចុងឆ្នាំមុន ប្រមុខអង្គការណាតូលោក ម៉ាក រូតេ ប្រកាសថា សម្ព័ន្ធភាពយោធាមួយនេះ នឹងបង្កើនសកម្មភាពនៅសមុទ្របាល់ទិក នាពេលឆាប់ៗខាងមុខ។

សេចក្តីប្រកាសពេលនោះ កើតឡើងក្រោយរកឃើញថា បាល់ទិក តែងកើតមានការវាយប្រហារបណ្តាលឲ្យខូចខាតនិងបំផ្លាញដល់ខ្សែកាបបាតសមុទ្រ។

បើសរុបទៅ តាំងតែពីខែតុលាឆ្នាំ២០២៣មក មានឧបទ្ទវហេតុចំនួន១១លើក ពាក់ព័ន្ធខ្សែកាបនៅបាតសមុទ្របាល់ទិក ខណៈហេតុការណ៍លើកចុងក្រោយបំផុត គឺការដាច់ខ្សែ fiber-optic ដែលតភ្ជាប់ប្រទេសលីទុយអានី ជាមួយកោះ Gotland របស់ស៊ុយអែត កាលពីសប្តាហ៍មុន៕

អត្ថបទ៖ សុខ សុវណ្ណ

ចុចអាន៖ ប្រមុខណាតូ ប្រកាសបង្កើនកម្លាំងទ័ពនៅ សមុទ្របាល់ទិក