ព័ត៌មានអន្ដរជាតិ

បារាំងបង្ខំបិទអាកាសយានដ្ឋាន ខណៈភ្លើងឆេះព្រៃខ្លាំងពេក

បានផុស

១០ ខែ មុន

នៅ

ថ្ងៃពុធ ៩ កក្កដា ២០២៥

ដោយ

យោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី០៩ខែកក្កដានេះ ភ្លើងឆេះព្រៃកំពុងរំកិលយ៉ាងលឿននៅជិតទីក្រុង Marseille ភាគខាងត្បូងប្រទេសបារាំង នាំឲ្យមានការបិទអាកាសយានដ្ឋាន និងការរំខានដល់សេវាកម្មរថភ្លើង ខណៈអណ្តាតភ្លើងបានរាលដាលយ៉ាងឆាប់រហ័សដោយសារកម្លាំងខ្យល់ខ្លាំង ដែលរាលដាលពាសពេញផ្ទៃដី ៧០០ហិកតា។

ភ្លើងឆេះដ៏សន្ធោសន្ធៅបានបង្ខំឱ្យបិទអាកាសយានដ្ឋាន Marseille Provence ជាបណ្ដោះអាសន្នដែលប៉ះពាល់ដល់ជើងហោះហើរជាង ៦៨ ។ ការធ្វើដំណើរតាមរថភ្លើងទៅនិងមកពីក្រុង Marseille ក៏ទទួលរងផលប៉ះពាល់យ៉ាងខ្លាំងផងដែរ។

អាជ្ញាធរបានជម្លៀសប្រជាជនចេញពីលំនៅឋានមួយចំនួនដែលនៅក្បែរកន្លែងភ្លើងឆេះ ខណៈភ្លើងធ្វើឲ្យមានអ្នករបួសប្រមាណជាង១០០នាក់។ អភិបាលក្រុងបានព្រមានថា ភ្លើងកំពុងឆេះជិតទីក្រុង Marseille ភាគខាងជើងបន្ថែមទៀត ហើយបានជំរុញប្រជាជនឱ្យនៅឆ្ងាយពីតំបន់ដែលមានការឆាបឆេះ។

នៅកន្លែងផ្សេងទៀត ក៏មានភ្លើងឆេះព្រៃខ្លាំងដែរដូចជានៅជិតសហគមន៍ Narbonne ភ្លើងបានបំផ្លាញព្រៃឈើចំនួន ២,០០០ ហិកតា ចាប់តាំងពីថ្ងៃច័ន្ទមក។ ជាការឆ្លើយតប អ្នកពន្លត់អគ្គិភ័យជាង ១,០០០ នាក់កំពុងប្រយុទ្ធនឹងអណ្តាតភ្លើង។

មកដល់ពេលនេះភ្នាក់ងារសង្គ្រោះបន្ទាន់នៅតែបន្តប្រយុទ្ធនឹងភ្លើងឆេះជាច្រើនកន្លែងនៅទូទាំងភាគខាងត្បូង និង ខាងជើងប្រទេសបារាំងចំពេលមានអាកាសធាតុស្ងួត និងខ្យល់បក់ខ្លាំង៕