ព័ត៌មានអន្ដរជាតិ

ពន្ធនាគារបាងកក រងការរិះគន់ថា ជួសជុលឲ្យថ្មីដើម្បីត្រៀមទទួល លោក ថាក់ស៊ីន

បានផុស

៩ ខែ មុន

នៅ

ថ្ងៃពុធ ១០ កញ្ញា ២០២៥

ដោយ

កាលពីថ្ងៃទី ៥ ខែកញ្ញា ឆ្នាំ២០២៥ ទំព័រ Facebook របស់ពន្ធនាគារពិសេសទីក្រុងបាងកក បានប្រកាសពីការបិទជាបណ្តោះអាសន្នចំនួន២ថ្ងៃ ដោយលើកឡើងពីការជួសជុលកន្លែងផ្តល់សេវាសាធារណៈ ខណៈដែលមហាជនជាច្រើនចោទសួរសំណួរថា តើការបិទនេះគឺដើម្បីរៀបចំជាពិសេសសម្រាប់ការមកដល់របស់អ្នកទោសដែលមានឋានៈខ្ពង់ខ្ពស់ ដូចជាលោកថាក់ស៊ីន ស៊ីណាវ៉ាត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសបិទបណ្តោះអាសន្ននូវសេវាពន្ធនាគារពិសេសក្រុងបាងកក បានធ្វើឲ្យមានការចាប់អារម្មណ៍ និងការសួរដេញដោលយ៉ាងទូលំទូលាយ ព្រោះវាស្របពេលជាមួយនឹងការមកដល់របស់លោកថាក់ស៊ីន បន្ទាប់ពីតុលាការកំពូលចេញសាលក្រមសម្រេចឲ្យអតីតនាយករដ្ឋមន្ត្រីរូបនេះ ត្រូវចូលទៅអនុវត្តទោសរយៈពេល១ឆ្នាំ ក្រោយព្រះមហាក្សត្រលើកលែងកាត់បន្ថយទោសពី៨ឆ្នាំ ប៉ុន្តែលោកបានគេចវេសពីការអនុវត្តទោស ដោយយកលេសមានជំងឺ ហើយត្រូវផ្ទេរទៅសម្រាកនៅមន្ទីរពេទ្យរបស់ប៉ូលិស។

ថ្វីដ្បិតតែមានការជូនដំណឹងជាមុនក៏ដោយ ប៉ុន្តែការបិទពន្ធនាគារសម្រាប់ការជួសជុលនៅថ្ងៃនៃព្រឹត្តិការណ៍នយោបាយដ៏សំខាន់ ពីការចូលខ្លួនអនុវត្តទោសរបស់អតីតនាយករដ្ឋមន្ត្រី បានចោទជាសំណួរនិងចំងល់ពីប្រជាជនថៃ។ មហាជនខ្លះបានលើកឡើងថា តើការបិទជាកម្មវិធីថែទាំធម្មតា ឬជាការរៀបចំសម្រាប់ស្ថានភាពពិសេស? តើវាមានបំណងផ្តល់កន្លែងសម្រាប់អ្នកទោសដែលមានឈ្មោះឬឋានៈ ឬជាការគ្រប់គ្រងដើម្បីដោះស្រាយលំហូរចូលនៃប្រព័ន្ធផ្សព្វផ្សាយ និងមន្ត្រីក្នុងថ្ងៃនោះ ដើម្បីកុំឲ្យរំខានដល់ប្រតិបត្តិការធម្មតា?

ទោះបីជាយ៉ាងណាក៏ដោយ ខណៈពេលដែលមិនទាន់មានការបំភ្លឺបន្ថែមពីនាយកដ្ឋានកែតម្រូវ ទាក់ទងនឹងភាពចៃដន្យនេះ ឧបទ្ទវហេតុនេះបានបង្កឲ្យមានការរិះគន់ជាសាធារណៈអំពីតម្លាភាព និងស្តង់ដារក្នុងការថែទាំអ្នកទោស ដែលមានឋានៈជាមហាសេដ្ឋី ដូចជាលោកថាក់ស៊ីន ។

សូមជម្រាបជូនថា ក្រោយការប្រកាសសាលក្រមចប់ភ្លាម មហាសេដ្ឋីវ័យ៧៦ឆ្នាំ ត្រូវបានតម្រូវឲ្យប្តូរសម្លៀកបំពាក់ពីឈុតស៊ីវិលទៅឈុតអ្នកទោស ដើម្បីអនុវត្តទោសរយៈពេល១ឆ្នាំ ដោយឃុំខ្លួននៅមន្ទីរឃុំឃាំង «Bangkok Remand Prison» ។ នេះបើយោងតាមសារព័ត៌មានថៃ The Nation បានចុះផ្សាយនាពេលកន្លងមក៕