មេទ័ពមីយ៉ាន់ម៉ា ប្តេជ្ញាការពារលទ្ធិប្រជាធិបតេយ្យ

មេដឹកនាំយោធាមីយ៉ាន់ម៉ាបានសន្យាថា នឹងការពារលទ្ធិប្រជាធិបតេយ្យ ស្របពេលយោធាបានព្រមានក្រុមបាតុករ ប្រឆាំងនឹងការធ្វើបាតុកម្មតាមដងផ្លូវ។

ថ្លែងលើកញ្ចក់ទូរទស្សន៍ជាតិដើម្បីអបអរសាទរទិវាកងកម្លាំងប្រដាប់អាវុធ លោក Min Aung Hlaing បានសន្យាជាថ្មីម្តងទៀតថា នឹងរៀបចំការបោះឆ្នោតប៉ុន្តែមិនបានប្រាប់កាលបរិច្ឆេទទេ។

ទូរទស្សន៍រដ្ឋបានព្រមាននៅក្នុងផ្សាយដាច់ដោយឡែកមួយកាលពីថ្ងៃសុក្រថា ក្រុមអ្នកតវ៉ាអាចនឹងត្រូវបាញ់បំបែកក្បាល និងពីខាងក្រោយ។

មនុស្សជាង៣២០នាក់ ត្រូវបានបាញ់សម្លាប់នៅក្នុងការបង្ក្រាបបាតុកម្មចាប់តាំងពីរដ្ឋប្រហារថ្ងៃទី១ខែកុម្ភៈមក។

លោក Min Aung Hlaing បាននិយាយក្នុងការផ្សាយផ្ទាល់ នៅថ្ងៃសៅរ៍នេះថា “កងទ័ពព្យាយាមរួមដៃគ្នាជាមួយប្រជាជាតិទាំងមូល ដើម្បីការពារលទ្ធិប្រជាធិបតេយ្យ។ អំពើហិង្សាដែលប៉ះពាល់ដល់ស្ថិរភាពនិងសន្តិសុខដើម្បីធ្វើការទាមទារ គឺមិនសមរម្យទេ”។

លោកបានបន្ថែមថា កងទ័ពត្រូវតែដណ្តើមអំណាចដោយសារតែ សកម្មភាពខុសច្បាប់របស់មេដឹកនាំដែលជាប់ឆ្នោតតាមបែបប្រជាធិបតេយ្យលោកស្រី អ៊ុងសាន ស៊ូជី និងគណបក្ស សម្ព័ន្ធជាតិដើម្បីប្រជាធិបតេយ្យ របស់លោកស្រី។

ទោះបីជាយ៉ាងណាក៏ដោយ លោកមិនបានបញ្ជាក់ច្បាស់ទេថាតើ យោធាត្រូវបានបញ្ជាឲ្យបាញ់សម្លាប់មែនឬក៏អត់។ កន្លងមក យោធាបានព្យាយាមអះអាងថា ការបាញ់ប្រហារគឺកើតឡើងចេញពីក្នុងចំណោមក្រុមអ្នកតវ៉ា។

ទិវាកងកម្លាំងប្រដាប់អាវុធ គឺរំលឹកដល់ការចាប់ផ្តើមនៃការតស៊ូរបស់យោធាមីយ៉ាន់ម៉ា ប្រឆាំងនឹងការកាន់កាប់របស់ជប៉ុននៅឆ្នាំ១៩៤៥៕

ប្រែសម្រួលដោយ៖ Vann Vann

ប្រភព៖ BBC

ចុចអាន៖ យោធាមីយ៉ាន់ម៉ា ព្រមានបាញ់បំបែកក្បាលបាតុករ