ត្រាំ ផ្តាំទៅ ម៉េដវ៉េដេហ្វ ថា «និយាយអីត្រូវចេះប្រយ័ត្នមាត់»

ក្រោយពេលអនុប្រធានក្រុមប្រឹក្សាសន្តិសុខរុស្ស៊ី ឌីមីទ្រី ម៉េដវ៉េដេហ្វ ប្រតិកម្មទៅនឹងឱសានវាទរបស់ប្រធានាធិបតីអាមេរិក ដូណាល់ ត្រាំ ដែលឲ្យរុស្ស៊ីបញ្ចប់សង្គ្រាមនៅអ៊ុយក្រែន យ៉ាងយូរ១២ថ្ងៃទៀតបើមិនដូច្នេះនឹងត្រូវប្រឈមការដាក់ទណ្ឌកម្មធ្ងន់.ករួមទាំងការយកពន្ធ១០០%ផងដែរនោះ ពេលនេះប្រមុខសេតវិមានព្រមានទៅលោក ម៉េដវ៉េដេហ្វ ថា និយាយអ្វីក៏ដោយ ត្រូវចេះប្រយ័ត្នមាត់។  

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីដើមសប្តាហ៍នេះ លោកម៉េដវ៉េដេហ្វ បានបន្ទោសប្រធានាធិបតីអាមេរិកថាកំពុងដើរផ្លូវខុសហើយវិធានការនេះនឹងឈានឆ្ពោះទៅរកការផ្ទុះសង្គ្រាម និងថែមទាំងគំរាមទៀតថា អាមេរិកមិនដឹងថារុស្ស៊ីមានប្រព័ន្ធនុយក្លេអ៊ែរខ្លាំងកម្រិតណានោះទេ។

ដោយសារតែពាក្យសម្តីទាំងអស់នេះហើយ ទើបធ្វើឲ្យលោកត្រាំក្តៅស្លឹកត្រចៀក រួចក៏ចាប់កាន់ទូរស័ព្ទបង្ហោះសារលើបណ្តាញសង្គម Truth Social កាលពីថ្ងៃព្រហស្បតិ៍ទី៣១ខែកក្កដាឆ្នាំ២០២៥ថា ឥណ្ឌានិងរុស្ស៊ីជាប្រទេសសេដ្ឋកិច្ចដួលរលំ។ លោកមិនខ្វល់ពីអ្វីដែលប្រទេសទាំងពីរធ្វើដាក់គ្នានោះទេ ប៉ុន្តែសូមប្រាប់ទៅ ម៉េដវ៉េដេហ្វ ឲ្យប្រយ័ត្នមាត់។ គាត់កំពុងចូលទៅក្នុងទឹកដីដ៏គ្រោះថ្នាក់បំផុត!។

យ៉ាងណា នេះមិនមែនទើបលើកដំបូងឡើយដែលត្រាំគំរាមបែបនេះ ពោលគឺកាលពីខែមិថុនា ប្រធា​នាធិបតីអាមេរិក ក៏ប្រាប់ទៅ ម៉េដវ៉េដេហ្វ ឲ្យចេះប្រយ័ត្នសម្តីផងដែរពេលនិយាយរឿងអាវុធនុយក្លេអ៊ែរ។

កាលនោះ តាមរយៈសារបង្ហោះលើបណ្តាញសង្គម Truth Social ដូចគ្នានេះ ប្រមុខសេតវិមានសរសេរថា លោកបានឮអតីតប្រធានាធិបតីរុស្ស៊ី ម៉េដវ៉េដេហ្វ និយាយដោយមិនប្រយ័ត្នអំពី ពាក្យ N (នុយក្លេអ៊ែរ!) ហើយថា គាត់និងប្រទេសដទៃទៀត ត្រៀមផ្តល់ក្បាលគ្រាប់នុយក្លេអ៊ែរទៅឲ្យអ៊ីរ៉ង់ ដូច្នេះត្រូវប្រយ័ត្នបន្តិចពេលនិយាយពាក្យ N។

លើសពីនេះ លោក Trump អួតថា អាមេរិកមានសមត្ថភាពយោធាដ៏កំពូល ទាំងការវាយប្រហារចេញពីសមុទ្រនិងអាកាស ដូច្នវនរណាក៏ដោយ ពេលនិយាយពាក្យនុយក្លេអ៊ែរ ត្រូវតែប្រយ័ត្នសម្តី។

សូមជម្រាបថា គិតត្រឹមដើមឆ្នាំ ២០២៥ រុស្ស៊ីនិងសហរដ្ឋអាមេរិក​ នៅតែជាប្រទេស​កាន់កាប់​ក្បាល​គ្រាប់​នុយក្លេអ៊ែរ​ប្រមាណ ៨៧%នៃ​ចំនួន​សរុប​ទូទាំង​ពិភពលោក។

រុស្ស៊ី មាន​ក្បាល​គ្រាប់​នុយក្លេអ៊ែរ​សរុប ៥ ៤៥៩គ្រាប់ ហើយក្នុង​ចំណោម​នោះ មាន ១ ៧១៨គ្រាប់ ត្រូវ​បាន​ដាក់​ពង្រាយ​រួចទៅហើយ។ ចំណែកសហរដ្ឋអាមេរិក មាន​ក្បាល​គ្រាប់​នុយក្លេអ៊ែរ​សរុប​ ៥ ១៧៧ គ្រាប់ ដោយក្នុង​ចំណោម​នោះ មាន១ ៦៧០ ក្បាល ត្រូវ​បាន​ដាក់​ពង្រាយ​៕

អត្ថបទ៖ សុខ សុវណ្ណ

ចុចអាន៖ លោក ត្រាំ ហៅ​ការ​វាយ​ប្រហារ​របស់​រុស្ស៊ី​លើ​អ៊ុយក្រែន​ថា​ជា «​រឿង​គួរ​ឲ្យ​ខ្ពើម​រអើម»