ម៉ាឌូរ៉ូ សុំចរចា ក្រោយ​ ត្រាំ គំរាម​បាញ់​ទម្លាក់​យន្តហោះចម្បាំងវ៉េណេស៊ុយអេឡា

លោក នីកូឡាស ម៉ាឌូរ៉ូ បានជំរុញ​ឲ្យ​មានកិច្ចសន្ទនាជាមួយទីក្រុងវ៉ាស៊ីនតោន ត្រឹមតែប៉ុន្មានម៉ោងបន្ទាប់ពីប្រធានាធិបតីអាមេរិក ដូណាល់ ត្រាំ បានព្រមានថា យន្តហោះយោធាវ៉េណេស៊ុយអេឡាអាចត្រូវបានបាញ់ទម្លាក់ បើពួកគេគំរាមកំហែងដល់កងកម្លាំងអាមេរិកនៅតំបន់ការ៉ាប៊ីន។

លោក ម៉ាឌូរ៉ូ បាន​និយាយ​ក្នុង​សុន្ទរកថា​តាម​ទូរទស្សន៍​ជាតិ​កាល​ពី​ថ្ងៃ​សុក្រ​ទី​៥​ខែ​កញ្ញា​​ថា «វ៉េណេស៊ុយអេឡា តែងតែមានឆន្ទៈក្នុងការពិភាក្សា ដើម្បីចូលរួមកិច្ចសន្ទនា ប៉ុន្តែយើងទាមទារឲ្យមានការគោរព»។

ភាពតានតឹងរវាងប្រទេសទាំងពីរ បានកើនឡើងយ៉ាងខ្លាំងនៅក្នុងសប្តាហ៍នេះ។ កាល​ពី​ថ្ងៃ​អង្គារ កងកម្លាំង​អាមេរិក​បាន​កម្ទេច​នូវ​អ្វី​ដែល​លោក ត្រាំ បាន​និយាយ​ថា​ជា​ទូក​ជួញដូរ​គ្រឿងញៀន​របស់​ប្រទេស​វ៉េណេស៊ុយអេឡា​ដែលមាន​ទំនាក់ទំនង​ជាមួយ​​​ក្រុម​ឧក្រិដ្ឋជន Tren de Aragua ដោយ​បាន​សម្លាប់​មនុស្ស ១១នាក់​។ មន្ទីរបញ្ចកោណ ក្រោយមកបានចោទប្រកាន់យន្តហោះចម្បាំង​របស់វ៉េណេស៊ុយអេឡាថាបានហោះហើរយ៉ាងគ្រោះថ្នាក់ ជិតនាវាកងទ័ពជើងទឹកអាមេរិក ដែលចូលរួមក្នុងការល្បាត ប្រឆាំងគ្រឿងញៀន។

នៅពេលសួរថាតើគាត់នឹងចាត់វិធានការបែបណា ក្នុងករណីមានឧបទ្ទវហេតុបន្ថែម លោក ត្រាំ បានឆ្លើយតបថា «ប្រសិនបើពួកគេពិត​ជា​បង្ក​គ្រោះថ្នាក់​ដាក់ពួកយើង ពួកគេនឹងត្រូវបាញ់ទម្លាក់»។

ចាប់តាំងពីពេលនោះមក ទីក្រុងវ៉ាស៊ីនតោន បានដាក់ពង្រាយយន្តហោះចម្បាំង F-35 ចំនួន ១០​គ្រឿងទៅកាន់តំបន់ Puerto Rico ដោយចូលរួមជាមួយនាវាកងទ័ពជើងទឹកអាមេរិកចំនួន ៨​គ្រឿងដែល​មាន​ស្រាប់​​នៅក្នុងតំបន់។ សេតវិមានបានប្រកាស​ថា ការ​ចូលរួម​នេះ គឺជាផ្នែកមួយនៃយុទ្ធនាការកាន់តែខ្លាំងរបស់លោក ត្រាំ ប្រឆាំងនឹងក្រុម«ភេរវករ» ដែលខ្លួនអះអាងថាត្រូវបានគាំទ្រដោយរដ្ឋាភិបាល​របស់​លោក ម៉ាឌូរ៉ូ។

មេ​ដឹក​នាំ​វ៉េណេស៊ុយអេឡា បានច្រានចោលការចោទប្រកាន់របស់សហរដ្ឋអាមេរិកថាជា«ការកុហក» ដោយទទូចថា ប្រទេសរបស់​ខ្លួន​មិន​ជា​ជម្រក​នៃ​គ្រឿងញឿនទេ។ លោក ម៉ាឌូរ៉ូ បានបរិហារវត្តមានយោធាអាមេរិកថាជា «ការគំរាមកំហែងដ៏ធំបំផុតដែលទ្វីបរបស់យើងបានឃើញក្នុងរយៈពេល ១០០​ឆ្នាំចុងក្រោយនេះ» ហើយបានប្តេជ្ញាថា វ៉េណេស៊ុយអេឡា​ត្រូវបានរៀបចំសម្រាប់ «ការតស៊ូប្រដាប់អាវុធដើម្បីការពារទឹកដី»។ វ៉េណេស៊ុយអេឡារក្សាកម្លាំងបុគ្គលិកសកម្មប្រហែល ៣៤០ ០០០​នាក់ និងទាមទារអ្នកបម្រុងជាង ៨​លាននាក់៕

ដោយ៖ ឈាង