មេទ័ពអ៊ីរ៉ង់ គំរាមបើក «ទ្វារនរក» ចាំដាក់អាមេរិកនិងអ៊ីស្រាអែល បើហ៊ានវាយប្រហារខ្លួនមែន

ជាសារព្រមានខ្លាំងៗទៅសហរដ្ឋអាមេរិកនិងអ៊ីស្រាអែល មេទ័ពអ៊ីរ៉ង់គំរាមថា ខ្លួននឹងបើក «ទ្វារនរក» ប្រសិនបើប្រទេសទាំងពីរនេះ ហ៊ានវាយប្រហារខ្លួនមែន។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមានរបស់មេបញ្ជាការឆ្មាំបដិវត្តន៍ឥស្លាម Hossein Salami ត្រូវគេមើលឃើញថា ជាសារខ្លាំងបំផុតមិនធ្លាប់មានសោះ ចំពេលទំនាក់ទំនងរវាងទីក្រុងតេហេរ៉ង់ ជាមួយវ៉ាស៊ីនតោននិងហ្ស៊េរុយសាឡិម ធ្លាក់ចុះដល់កម្រិតទាបសឹងតែស្មើសូន្យ ហើយសភាពការណ៍ក៏កំពុងតានតឹង។

តាមការចុះផ្សាយរបស់ Newsweek នៅថ្ងៃសុក្រទី៩ខែឧសភាឆ្នាំ២០២៥ លោក Salami ផ្តាំទៅអាមេរិកនិងអ៊ីស្រាអែលថា «សូមកុំសាងកំហុសឲ្យសោះ សូម្បីបន្តិចក៏ដោយ។ យើងនឹងបើកទ្វារនរកចាំអ្នក»។

ការព្រមាននេះ កើតឡើងចំពេលមានសេចក្តីរាយការណ៍ថា អាមេរិកនិងអ៊ីស្រាអែល កំពុងរៀបផែនការវាយប្រហារទីតាំងនុយក្លេអ៊ែរអ៊ីរ៉ង់ ឯទីក្រុងតេហេរ៉ង់ក៏ដឹងរឿងនេះដែរ ហើយកំពុងប្រុងជើងការដូចគ្នា។

ការព្រមាននេះទៀតសោត កើតឡើង៣ថ្ងៃ បន្ទាប់ពីអាមេរិក ដាក់ពង្រាយឡើងវិញនូវនាវាពិឃាដ USS Milius ដែលជានាវា​បំពាក់​ប្រព័ន្ធ​មីស៊ីល​ប្រយុទ្ធ​ Aegis ទៅកាន់​តំបន់​មជ្ឈិមបូព៌ា​ក្បែរ​ប្រទេសអ៊ីរ៉ង់។

សកម្មភាពយុទ្ធសាស្ត្រនេះ គូសបញ្ជាក់អំពីការប្តេជ្ញាចិត្តរបស់​អាមេរិក ក្នុងការពង្រឹងវត្តមានយោធារបស់ខ្លួននៅក្នុងតំបន់ ចំពេលមានភាពតានតឹងកាន់តែខ្លាំងជាមួយទីក្រុងតេហេរ៉ង់។

សូមជម្រាបថា មន្ទីរបញ្ចកោណ បានពង្រឹងវត្តមានរបស់អាមេរិកនៅក្នុងតំបន់ ជុំវិញ​ភាព​តានតឹង​ដើម្បី​ឈានដល់កិច្ចព្រមព្រៀង​​អាវុធនុយក្លេអ៊ែរជាមួយអ៊ីរ៉ង់។ លោកប្រធានាធិបតី ដូណាល់ ត្រាំ ក៏ព្រមានដែរ​ថា អ៊ីរ៉ង់​នឹង​ត្រូវ​រង​ការ​វាយ​ប្រហារ​ បើកិច្ចព្រមព្រៀងដើម្បីបញ្ឈប់​​​ទីក្រុង​តេហេរ៉ង់​ពី​ការ​ទទួល​បាន​​អាវុធ​ប្រល័យ​លោក​​​បរាជ័យ៕

អត្ថបទ៖ សុខ សុវណ្ណ

ចុចអាន៖ អាមេរិក​បញ្ជូន​នាវា​ពិឃាត USS Milius ទៅ​ជិតប្រទេសអ៊ីរ៉ង់ ចំពេលមានភាពតានតឹង