ព័ត៌មានអន្ដរជាតិ

ផែថងថានលេចមុខ ក្រោយបាត់វត្តមានលោកថាក់ស៊ីនដែលប្រឈមទោសព្រហ្មទណ្ឌ

បានផុស

១១ ខែ មុន

នៅ

ថ្ងៃអង្គារ ១២ សីហា ២០២៥

ដោយ

លោកស្រី ផែថងថាន ស៊ីណាវ៉ាត្រ នាយករដ្ឋមន្ត្រីថៃដែលត្រូវបានព្យួរអំណាចដោយតុលាការធម្មនុញ្ញ បានបង្ហាញខ្លួនក៏កម្រមួយនៅថ្ងៃអង្គារនេះ បញ្ចប់ការសង្ស័យថា លោកស្រីបានលាលែងពីអំណាច ខណៈដែលឪពុកនិងកូនទាំងពីរនេះស្ថិតនៅក្នុងវិបត្តិនយោបាយដែលអាចធ្វើឲ្យពួកគេផុតរលត់ពីឆាកនយោបាយថៃ។

ផែថងថាន បានបង្ហាញខ្លួនលើកដំបូងក្រោយកម្ពុជានិងថៃអនុវត្តកិច្ចព្រមព្រៀងបទឈប់បាញ់។ FB

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ផែថងថាន បានបង្ហាញខ្លួនជាមួយស្វាមី ក្នុងពិធីរាប់បាតព្រះសង្ឃ ដោយគ្មានវត្តមានលោកថាក់ស៊ីននោះទេ។ ការបង្ហាញខ្លួននេះក៏បញ្ចប់នូវការសង្ស័យដែលថា នាងបានលាលែងពីអំណាចនាយករដ្ឋមន្ត្រី នៅមុនតុលាការធម្មនុញ្ញសម្រេចសេចក្តីស្របតាមការទាមទាររបស់ក្រុមបាតុករដែលបានធ្វើកន្លងមក។

ទោះបីជាបែបណា នាយករដ្ឋមន្ត្រីចាំផ្ទះ លោក Phumtham Wechayachai តាមការដកស្រង់របស់សារព័តមានថៃ បានច្រានចោលនូវលទ្ធភាពដែល លោកស្រី ផែថងថាន ចុះចេញពីអំណាចមុនការកាត់សេចក្តីរបស់តុលាការធម្មនុញ្ញដែលត្រូវបានគេរំពឹងថា នឹងកើតមាននៅចុងខែសីហា ឬក៏ដើមខែកញ្ញាខាងមុខនេះ។

រលកកម្ដៅនយោបាយដ៏ខ្លាំង នឹងកើតមាននៅក្នុងខែសីហា ដល់ខែកញ្ញា ដែលពោរពេញដោយសេចក្តីសម្រេចដែលមានកម្រិតនយោបាយខ្ពស់ប៉ះលើក្រុមគ្រួសារលោក ថាក់ស៊ីន ដែលអាចកែប្រែទិដ្ឋភាពនយោបាយរបស់ប្រទេសថៃឡើងវិញផងដែរ។

លោក ថាក់ស៊ីន ស៊ីណាវ៉ាត្រ ដែលប្រឈមសាលដីការរហូតដល់ទៅ២ គឺទីមួយសំណុំរឿងព្រហ្មទណ្ឌប្រមាថស្តេចថៃ និង សំណុំរឿងមួយទៀត ពាក់ព័ន្ធការកុហកតុលាការថាមានជំងឺដើម្បីគេចវេសពីការជាប់ពន្ធនាគារ។ សំណុំរឿងទាំងពីរនេះនឹងសម្រេចដោយតុលាការកំពូលនិងតុលាការព្រហ្មទណ្ឌ នៅថ្ងៃទី២២ខែសីហា និងថ្ងៃទី៩ខែកញ្ញាតាមលំដាប់រៀងគ្នា។ ក្នុងករណីមានពិរុទ្ធ លោកថាក់ស៊ីន អាចប្រឈមមានទោសអតិបរមាដល់់៣០ឆ្នាំ ពីសំណុំរឿងទាំងពីរ។

ករណីលោកស្រី ផែថងថាន វិញ តុលាការធម្មនុញ្ញដែលជាស្ថាប័នមើលការខុសត្រូវរដ្ឋធម្មនុញ្ញ និងត្រូវបានគេមើលឃើញថា មានទំនោរលំអៀងទៅរកក្រុមយោធានោះ ដោយសារតែរដ្ឋធម្មនុញ្ញតាក់តែងឡើងក្នុងឆ្នាំ២០១៧ ក្រោមការគ្រប់គ្រងរបស់រដ្ឋាភិបាលមានទំនោរទៅយោធា គ្រោងនឹងចេញសាលក្រមសម្រេចក្នុងរង្វង់ពេលនេះដែរ៕

រ៉ាន់ រើយ