ព័ត៌មានអន្ដរជាតិ

នាយករដ្ឋមន្ត្រីថៃ Anutin លាតត្រដាងពីទំហំទ្រព្យសម្បត្តិទាំងអស់របស់លោក

បានផុស

១០ ខែ មុន

នៅ

ថ្ងៃពុធ ១០ កញ្ញា ២០២៥

ដោយ

Chheang

លោក Anutin Charnvirakul នាយករដ្ឋមន្ត្រីថ្មីរបស់ប្រទេសថៃ បានប្រកាសពីទំហំទ្រព្យសម្បត្តិរបស់លោក ដែលមានសរុបចំនួន ៣,៩ពាន់លានបាត (ប្រហែល ១២៤លានដុល្លារអាមេរិក) ដល់គណៈកម្មាធិការជាតិប្រឆាំងអំពើពុករលួយគិតត្រឹមថ្ងៃទី៩ខែកញ្ញាឆ្នាំ២០២៥ ដែលការលាតត្រដាងនេះគឺជាតម្រូវការសម្រាប់មន្ត្រីរដ្ឋាភិបាលថៃ។

លោក Anutin Charnvirakul (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Anutin Charnvirakul គឺជាមហាសេដ្ឋីសំណង់ មុនពេលចូលប្រឡូកក្នុងឆាកនយោបាយ និងធ្លាប់ធ្វើជាប្រធានក្រុមហ៊ុន Sino-Thai Engineering ដែលជាក្រុមហ៊ុនសំណង់ដ៏ធំបំផុតមួយរបស់ប្រទេសថៃ។

ក្នុងចំណោមទ្រព្យសម្បត្តិរបស់គាត់មានដូចជា៖

យន្តហោះឯកជន៣គ្រឿង
ទូកល្បឿនលឿន២គ្រឿង
អចលនទ្រព្យដ៏ប្រណីតមួយកន្លែងនៅទីក្រុងបាងកក
លុយ ១,០៩ពាន់លានបាត ជាប្រាក់សុទ្ធ និងប្រាក់បញ្ញើនៅគណនីធនាគារជាង២០
ការវិនិយោគតម្លៃប្រហែល ៦៥៥លានបាត
ដីមួយចំនួន
រថយន្តទំនើបចំនួន ៤គ្រឿង
នាឡិកា២២គ្រឿង
បន្ដោងប្រណិត ២៤គ្រាប់
ប៉សឺឡែន Benjarong របស់ខ្សែរាជវង្ស ដែលមានអាយុកាលតាំងពីសតវត្សទី១៣

សូមជម្រាបថា កាលពីថ្ងៃទី៥ខែកញ្ញា សភាបានបោះឆ្នោតជ្រើសរើសលោក Anutin មេដឹកនាំគណបក្ស Bhumjaithai ជានាយករដ្ឋមន្ត្រីទី៣២របស់ប្រទេសថៃ។ ការជាប់ឆ្នោតនេះ បានមកពីការគាំទ្រពីគណបក្សប្រជាជន ដែលបានទាមទារឲ្យលោករំលាយសភាក្នុងរយៈពេល ៤ខែ និងធ្វើប្រជាមតិសម្រាប់រដ្ឋធម្មនុញ្ញថ្មី។ លោក Anutin ធ្លាប់បាននិយាយថា គោលដៅរបស់លោកគឺដើម្បីប្រគល់អំណាចជូនប្រជាជន និងដឹកនាំប្រទេសថៃតាមរយៈការផ្លាស់ប្តូរដ៏ខ្លីមួយ នៅមុនការបោះឆ្នោតថ្មី។

ជ័យជម្នះរបស់លោកកើតឡើងបន្ទាប់ពីតុលាការធម្មនុញ្ញ បានដកតំណែងអតីតនាយករដ្ឋមន្ត្រីលោកស្រី ផែថងថាន ស៊ីណាវ៉ាត្រ កាលពីថ្ងៃទី២៩ខែសីហា ពីបទបំពានច្បាប់ក្រមសីលធម៌ក្នុងការហៅទូរសព្ទជាមួយសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា។ លោកស្រី ផែថងថាន គឺជានាយករដ្ឋមន្ត្រីថៃទី៥ ដែលត្រូវបានតុលាការធម្មនុញ្ញដកតំណែងក្នុងរយៈពេល១៧ឆ្នាំកន្លងមកនេះ៕

ដោយ៖ ឈាង